Qıtaydıñ Qazaqstandağı elşisi Çjan Syao Nwr-Swltannıñ Pekinge nota joldauına türtki bolğan Sohu.com saytındağı “Qazaqstan nege Qıtayğa oraludı qalaydı?” degen maqalanı “qasköyler” jazdı dep sanaydı.

Nwr-Swltan 14 säuirde “Qazaqstan sırtqı ister ministrliginiñ ökilderi Qıtaydıñ Qazaqstandağı elşisi Çjan Syaomen kezdesip, www.sohu.com internet platformasında jariyalanğan “Qazaqstan nege Qıtayğa oraludı qalaydı?” degen maqalağa qatıstı narazılıq bildirip, qarsılıq notasın jibergenin habarlağan. Sol küni Sohu.com saytındağı maqala aşılmay qalğan.

Çjan Syao üş künnen soñ jazğan Facebook postında “maqalanı arandatu” dep atap, “kimniñ müddesi üşin jasalğanın anıqtau kerek” dedi.

“Avtorı belgisiz maqala qıtay tilinde jazılıp, Qıtay internet-resursında şıqqandıqtan ğana onıñ avtorı Qıtay azamatı jäne Qıtay ükimetine qatısı bar dep aytu — asığıs twjırım emes pe?” dep jazdı Çjan Syao.

Sohu.com internet platformasında jariyalanıp, keyin aşılmay qalğan maqalada “Tarihta Qazaqstan Qıtaydıñ aumağına tiesili bolğan, Qazaqstan Cin imperiyasınıñ vassalı edi” degen joldar bolğan edi.

Oqi otırıñız: “Qazaqstan Qıtayğa tiesili” degen sipattağı maqala narazılıq notasına türtki boldı

Qazaqstan tarabı Sohu.com saytı jariyalağan “mwnday sipattağı maqala memleket basşılarınıñ 2019 jılı 11 qırküyekte qol qoyğan birlesken mälimdemesinde ayqındalğan mäñgilik jan-jaqtı strategiyalıq äriptestik ruhına säykes kelmeydi” dep sanaydı.

Elşini şaqıru ya narazılıq notasın joldau – bir-birin sınay bermeytin Qazaqstan men Qıtay üşin erekşe jağday. Qazaqstan Batıs elderi men Halıqaralıq wyımdar “Qıtay Şıñjañdağı millionğa juıq mwsılmandı, sonıñ işinde etnikalıq wyğırlar men qazaqtardı sayasi lager'lerge qamap jatqanı jaylı habarlağanda” qanday da bir mälimdeme jasamağan. Nwr-Swltan Pekinniñ Şıñjañdağı lager'ler sayasatına qatıstı äli künge naqtı wstanım da bildirmedi.

Azat Europa / Azattıq radiosı