Aqpannıñ 10-ı küni Vengriya prem'er-ministri Viktor Orban halıqqa joldauı kezinde ükimet eki balası bar otbasılarğa “salıqtı azaytıp, tömengi payızben ipoteka wsınudı, avtokölik aluğa subsidiya berudi josparlap otırğanın” ayttı.

Orbannıñ sözinşe, ükimet tört jäne odan köp bala tuğan äyelderdi jeke tabıs salığınan bosatadı.

“40 jasqa tolmağan äyel birinşi ret twrmısqa şıqsa 10 million forint (36 mıñ dollar) subsidiyalıq nesie beremiz. Nesie alğan otbasınıñ ekinşi balası tuğanda qarızdıñ üşten bir böligi keşiriledi. Al eger üşinşi bala düniege kelse, nesie tolığımen keşiriledi” dedi Orban.

Orban Europağa Tayau Şığıs, Aziya jäne Soltüstik Afrikadan migranttardıñ jappay keluin sınaytın sayasatker retinde tanımal. Vengriya prem'er-ministri Europada tuu deñgeyi tömendep ketkenin, biraq migranttardı qabıldau mäseleniñ şeşimi emes ekenin aytqan.

“Bizge statistika kerek emes. Bizge vengriyalıq balalar kerek” degen Orban jıl sayınğı halıqqa joldauında.

Orban joldauı ayaqtalğan soñ Budapeşte jüzdegen adam köşege şığıp, ükimetke narazılığın bildirdi.

Ortalıq jäne Şığıs Europada tuu deñgeyi tömendep, halıq sanı azayıp baradı. Vengriya, Pol'şa, Rumıniya jäne Bolgariyadan milliondağan adam joğarı tabıs közin izdep Batıs Europa elderine ketken.

Prem'er bwl mälimdemesin özin qoldaytın Fidesz partiyası Europa parlamentine enuge talpınıp jatqan twsta jasadı. Bilik partiyası biıl Vengriyadağı jergilikti saylaularğa da qatıspaq. Jeltoqsanda elde Orbannıñ sayasatına qarsı şeruler ötken. Sınşılar populist Orbandı Vengriyadağı demokratiyanı küyretip, täuelsiz bwqaralıq aqparat qwraldarın twnşıqtırıp otır dep ayıptaydı. Onı Resey prezidenti Vladimir Putinge büyregi bwradı dep te sögedi.

Ötken jılı Vengriya parlament jwmıs beruşilerge qızmetkerlerinen jılına 400 sağat artıq jwmıs isteuin talap etuge mümkindik beretin eñbek kodeksine tüzetulerdi qabıldağan. Osıdan keyin jeltoqsannıñ ortasında Budapeşte mıñdağan adam köşege şığıp, eñbek qatınastarın retteytin jaña zañdardı «qwldar zañı» dep atap, narazılıq tanıtqan.

Ötken jılı qaraşada AQŞ memlekettik departamenti Vengriyanı qaru-jaraq saudasına qatısı bar degen küdikpen wstalğan eki reseylikti jauapqa tartqısı kelgen AQŞ-qa bermey, Reseyge qaytarıp jibergeni üşin sınağan.

2018 jılı Budapeşt qalasında jwmıs istegen Ortalıq Europa universiteti negizgi bağdarlamaların Venağa köşirgen. Amerikalıq milliarder Djordj Soros qwrğan bwl universitet Vengriyada jäne basqa elderde liberaldı qwndılıqtardı nashiattağan. Orban ükimeti eldegi şeteldik universitetterge talaptı küşeytken.