قازاقستان پرەزيدەنتى قاسىم-جومارت توقاەۆ Euronews تەلەارناسىنا بەرگەن سۇحباتىندا ەلدەگى ميتينگىلەر مەن حالىقتىڭ تالابى جايلى ايتتى. ونىڭ سوزىنشە، بيلىك نارازىلىققا شىققانداردىڭ تالابىنا قاتىستى جۇمىس جاساپ جاتىر.
“نارازىلار الەۋمەتتىك ماسەلەلەر بويىنشا تالاپتار قويدى. ماسەلەلەر بارىن جوققا شىعارمايمىن. حالىق كەدەيلەندى. ولار بيلىكتەن الەۋمەتتىك-ەكونوميكالىق ماسەلەلەردى شەشۋدى تالاپ ەتەدى. بيلىك ەستىدى. جۇمىس ىستەيمىز” دەدى ول.
قاسىم-جومارت توقاەۆ ەلدەگى سايلاۋ ءادىل ءوتتى دەپ سانايدى.
“ارينە، ولار (سايلاۋ ءادىل ەمەس دەپ نارازىلىققا شىققاندار – رەد.) بوساتىلادى. ولار سايلاۋ ءادىل وتپەدى دەپ ويلايدى. ال مەنىڭ ويىمشا، سايلاۋ جالپى ءادىل ءوتتى” دەدى قازاقستان پرەزيدەنتى تەلەارناعا.
توقاەۆ Euronews ارناسىنا بەرگەن سۇحباتىندا ميتينگ كەزىندە كەزدەيسوق ۇستالعانداردان كەشىرىم سۇرادى. قازاقستان باسشىسى ۇستالعاندار اراسىندا قوعامدىق تارتىپكە قاۋىپ توندىرمەگەن ادامدار دا بارىن، ولار دا جاقىن ۋاقىتتا بوساتىلاتىنىن جەتكىزدى.
“الداعى ۋاقىتتا دا زاڭسىزدىقتارعا جول بەرىلمەيدى. باس پروكۋراتۋرا حالىققا مۇنداي ميتينگىلەردىڭ زاڭسىز ەكەنىن بىرنەشە رەت ەسكەرتتى. رۇقسات ەتىلمەگەن ميتينگىلەر مەن باسسىزدىقتار نارازىلىققا شىققىسى كەلمەيتىن ادامدارعا كەدەرگى كەلتىرەدى عوي” دەدى ول.
الماتى مەن نۇر-سۇلتان، شىمكەنتتە بىرنەشە كۇن بويى پوليتسيا ازاماتتاردى ۇستاۋمەن بولدى. 9 ماۋسىمدا ەلدە كەزەكتەن تىس پرەزيدەنتى سايلاۋى ءوتىپ جاتقاندا، الماتىداعى استانا الاڭىنا جۇزدەگەن ادام جينالىپ، سايلاۋعا قارسىلىق ءبىلدىردى. 10 ماۋسىمدا سايلاۋدىڭ رەسمي قورىتىندىسىمەن كەلىسپەگەن ازاماتتار تاعى دا كوشەگە شىقتى. بۇل كۇنى دە پوليتسيا الماتى، نۇر-سۇلتان جانە شىمكەنتتە جۇزدەن استام ادامدى ۇستاپ اكەتتى.
بيلىك نارازىلىق شاراسىنا قاتىسۋشىلاردى “ارانداتۋشىلار” دەپ اتاپ، ازاماتتاردى “قاجەت بولعان سوڭ” ۇستاعان پوليتسيا “كاسىبي مىندەتىنە ساي” ارەكەت قىلدى دەپ مالىمدەدى. وقيعاعا كۋا بولعاندار بۇل كۇندەرى پوليتسيا بولىمشەسىنە ميتينگىگە ەش قاتىسى جوق ازاماتتاردى دا الىپ كەتكەنىن ايتادى. ۇستالعان ادام سانى ءىىم جاريالاعان دەرەكتەن الدەقايدا كوپ دەپ سانايتىن قۇقىق قورعاۋشىلار پوليتسيانىڭ ءىس-ارەكەتىنە تاۋەلسىز زەرتتەۋ جۇرگىزۋدى تالاپ ەتتى.
ەلدىڭ باس پروكۋراتۋراسى 9-10 ماۋسىمدا الماتى مەن نۇر-سۇلتاندا ۇستالعان 957 ادام اكىمشىلىك جازاعا تارتىلعانىن حابارلادى.
قازاقستان بيلىگى ەلدەگى ميتينگىگە “قازاقستاننىڭ دەموكراتيالىق تاڭداۋى” قوزعالىسىن (2009 جىلدان بەرى شەتەلدەگى تۇراتىن قۋعىنداعى بانكير مۇحتار ءابليازوۆ قۇرعان) ايىپتايدى. نارازىلىققا شىققانداردىڭ ءبىرازى قدت قوزعالىسىنا قاتىستارى جوعىن، ەلدە وزگەرىس بولعانىن قالايتىندارىن ايتادى.
ازات ەۋروپا / ازاتتىق راديوسى
پىكىر قالدىرۋ