اقش باسىم بولىگى رەسەيلىك اسكەريلەردەن قۇرالعان ۇقشق اسكەرىنىڭ قازاقستانعا كىرگەنىنە قاتىستى ساۋالدارى بار. بۇل تۋرالى اقش مەملەكەتتىك حاتشىسى ەنتوني بلينكەن ناتو ەلدەرى قورعانىس مينيسترلەرىنىڭ ونلاين جيىنىنان سوڭ مالىمدەدى.

بلينكەن قازاقستان بيلىگىنىڭ بەيبىت نارازىلاردىڭ قۇقىعىن بۇزباي، ءوز كۇشىمەن قوعامدىق ءتارتىپتى ورناتۋعا مۇمكىندىگى بار دەپ سانايدى.

“نەگە قازاقستانعا شەتتەن كومەك كەرەك بولعانى تۇسىنىكسىز، سەبەبىن جاقىن ۋاقىتتا بىلۋگە تىرىسامىز” دەدى ول.

اقش مەملەكەتتىك حاتشىسى “جاڭا تاريح كورسەتكەندەي، ورىستار ۇيلەرىڭىزگە كىرسە، كەيدە ولاردى شىعارۋ وتە قيىن بولادى” دەدى بلينكەن.

بۇعان دەيىن اقش قازاقستان بيلىگىن ماسەلەنى بەيبىت جولمەن شەشۋگە شاقىرعان ەدى.

قازاقستاندا بيلىككە قارسى نارازىلىق قاندى قاقتىعىسقا ۇلاسقان سوڭ قازاقستان پرەزيدەنتى توقاەۆ ۇقشۇ-دان كومەك سۇراعان. 1992 جىلى ماسكەۋدىڭ باستاماسىمەن قۇرىلعان ۇيىم وسىدان سوڭ قازاقستانعا اسكەر جىبەرگەن. ەلگە كەلگەن اسكەريلەردىڭ باسىم بولىگى – رەسەيدەن. بۇدان بولەك، ۇيىمعا مۇشە بەلارۋس، ارمەنيا جانە قىرعىزستان دا اسكەر جىبەردى.

توقاەۆ ەلگە شابۋىلدى “تەرروريستەر” جاسادى دەپ مالىمدەپ، كۇشتىك قۇرىلىمدارعا ەسكەرتۋسىز وق اتۋعا رۇقسات بەرگەن.

رەسەي قورعانىس مينيسترلىگى ۇقشۇ اسكەريلەرى “انتيتەررورلىق وپەراتسياعا قاتىسپايتىنىن”، نىسانداردى كۇزەتەتىنىن مالىمدەدى. رەسەي باسشىسى پۋتين قازاقستانداعى جاعدايعا قاتىستى رەسمي مالىمدەمە جاسامادى.

باتىستاعى جانە رەسەيدەگى كەيبىر ساراپشىلار پۋتين سوۆەت وداعىن قالپىنا كەلتىرۋدى تىرىسىپ جاتىر دەپ سانايدى. كرەمل مۇنداي جوسپاردىڭ جوعىن ايتىپ كەلەدى.