اقپاننىڭ 10-ى كۇنى ۆەنگريا پرەمەر-ءمينيسترى ۆيكتور وربان حالىققا جولداۋى كەزىندە ۇكىمەت ەكى بالاسى بار وتباسىلارعا “سالىقتى ازايتىپ، تومەنگى پايىزبەن يپوتەكا ۇسىنۋدى، اۆتوكولىك الۋعا سۋبسيديا بەرۋدى جوسپارلاپ وتىرعانىن” ايتتى.
ورباننىڭ سوزىنشە، ۇكىمەت ءتورت جانە ودان كوپ بالا تۋعان ايەلدەردى جەكە تابىس سالىعىنان بوساتادى.
“40 جاسقا تولماعان ايەل ءبىرىنشى رەت تۇرمىسقا شىقسا 10 ميلليون فورينت (36 مىڭ دوللار) سۋبسيديالىق نەسيە بەرەمىز. نەسيە العان وتباسىنىڭ ەكىنشى بالاسى تۋعاندا قارىزدىڭ ۇشتەن ءبىر بولىگى كەشىرىلەدى. ال ەگەر ءۇشىنشى بالا دۇنيەگە كەلسە، نەسيە تولىعىمەن كەشىرىلەدى” دەدى وربان.
وربان ەۋروپاعا تاياۋ شىعىس، ازيا جانە سولتۇستىك افريكادان ميگرانتتاردىڭ جاپپاي كەلۋىن سىنايتىن ساياساتكەر رەتىندە تانىمال. ۆەنگريا پرەمەر-ءمينيسترى ەۋروپادا تۋ دەڭگەيى تومەندەپ كەتكەنىن، بىراق ميگرانتتاردى قابىلداۋ ماسەلەنىڭ شەشىمى ەمەس ەكەنىن ايتقان.
“بىزگە ستاتيستيكا كەرەك ەمەس. بىزگە ۆەنگريالىق بالالار كەرەك” دەگەن وربان جىل سايىنعى حالىققا جولداۋىندا.
وربان جولداۋى اياقتالعان سوڭ بۋداپەشتە جۇزدەگەن ادام كوشەگە شىعىپ، ۇكىمەتكە نارازىلىعىن ءبىلدىردى.
ورتالىق جانە شىعىس ەۋروپادا تۋ دەڭگەيى تومەندەپ، حالىق سانى ازايىپ بارادى. ۆەنگريا، پولشا، رۋمىنيا جانە بولگاريادان ميلليونداعان ادام جوعارى تابىس كوزىن ىزدەپ باتىس ەۋروپا ەلدەرىنە كەتكەن.
پرەمەر بۇل مالىمدەمەسىن ءوزىن قولدايتىن Fidesz پارتياسى ەۋروپا پارلامەنتىنە ەنۋگە تالپىنىپ جاتقان تۇستا جاسادى. بيلىك پارتياسى بيىل ۆەنگرياداعى جەرگىلىكتى سايلاۋلارعا دا قاتىسپاق. جەلتوقساندا ەلدە ورباننىڭ ساياساتىنا قارسى شەرۋلەر وتكەن. سىنشىلار پوپۋليست ورباندى ۆەنگرياداعى دەموكراتيانى كۇيرەتىپ، تاۋەلسىز بۇقارالىق اقپارات قۇرالدارىن تۇنشىقتىرىپ وتىر دەپ ايىپتايدى. ونى رەسەي پرەزيدەنتى ۆلاديمير پۋتينگە بۇيرەگى بۇرادى دەپ تە سوگەدى.
بىزگە ستاتيستيكا كەرەك ەمەس. بىزگە ۆەنگريالىق بالالار كەرەك.
وتكەن جىلى ۆەنگريا پارلامەنت جۇمىس بەرۋشىلەرگە قىزمەتكەرلەرىنەن جىلىنا 400 ساعات ارتىق جۇمىس ىستەۋىن تالاپ ەتۋگە مۇمكىندىك بەرەتىن ەڭبەك كودەكسىنە تۇزەتۋلەردى قابىلداعان. وسىدان كەيىن جەلتوقساننىڭ ورتاسىندا بۋداپەشتە مىڭداعان ادام كوشەگە شىعىپ، ەڭبەك قاتىناستارىن رەتتەيتىن جاڭا زاڭداردى «قۇلدار زاڭى» دەپ اتاپ، نارازىلىق تانىتقان.
وتكەن جىلى قاراشادا اقش مەملەكەتتىك دەپارتامەنتى ۆەنگريانى قارۋ-جاراق ساۋداسىنا قاتىسى بار دەگەن كۇدىكپەن ۇستالعان ەكى رەسەيلىكتى جاۋاپقا تارتقىسى كەلگەن اقش-قا بەرمەي، رەسەيگە قايتارىپ جىبەرگەنى ءۇشىن سىناعان.
2018 جىلى بۋداپەشت قالاسىندا جۇمىس ىستەگەن ورتالىق ەۋروپا ۋنيۆەرسيتەتى نەگىزگى باعدارلامالارىن ۆەناعا كوشىرگەن. امەريكالىق ميللياردەر دجوردج سوروس قۇرعان بۇل ۋنيۆەرسيتەت ۆەنگريادا جانە باسقا ەلدەردە ليبەرالدى قۇندىلىقتاردى ناسحياتتاعان. وربان ۇكىمەتى ەلدەگى شەتەلدىك ۋنيۆەرسيتەتتەرگە تالاپتى كۇشەيتكەن.
پىكىر قالدىرۋ