1978 جىلى 2 ناۋرىزدا شۆەيتساريانىڭ كورسە-سيۋر-ۆەۆە اۋىلىنداعى زيراتتان اتاقتى كومەديا اكتەرى چارلي ءچاپليننىڭ دەنەسى جاتقان تابىتتى بەلگىسىز بىرەۋلەر ۇرلاپ كەتكەنى انىقتالادى. و زامان دا، بۇ زامان، تابىت ۇرلاۋ دەگەن نە ماسقارا! ەستىگەن جۇرتتا ەس قالماعان!

چاپلين 1977 جىلى 25 جەلتوقساندا 88 جاسىندا قايتىس بولدى. بىرنەشە ايدان كەيىن ونىڭ دەنەسى شۆەيتساريا زيراتىنان ۇرلانعانى جايلى اقپارات تاراعانى سول، ەستىگەن جۇرت جاعاسىن ۇستاپ، الاڭداۋمەن بولدى.

مۇنداي اتىشۋلى وقيعا الەمدى ءدۇر سىلكىردىرەدى. پوليتسەيلەر اياعىنان تىك تۇرىپ، كىنالىلەردى ىزدەۋ شارالارىنا جاپپاي جۇمىلدىرىلادى. ارينە، قىلمىسكەرلەردى ءىزىن سۋىتپاي قولعا تۇسىرە قويۋى نەعايبىل.

ءبىر كۇنى ءچاپليننىڭ جەسىرى ۋناعا بەلگىسىز بىرەۋ تەلەفون شالىپ، شامامەن 600 000 دوللار كولەمىندە تولەم تالاپ ەتەدى. پوليتسيا بۇل ىستەن حاباردار بولعان سوڭ، ۋنانىڭ تەلەفونىن ءجىتى قاداعالاپ، باقىلاۋمەن بولادى. وكرۋگتەگى جۇزدەگەن تەلەفون كابينالارىن تەكسەرىپ شىعادى. قوڭىراۋ شالۋشى بەلگىسىز بىرەۋلەر ەندى ونىڭ ەكى كىشى بالاسىنا قاۋىپ توندىرە باستاعان.

بەس اپتالىق تەرگەۋدەن كەيىن پوليتسيا ەكى اۆتوكولىك جۇرگىزۋشىسى – پولشادان رومان ۆارداس پەن بولگاريادان گانچو گانەۆانى (Gantscho Ganev) قاماۋعا الدى. بۇلار تابىتتى 17 مامىردا كورسەدەگى چاپلين وتباسىنىڭ ۇيىنەن شامامەن ءبىر ميل قاشىقتىقتا جاتقان دالاعا كومگەن بولىپ شىقتى. سول جىلدىڭ جەلتوقسان ايىندا ۆارداس پەن گانەۆ قابىردى توناپ، بوپسالاۋ ارەكەتى ءۇشىن جازاعا تارتىلدى. ەۋروپادان اۋىپ كەلگەن بۇل ساياسي بوسقىندار وزدەرىنىڭ قارجىلىق ماسەلەلەرىن وڭاي جولمەن شەشپەك بولىپ، اتاقتى اكتەردىڭ دەنەسىن ۇرلاپ كەتكەن.

قىلمىستىڭ ۇيىمداستىرۋشىسى رەتىندە تانىلعان ۆارداس ءتورت جارىم جىلدىق جازاعا كەسىلىپ، اۋىر ەڭبەككە جەگىلدى. گانەۆكە 18 اي شارتتى تۇردە جازاسىن وتەۋ مەرزىمى بەرىلدى.

چاپلين وتباسى وسى وقيعادان كەيىن ساقتىق شارالارىن ويلاستىرىپ، كەلەشەكتە تابىتتى ۇرلاۋدىڭ الدىن الۋ ءۇشىن بەتون قابىر جاساتىپ، اتاقتى اكتەر قايتا جەرلەنەدى.

قازاقشالاعان راۋشان.