كوز قاراس

قازاق ەلدىگىن ساقتاۋ ءۇشىن كونىپ وتىر…

kerey.kz

 |  Jan 7, 2019

قاراعاندى وقيعاسىنىڭ ءتۇپ-توركىنى دە الەۋمەتتىك تەڭسىزدىككە تىرەلگەندەي: ەتنيكالىق توپ – باي، جەر يەسى – كەدەي، ولار مورالدىق تۇرعدا باسىم، بۇلار قورلانىپ ءجۇر. مارقۇم 23 جاسار بالانىڭ قازاسى وسى قىجىل شوعىنا ماي قۇيعانداي اسەر ەتتى. راقىمجاننىڭ جوعىن جوقتاعانداردى، قازاق بىرىگۋى كەرەك دەگەندەردى ۇلتشىلعا، فاشيستكە تەڭەۋ ءوز ارامىزدا ۇدەپ تۇر، ءتىپتى، قازاقستاننان ءتۇڭىلدىم، قازاقتار قورقىنىشتى بوپ بارادى، دەگەن قازاقتاردى بايقادىم. ويدان وزا شابۋعا اسىقپاساق. راس، قازاق ءوز جەرىندە، ەلىندە كۇشتى بولۋى كەرەك، ول – بىلەك پەن جۇدىرىقتىڭ كۇشى ەمەس، زاڭ كۇشى بولۋى ءتيىس. اراب امىرلىكتەرىندە جەرگىلىكتى حالىق – ارابتار 20 پايىزعا جەتپەيدى، قالعانى – ءتۇرلى ەتنيكالىق توپتار. سونىڭ ءبارى جاڭاعى 20 پايىزعا قىزمەت ەتەدى، الەۋمەتتىك ارتىقشىلىقتىڭ ءبارى ارابقا: جاڭا تۋعان اراب بالاسىنىڭ ەسەپشوتىنا مەملەكەت 40 000 دوللار سالادى، ەل ەگەسىنە قارا جۇمىس ىستەتپەيدى، ت.ب. تاي ەلىندە بيزنەس اشىپ بايۋعا بولادى، بىراق، كاسىبىڭدى تايلىققا تىركە؟! اناۋ دامىدى دەگەن ەۋروپانىڭ وزىندە “ەۋروپالىق قۇندىلىقتار” دەگەن ۇعىم بار، مىسالى، اعىلشىننىڭ ءتىل، ءدىن، داستۇرىنە مەنسىنبەي قاراعاندى مەملەكەتتەن قۋىپ شىعادى، كەۋدەمسوق بولساڭ ەلىڭە بارا عوي. بۇل كوپ ەل دامۋ كەزەڭىندە وتكەن سۇرلەۋ. ءۇي يەسى شاڭىراعىن تىكتەپ، كەرەگەسىن بەكىتىپ السا قوناقتارعا دا جايلى بولادى. ءبىز بولساق ءتىلى كوپ، ساياستى كوپ، قوجايىنى كوپ…كوپ…كوپ جولعا ءتۇسىپ الدىق. مۇناي قىتايلىق سنپس-كە ءوتىپ جاتىر، جانارمايدىڭ جارتىسى رەسەي ەنشىسىندە، ۋران دا سودا، التىن-كۇمىس جويىتتە، كومىر ۇندىستە… ءۇندىس دەمەكشى بار يگىلىگىنەن جۇرداي بولعان جۇمىر جەردىڭ بەتىندە “قىزىل تەرىلەر” عانا شىعار، رەزەرۆاتسيادان ۇزامادى بايعۇستار. ءبىزدى ونداي تاعدىردان قۇداي ساقتاسىن، دەسەدە، قالىڭ بايلىق قايناعان قازاننان قاسپاق قىرۋعا حاقىسى جوق قازاقتىڭ شىرىلى ءار جەردەن شىعادى، ال ءبىر قازاق شىرقىراسا مىڭ قازاقتىڭ سۇيەگى سىرقىرايدى. سونى ۇقپاي ءوز ۇلتىڭنان بۇلىكشى ىزدەۋ، ۇلى وركەنيەتكە جالعىز ءوزىڭنىڭ ورەڭ جەتكەندەي ءدىلمارسۋ اسا اقىلدى ءىس ەمەس. قازاق ەلدىگىن ساقتاۋ ءۇشىن كونىپ وتىر، سول كونبىستىكتىڭ ءتۇبى ونى ساباۋعا اپارسا – مەملەكەت يەسىنىڭ تىپتەن سورلاعانى. وزگەنىڭ ءوتى جارىلىپ كەتسە دە جەر – قازاقتىڭ بايىرعى جەرى، جالعىز وتانى. ۇيىڭدە وتىرعان قوناقتاردا وتاعاسىنان يمەنۋ، قۇرمەتتەۋ، ءسوزىن تىڭداۋ دەگەندەي سەزىم بولادى، بىزدەگى سۇيەكسىز ساياساتتىڭ كەسىرىنەن سول تۇيسىك جويىلدى. بۇل – قازاق قازاقتى كەكەتەتىن، تىلدەيتىن ماسەلە ەمەس، ەل بولىپ تولعايتىن كۇردەلى ءتۇيىن.
قاقاعان ايازدا تابانداپ تۇرىپ، سوزگە ەرمەي، ساۋاتتى تالاپ قويعان ازاماتتار جارادى!

Serik Abikenuly

Facebook پاراقشاسىنان الىندى