Oñtüstik Koreyadağı qısqı Olimpiada oyındarına Qıtay qwraması qatarında qatısıp jatqan 22 jastağı etnikalıq qazaq Arşınğazı Şäken Şıñjañ-wyğır avtonomiyalıq aymağınıñ ortalığı Ürimji qalasında düniege kelgen. 2010 jıldan beri kon'kimen jügiruden Qıtay qwramasınıñ müşesi alğaş ret Olimpiadağa qatısıp otır.

Aqpannıñ 13-i küni Arşınğazı kon'kimen jügiruden 1500 metr qaşıqtıqtı 1:50.16 minutta sırğanap, jarıstı 35-orınmen ayaqtadı. Ol Olimpiada çempionı atanğan gollandiyalıq sportşı K'eld Neysten altı sekundqa qalıp qoydı.

- Olimpiadaday “juan jarısqa” (iri jarıs – red.) keludiñ özi ülken baqıt. Jaspın, täjiribe jinauğa berilgen mümkindik. Jattıqtıruşılarım menen köp ümit kütedi. Sondıqtan mağan mümkindik berdi. Olimpiada – jarıstardıñ töresi. [Nätije] endi men üşin boladı. Osınday jarısqa kelgenim ata-anama, dostarıma maqtanış. Kez kelgen adam [olimpiadağa] qatısa almaydı. Köp joldan, köp qiındıqtan ötip keldim. Jattığularımnıñ jemisi, – deydi ol.

Arşınğazı Şäken 2017 jılğı Qıtay çempionatında 1500 metrge jügiruden 46-orında kelse, 2018 jılğı Qıtay birinşiliginde osı qaşıqtıqqa ötken bäsekede 5-orın ielengen. Sportşı qazir 1500 metrge jügiru boyınşa Qıtay işki reytinginde birinşi orında twrğanın aytadı.

“TUIP-ÖSKEN ELİME MEDAL' SIYLAĞIM KELEDİ”

Arşınğazı Phençhan Olimpiadasında aqpannıñ 24-i küni mass-start jarısına qatısadı. Sportşı aldağı tört jıl boyı 2022 jılı Pekinde ötetin qısqı Olimpiadağa dayındalatının aytadı.

- Qazir nebäri 22 jastamın. Köru, üyrenu eken. Mwzda sasqalaqtau boladı eken. Älem üzdikterimen deñgeyim äli say kelmeytinin tüsindim. Köp maşıqtanu kerek. 2022 jılı Otanımda ötetin Olimpiada meniñ mejem boladı. Biılğı Olimpiada – armannıñ bastaluı. Armanğa jetu üşin, biikke şığu üşin äli köp maşıqtanamın, – dedi ol Azattıq tilşisine.

Arşınğazı Şäkenniñ aytuınşa, “Qıtay qwramasında wltqa bölu, qıtay wltınan şıqqan sportşılarğa basımdılıq beru degen joq. Kimniñ nätijesi jaqsı bolsa, soğan mümkindik beriledi”.

- Qıtay qwramasında qazaq kon'kişiler köp. Bas qwramada menen basqa Dästür Twrsınhan jäne Almas Qaqanbay degen qazaqtar bar. “Bwl – qıtay, bwl – qazaq” dep bölmeydi. Eşkim eşkimdi alalamaydı. Qıtay wltına basımdılıq beriledi degen jalğan söz. Jattıqtıruşılar bärimizge teñ qaraydı. Ürimjide jattığuğa barlıq mümkindik bar. Tuıp-ösken jerim – Qıtay. Patriotpın. 2022 jılğı Olimpiadada elime medal' sıylağım keledi. Eşqayda ketpeymin, basqa eldiñ azamattığın alu oyımda joq, – deydi Qıtayda twratın etnikalıq qazaq.

Kon'kişi Ürimji qalasında twrıp jatqanın, sonda jattığatının aytadı. Zeynet jasındağı ata-anası Şıñjañdağı auıldardıñ birinde twradı eken. Otbasındağı özinen keyingi inisi sportpen aynalıspaydı.

- Kon'kidi 13-14 jasımda bastadım. Ata-anam – qarapayım bwqara. Solardıñ köz, jürek quanışımın. Bala kezimnen mwzdı jaqsı kördim. Mektep aulasında balalarmen mwz tebetinbiz. Aldımen Ürimjidegi arnayı sport mektebinde oqıp, sonda jattıqtım. Sporttıñ osı türin tañdauıma mwğalimim sebepker boldı. Keyin Şıñjañdağı ortalıq sport mektebine tüstim. Sol jerde köp jattığudıñ arqasında jaqsı nätijeler körsete bastadım, – deydi ol.

Arşınğazı Şäken Qazaqstanda tuısqandarı, dostarı bar ekenin, biraq tarihi Otanında äli bolıp körmegenin aytadı. Sportşı keler jılı Qazaqstanda kon'kimen jügiruden ötetin jarıstardıñ birine barudı josparlaydı. Al Phençhan Olimpiadasınan keyin ol naurız ayında AQŞ-ta ötetin halıqaralıq jarısqa, odan keyin Qıtay işindegi turnirge qatıspaq.

Azat Europa / Azattıq radiosı