پرەزيدەنت قاسىم-جومارت توقاەۆ ورىستار كوبىرەك شوعىرلانعان قازاقستاننىڭ سولتۇستىك وبلىستارىندا “قىرىم ستسەناريى قايتالانۋى مۇمكىن” دەپ بولجاۋعا نەگىز جوق دەپ سانايدى. رەسەيلىك “كومسومولسكايا پراۆدا” گازەتىنە بەرگەن سۇحباتىندا پرەزيدەنت وسىلاي دەگەن.

“پسەۆدوساراپشىلاردىڭ مۇنداي بولجامدارى ەشتەڭە نەگىزدەلمەگەن. مۇنداي جورامال قازاقستانداعى جاعدايدى تۇراقسىزداندىرۋعا جانە رەسەيمەن اراداعى تاتۋ قارىم-قاتىناستى بۇزۋعا باعىتتالعان. مۇنداي بولجامدى تەك بىلىكسىز ادامدار، بىرەۋگە جاعىنعىسى كەلگەن قاسكويلەر عانا ايتۋى مۇمكىن” دەدى توقاەۆ باسىلىم تىلشىسىنە.

پرەزيدەنت سونىمەن بىرگە قازاقستاندا ورىسشا ەلدى مەكەن اتتارىن قازاقشالاۋ جانە “سلاۆيان ۇلتى وكىلدەرىنىڭ مەملەكەتتىك ورگانعا ورنالاسۋ كەزىندە قيىندىقتارعا ۇشىرايتىنى” تۋرالى سۇراقتارعا جاۋاپ بەرگەن. “ەلدى مەكەن اتتارى جاپپاي وزگەرتىلىپ جاتقان جوق” دەگەن پرەزيدەنت بىرقاتار ەلدى مەكەندەردىڭ كونە اتتارى قايتارىلدى، “سوۆەت ءداۋىرىن ەسكە سالاتىن ۇندەسپەيتىن توپونيمدەر، جەرگىلىكتى تۇرعىندار اراسىندا تانىمال ەمەس” اتاۋلار الىنىپ جاتىر دەپ ايتقان.

“بيلىك ورىسشا اتاۋلاردان تولىق ارىلۋ ماقساتىن قويىپ وتىرعان جوق. جاقىندا قاراعاندىدا گريگوري پوتانين، الەكساندر زاتاەۆيچ كوشەلەرى پايدا بولدى. مەملەكەتتىك قىزمەتكە بارعىسى كەلەتىن ادامدارعا ديسكريميناتسيا جاسالادى دەگەن تۇجىرىممەن دە كەلىسپەيمىن. سلاۆيان جانە وزگە ەتنوس وكىلدەرى بارلىق ۇكىمەتتىك مەكەمەلەردە، پارلامەنتتە، ءماسليحاتتاردا بار. ورىستار شاعىن جانە ورتا بيزنەستىڭ دامۋىنا ەلەۋلى ۇلەس قوسىپ جاتىر. كونستيتۋتسيا بويىنشا، ورىس ءتىلى رەسمي ءتىل رەتىندە مەملەكەتتىك ورگانداردا قولدانىلادى” دەدى توقاەۆ.

پرەزيدەنت سۇحبات بارىسىندا سونىمەن بىرگە قازاقستاننىڭ رەسەي مەن بەلارۋس وداعىنا قوسىلۋ جوسپارى جوعىن دا ايتقان.

اشىق دەرەككوزىندەگى اقپارات بويىنشا، قازاقستاندا ورىس ۇلتى وكىلدەرى ەلدەگى حالىقتىڭ 18,8 (3 ميلليون 800 مىڭعا تارتا ادام) پايىزىن قۇرايدى. ەتنيكالىق ورىستاردىڭ ۇلەسى سولتۇستىك قازاقستان وبلىسىندا – 49, قوستاناي وبلىسىندا شامامەن 40 پايىزدى قۇرايدى.

ازات ەۋروپا / ازاتتىق راديوسى