“Centr Aziya” saytına silteme jasağan qazaqstandıq birqatar BAQ Qazaqstannıñ arnayı qızmet ökilderiniñ Resey azamatı, elde qıtaytanuşı retinde belgili Konstantin Sıroejkinniñ wstalğanın habarladı.

“Ol prezident Qasım-Jomart Toqaevtıñ “Jaña älemdik tärtiptiñ qalıptasu kezeñindegi Qazaqstannıñ sırtqı sayasatı” taqırıbındağı doktorlıq dissertaciyasınıñ bastı ğılımi keñesşisi bolğan. Doktorlıq dissertaciyanı qorğau räsimi 4.06.2001 jılı Resey Federaciyasınıñ özekti jäne halıqaralıq mäseleler institutında Mäskeude ötti” dep jazdı sayt.

Rastalmağan derek boyınşa, Konstantin Sıroejkin “tıñşılıq” babı boyınşa küdikke ilinip otır.

Alayda Qazaqstannıñ wlttıq qauipsizdik komiteti (WQK) bwğan baylanıstı baspasöz mälimdemesin taratqan joq. Azattıq tilşisi WQK-niñ ortalıq apparatına, sonıñ işinde baspasöz qızmetine de habarlasuğa tırısqanmen jauap ala almadı. WQK ortalıq apparatınıñ kezekşisi bwğan baylanıstı eş tüsinikteme bere almaytının, alayda düysenbi, 6 mamırda WQK resmi baspasöz habarlamasın taratuı mümkin ekenin ayttı.

Adam qwqığın qorğau boyınşa qazaqstandıq byuronıñ direktorı Evgeniy Jovtis Azattıq tilşisimen äñgimede “CentrAziya” saytında şıqqan aqparatta Sıroejkinniñ naqtı qay küni wstalğanı turalı derek joğına nazar audaradı. Onıñ boljamınşa, Sıroejkindi aqpan ayında wstağan boluı mümkin, sebebi däl sol kezde onıñ äriptesterimen baylanısı üzilip qaldı.

Zonakz.net saytınıñ tilşisi Vladislav YUricın 25 säuir küni jariyalağan “Älemniñ şınayı kartasındağı “Bir beldeu – bir jol” jobası” attı maqalasınıñ soñına mınaday jazba qaldırğan.

“Qazaqstandağı Qıtay boyınşa sarapşı mamandardıñ ortası öte şağın jäne bäri bir-birin biledi. [Säuirde ötken Qıtaydıñ iri jobasına arnalğan] Konferenciya kezinde köbi Konstantin Sıroejkinniñ joğalıp ketkenine nazar audardı. Ol [aqpan ayında ötken] respublikadağı qıtaytanu boyınşa konferenciya kezinde bayandama jasauı tiis bolğan, biraq oğan kelgen joq jäne oğan eşkim habarlasa almay jatır” delingen saytta.

Jergilikti BAQ-tıñ jazuınşa, Almatıda tuıp-ösken 62 jastağı Konstantin Sıroejkin Qazaqstanda wzaq jıldar boyı qızmet atqarğan, elde Qıtay mäseleleri boyınşa jetekşi sarapşılardıñ biri. Orıs, ağılşın jäne qıtay tilinde jarıq körgen mıñnan astam maqalanıñ avtorı.

Azat Europa / Azattıq radiosı