“تسەنتر ازيا” سايتىنا سىلتەمە جاساعان قازاقستاندىق بىرقاتار باق قازاقستاننىڭ ارنايى قىزمەت وكىلدەرىنىڭ رەسەي ازاماتى، ەلدە قىتايتانۋشى رەتىندە بەلگىلى كونستانتين سىروەجكيننىڭ ۇستالعانىن حابارلادى.
“ول پرەزيدەنت قاسىم-جومارت توقاەۆتىڭ “جاڭا الەمدىك ءتارتىپتىڭ قالىپتاسۋ كەزەڭىندەگى قازاقستاننىڭ سىرتقى ساياساتى” تاقىرىبىنداعى دوكتورلىق ديسسەرتاتسياسىنىڭ باستى عىلىمي كەڭەسشىسى بولعان. دوكتورلىق ديسسەرتاتسيانى قورعاۋ ءراسىمى 4.06.2001 جىلى رەسەي فەدەراتسياسىنىڭ وزەكتى جانە حالىقارالىق ماسەلەلەر ينستيتۋتىندا ماسكەۋدە ءوتتى” دەپ جازدى سايت.
راستالماعان دەرەك بويىنشا، كونستانتين سىروەجكين “تىڭشىلىق” بابى بويىنشا كۇدىككە ءىلىنىپ وتىر.
الايدا قازاقستاننىڭ ۇلتتىق قاۋىپسىزدىك كوميتەتى (ۇقك) بۇعان بايلانىستى ءباسپاسوز مالىمدەمەسىن تاراتقان جوق. ازاتتىق ءتىلشىسى ۇقك-ءنىڭ ورتالىق اپپاراتىنا، سونىڭ ىشىندە ءباسپاسوز قىزمەتىنە دە حابارلاسۋعا تىرىسقانمەن جاۋاپ الا المادى. ۇقك ورتالىق اپپاراتىنىڭ كەزەكشىسى بۇعان بايلانىستى ەش تۇسىنىكتەمە بەرە المايتىنىن، الايدا دۇيسەنبى، 6 مامىردا ۇقك رەسمي ءباسپاسوز حابارلاماسىن تاراتۋى مۇمكىن ەكەنىن ايتتى.
ادام قۇقىعىن قورعاۋ بويىنشا قازاقستاندىق بيۋرونىڭ ديرەكتورى ەۆگەني جوۆتيس ازاتتىق تىلشىسىمەن اڭگىمەدە “تسەنترازيا” سايتىندا شىققان اقپاراتتا سىروەجكيننىڭ ناقتى قاي كۇنى ۇستالعانى تۋرالى دەرەك جوعىنا نازار اۋدارادى. ونىڭ بولجامىنشا، سىروەجكيندى اقپان ايىندا ۇستاعان بولۋى مۇمكىن، سەبەبى ءدال سول كەزدە ونىڭ ارىپتەستەرىمەن بايلانىسى ءۇزىلىپ قالدى.
Zonakz.net سايتىنىڭ ءتىلشىسى ۆلاديسلاۆ يۋريتسىن 25 ءساۋىر كۇنى جاريالاعان “الەمنىڭ شىنايى كارتاسىنداعى ء“بىر بەلدەۋ – ءبىر جول” جوباسى” اتتى ماقالاسىنىڭ سوڭىنا مىناداي جازبا قالدىرعان.
“قازاقستانداعى قىتاي بويىنشا ساراپشى مامانداردىڭ ورتاسى وتە شاعىن جانە ءبارى ءبىر-ءبىرىن بىلەدى. [ساۋىردە وتكەن قىتايدىڭ ءىرى جوباسىنا ارنالعان] كونفەرەنتسيا كەزىندە كوبى كونستانتين سىروەجكيننىڭ جوعالىپ كەتكەنىنە نازار اۋداردى. ول [اقپان ايىندا وتكەن] رەسپۋبليكاداعى قىتايتانۋ بويىنشا كونفەرەنتسيا كەزىندە بايانداما جاساۋى ءتيىس بولعان، بىراق وعان كەلگەن جوق جانە وعان ەشكىم حابارلاسا الماي جاتىر” دەلىنگەن سايتتا.
جەرگىلىكتى باق-تىڭ جازۋىنشا، الماتىدا تۋىپ-وسكەن 62 جاستاعى كونستانتين سىروەجكين قازاقستاندا ۇزاق جىلدار بويى قىزمەت اتقارعان، ەلدە قىتاي ماسەلەلەرى بويىنشا جەتەكشى ساراپشىلاردىڭ ءبىرى. ورىس، اعىلشىن جانە قىتاي تىلىندە جارىق كورگەن مىڭنان استام ماقالانىڭ اۆتورى.
ازات ەۋروپا / ازاتتىق راديوسى
پىكىر قالدىرۋ