قىتايدىڭ قازاقستانداعى ەلشىسى چجان سياو نۇر-سۇلتاننىڭ پەكينگە نوتا جولداۋىنا تۇرتكى بولعان Sohu.com سايتىنداعى “قازاقستان نەگە قىتايعا ورالۋدى قالايدى؟” دەگەن ماقالانى “قاسكويلەر” جازدى دەپ سانايدى.

نۇر-سۇلتان 14 ساۋىردە “قازاقستان سىرتقى ىستەر مينيسترلىگىنىڭ وكىلدەرى قىتايدىڭ قازاقستانداعى ەلشىسى چجان سياومەن كەزدەسىپ، www.sohu.com ينتەرنەت پلاتفورماسىندا جاريالانعان “قازاقستان نەگە قىتايعا ورالۋدى قالايدى؟” دەگەن ماقالاعا قاتىستى نارازىلىق ءبىلدىرىپ، قارسىلىق نوتاسىن جىبەرگەنىن حابارلاعان. سول كۇنى Sohu.com سايتىنداعى ماقالا اشىلماي قالعان.

چجان سياو ءۇش كۇننەن سوڭ جازعان Facebook پوستىندا “ماقالانى ارانداتۋ” دەپ اتاپ، “كىمنىڭ مۇددەسى ءۇشىن جاسالعانىن انىقتاۋ كەرەك” دەدى.

“اۆتورى بەلگىسىز ماقالا قىتاي تىلىندە جازىلىپ، قىتاي ينتەرنەت-رەسۋرسىندا شىققاندىقتان عانا ونىڭ اۆتورى قىتاي ازاماتى جانە قىتاي ۇكىمەتىنە قاتىسى بار دەپ ايتۋ — اسىعىس تۇجىرىم ەمەس پە؟” دەپ جازدى چجان سياو.

Sohu.com ينتەرنەت پلاتفورماسىندا جاريالانىپ، كەيىن اشىلماي قالعان ماقالادا “تاريحتا قازاقستان قىتايدىڭ اۋماعىنا تيەسىلى بولعان، قازاقستان تسين يمپەرياسىنىڭ ۆاسسالى ەدى” دەگەن جولدار بولعان ەدى.

وقي وتىرىڭىز: “قازاقستان قىتايعا تيەسىلى” دەگەن سيپاتتاعى ماقالا نارازىلىق نوتاسىنا تۇرتكى بولدى

قازاقستان تارابى Sohu.com سايتى جاريالاعان “مۇنداي سيپاتتاعى ماقالا مەملەكەت باسشىلارىنىڭ 2019 جىلى 11 قىركۇيەكتە قول قويعان بىرلەسكەن مالىمدەمەسىندە ايقىندالعان ماڭگىلىك جان-جاقتى ستراتەگيالىق ارىپتەستىك رۋحىنا سايكەس كەلمەيدى” دەپ سانايدى.

ەلشىنى شاقىرۋ يا نارازىلىق نوتاسىن جولداۋ – ءبىر-ءبىرىن سىناي بەرمەيتىن قازاقستان مەن قىتاي ءۇشىن ەرەكشە جاعداي. قازاقستان باتىس ەلدەرى مەن حالىقارالىق ۇيىمدار “قىتاي شىڭجاڭداعى ميلليونعا جۋىق مۇسىلماندى، سونىڭ ىشىندە ەتنيكالىق ۇيعىرلار مەن قازاقتاردى ساياسي لاگەرلەرگە قاماپ جاتقانى جايلى حابارلاعاندا” قانداي دا ءبىر مالىمدەمە جاساماعان. نۇر-سۇلتان پەكيننىڭ شىڭجاڭداعى لاگەرلەر ساياساتىنا قاتىستى ءالى كۇنگە ناقتى ۇستانىم دا بىلدىرمەدى.

ازات ەۋروپا / ازاتتىق راديوسى