الماتى وبلىسىنىڭ قاراساي اۋدانىنا قاراستى «اسىل ارمان» تۇرعىن ءۇي كەشەنى بۇگىن كارانتينگە جابىلىپ، 22 مىڭ ادامنىڭ ۇيدەن شىعۋىنا تىيىم سالىندى.

شاعىن اۋداندا 9 قاباتتى 21 ءۇي بار. 5 مىڭنان استام پاتەرلى 75 كىرەبەرىسكە كۇزەت قويىلعان. مۇنداعى تۇرعىنداردىڭ 95% الماتى قالاسىنا بارىپ جۇمىس ىستەيدى.

«تۇرعىن ءۇي كەشەنىندە دارىگەرلىك امبۋلاتوريا ۇيىمداستىرىلادى، وندا مەديتسينالىق قىزمەتكەرلەر وسى شاعىن اۋداننىڭ تۇرعىندارى ءۇشىن ارنايى جۇمىس ىستەيدى. ارزان باعامەن ازىق-تۇلىك ساتىلىمى ۇيىمداستىرىلىپ، قاجەتتى زاتتارمەن قامتاماسىز ەتەمىز. دەزينفەكتسيا جۇمىستارى تۇراقتى جۇرگىزىلەدى. تۇرعىندارعا اقپاراتتىق-ناسيحات جۇمىستارى باستالدى. اۋماقتى تۇگەلدەي پوليتسيا قىزمەتكەرلەرى قورشاپ تۇر. ولارمەن بىرگە اسكەريلەردە كەزەكشىلىك قىزمەتىنە كومەكتەسەدى»، – دەدى الماتى وبلىسى اكىمىنىڭ ءباسپاسوز حاتشىسى عالىمۇرات جۇكەل.

«اسىل ارمان» تۇرعىن ءۇي كەشەنىندە كوروناۆيرۋس ينتسەكتسياسىن جۇقتىرعان ادام انىقتالىپ، ناۋرىزدا كوپقاباتتى ءبىر تۇرعىن ءۇي كارانتينگە جابىلدى. كەيىنىرەك بۇل اۋماقتان ەكىنشى رەت قاۋىپتى ۆيرۋس تابىلعانى بەلگىلى بولدى. دەرتكە 61 جاستاعى تۇرعىن شالدىققان.