Qazaqstan prezidenti Qasım-Jomart Toqaev Euronews telearnasına bergen swhbatında eldegi mitingiler men halıqtıñ talabı jaylı ayttı. Onıñ sözinşe, bilik narazılıqqa şıqqandardıñ talabına qatıstı jwmıs jasap jatır.

“Narazılar äleumettik mäseleler boyınşa talaptar qoydı. Mäseleler barın joqqa şığarmaymın. Halıq kedeylendi. Olar bilikten äleumettik-ekonomikalıq mäselelerdi şeşudi talap etedi. Bilik estidi. Jwmıs isteymiz” dedi ol.

Qasım-Jomart Toqaev eldegi saylau ädil ötti dep sanaydı.

“Ärine, olar (saylau ädil emes dep narazılıqqa şıqqandar – red.) bosatıladı. Olar saylau ädil ötpedi dep oylaydı. Al meniñ oyımşa, saylau jalpı ädil ötti” dedi Qazaqstan prezidenti telearnağa.

Toqaev Euronews arnasına bergen swhbatında miting kezinde kezdeysoq wstalğandardan keşirim swradı. Qazaqstan basşısı wstalğandar arasında qoğamdıq tärtipke qauip töndirmegen adamdar da barın, olar da jaqın uaqıtta bosatılatının jetkizdi.

“Aldağı uaqıtta da zañsızdıqtarğa jol berilmeydi. Bas prokuratura halıqqa mwnday mitingilerdiñ zañsız ekenin birneşe ret eskertti. Rwqsat etilmegen mitingiler men bassızdıqtar narazılıqqa şıqqısı kelmeytin adamdarğa kedergi keltiredi ğoy” dedi ol.

Almatı men Nwr-Swltan, Şımkentte birneşe kün boyı policiya azamattardı wstaumen boldı. 9 mausımda elde kezekten tıs prezidenti saylauı ötip jatqanda, Almatıdağı Astana alañına jüzdegen adam jinalıp, saylauğa qarsılıq bildirdi. 10 mausımda saylaudıñ resmi qorıtındısımen kelispegen azamattar tağı da köşege şıqtı. Bwl küni de policiya Almatı, Nwr-Swltan jäne Şımkentte jüzden astam adamdı wstap äketti.

Bilik narazılıq şarasına qatısuşılardı “arandatuşılar” dep atap, azamattardı “qajet bolğan soñ” wstağan policiya “käsibi mindetine say” äreket qıldı dep mälimdedi. Oqiğağa kuä bolğandar bwl künderi policiya bölimşesine mitingige eş qatısı joq azamattardı da alıp ketkenin aytadı. Wstalğan adam sanı İİM jariyalağan derekten äldeqayda köp dep sanaytın qwqıq qorğauşılar policiyanıñ is-äreketine täuelsiz zertteu jürgizudi talap etti.

Eldiñ bas prokuraturası 9-10 mausımda Almatı men Nwr-Swltanda wstalğan 957 adam äkimşilik jazağa tartılğanın habarladı.

Qazaqstan biligi eldegi mitingige “Qazaqstannıñ demokratiyalıq tañdauı” qozğalısın (2009 jıldan beri şeteldegi twratın quğındağı bankir Mwhtar Äblyazov qwrğan) ayıptaydı. Narazılıqqa şıqqandardıñ birazı QDT qozğalısına qatıstarı joğın, elde özgeris bolğanın qalaytındarın aytadı.

Azat Europa / Azattıq radiosı