احماد ماسۋد جەتەكشىلىك ەتەتىن ۇلتتىق قارسىلىق مايدانى (ۇقم) اقش-تا ءوز وكىلدىگىن تىركەدى. بۇل مايدان اۋعانستاندا بيلىكتى باسىپ العان “تاليبان” راديكال قوزعالىسىمەن كۇرەسىپ ءجۇر.

اقش-تا وكىلدىك تىركەلگەنى جونىندە 28 قازاندا ۇلتتىق قارسىلىق مايدانى سىرتقى بايلانىس ءبولىمىنىڭ باسشىسى ءالي مايسام نازاري حابارلادى. ونىڭ ايتۋىنشا، اقش-تاعى وكىلدىك – اۋعانستان ۇلتتىق قارسىلىق مايدانىنىڭ شەتەلدەگى العاشقى ميسسياسى.

ەندى ۇقم ءوز مۇددەسىن شەتەلدە رەسمي تۇردە قورعاپ، امەريكالىق ساياساتكەرلەردى اۋعان وپپوزيتسياسىنا كومەكتەسۋگە كوندىرۋگە تىرىسادى، دەيدى ءالي مايسام نازاري. قارسىلىق مايدانىنىڭ رەسمي وكىلىنىڭ ايتۋىنشا، اقش اسكەري-ساياسي ۇيىمدى تىركەۋگە رۇقسات بەرە بەرمەيدى.

ءالي مايسام نازاري ەكى كۇن بۇرىن الەۋمەتتىك جەلىدە ۇقم ساياسي قىزمەتىن دە جانداندىراتىنىن جازعان. جاقىندا ول اۋعانستانداعى جاعدايدى يتاليا پارلامەنتىنىڭ دەپۋتاتتارىمەن بىرگە تالقىلاعان. ءالي مايسام نازاري كەزدەسۋ تۇسىرىلگەن سۋرەتتەردى جەلىدە جاريالادى.

اۋعانستان ۇلتتىق قارسىلىق مايدانى، بيىل تامىزدا “تاليبان” كابۋلدى باسىپ العاننان كەيىن، پانجشەر پروۆينتسياسىندا قۇرىلدى. راديكال قوزعالىس بيلىگىن مويىنداۋدان باس تارتقان كۇشتەر احماد ماسۋد ماڭايىنا توپتاستى.

قازىر پانجشەردە نە بولىپ جاتقانى بەيمالىم. تالىپتەر پروۆينتسيادا ۇيالى بايلانىس پەن ينتەرنەتتى ءۇزىپ، شاتقالعا باراتىن جولداردىڭ بارىنە باقىلاۋ ورناتتى.

ەكى اپتا بۇرىن پانجشەردە ءبىر توپ ادامدى ءبىر قورىمعا كومگەنى تۋرالى مالىمەت تارادى. بىراق تالىپتەر “بەيبىت پانجشەرلىكتەردى قىرعان” دەگەن ايىپتى جوققا شىعارىپ وتىر.

ازات ەۋروپا / ازاتتىق راديوسى