ۇجىمدىق قاۋىپسىزدىك تۋرالى شارت ۇيىمىنىڭ سەسسياسى ءبىر مينۋت ۇنسىزدىكتەن باستالدى، – دەپ حابارلايدى Tengrinews.kz تىلشىسى.

سەسسياعا قازاقستان، رەسەي، تاجىكستان، بەلارۋس پرەزيدەنتى، ارمەنيا پرەمەر-ءمينيسترى، قىرعىزستاننىڭ پرەزيدەنت اكىمشىلىگىنىڭ باسشىسى اقىلبەك جاپاروۆ جانە ۇقشۇ باس حاتشىسى ستانيسلاۆ زاس قاتىسىپ وتىر.

پرەزيدەنت قاسىم-جومارت توقاەۆ جاپپاي تارتىپسىزدىكتەرگە قاتىسقان سودىرلار جاسىرىنۋ ءۇشىن ساقالىن قىرىپ، كيىمىن اۋىستىرىپ العانىن ايتتى.

كەلتىرىلگەن بارلىق دەرەككە قاراماستان، كەيبىر دەرەككوزدەر قازاقستانداعى بيلىك بەيبىت شەرۋشىلەرگە قارسى كۇرەس جۇرگىزىپ جاتقانىن مالىمدەپ وتىر. بۇل – جالعان اقپارات. ءبىز ەشقاشان بەيبىت شەرۋشىلەرگە قارسى قارۋلى كۇشتەردى قولدانعان ەمەسپىز، قولدانبايمىز دا”، – دەدى  ۇقشۇ جيىنىندا سويلەگەن سوزىندە.

“تەرروريزمگە قارسى وپەراتسيا اياسىندا قىلمىستارعا قاتىسقان ادامدار انىقتالىپ جاتىر. بۇگىندە پوليتسياعا 8 مىڭنان اسا ادام جەتكىزىلدى. قۇقىق قورعاۋ جانە ارنايى ورگاندار ولاردىڭ تەرروريزمگە، ادام ءولتىرۋ، توناۋ جانە باسقا دا قىلمىستارعا قاتىسى بار-جوعىن انىقتاپ جاتىر.

جاسىرىن شابۋىلداۋشىلاردى انىقتاۋ ماقساتىندا جوسپار جاسالىپ جاتىر. ولار ەرەكشە تۇردە جاسىرىنادى – ازاماتتىق كيىم كيەدى، ساقالدارىن قىرادى. قارقىندى جۇمىس ىستەۋ قاجەت”، – دەدى توقاەۆ.

ونىڭ ايتۋىنشا، ءبىرىنشى كەزەكتە بەيبىت شەرۋلەر وتكەن.

“كەيىن الماتىدا ساياسي ميتينگتەر ءوتتى. سودان سوڭ قالاعا ءۇش باعىتتان قارۋلى كۇشتەر باسىپ كىردى. باسىندا وزدەرىن بەيبىت دەمونسترانتتار سەكىلدى ۇستاپ، تۇرعىنداردى ارانداتتى. كەيىن تاريحتا الماتى تراگەدياسى دەگەن اتپەن قالاتىن وقيعا باستالدى”، – دەدى مەملەكەت باسشىسى.

“تەرروريستەردىڭ قاتىسى بارىن سەنىممەن ايتا الامىن. ونىڭ ىشىندە قازاقستانعا قارسى شەتەل سودىرلارى بار. بۇلىكشىلەردىڭ تۇندە مايىتحاناعا شابۋىل جاساپ، قازا بولعان جاقتاستارىنىڭ ءمايىتىن الىپ كەتكەنى جاي ەمەس. سودىرلار دا سوعىس الاڭىنان جاقتاستارى ءمايىتىن الىپ كەتەدى. بۇل الەمدىك بەلگىلى تەرروريستىك توپتاردىڭ قولدانىسىنداعى تاجىريبە. ءدال وسىلاي ولار ءىزىن جاسىرادى. ءبىزدىڭ شەكارا اۋماعىندا بۇلىك جاساپ، بيلىكتى باسىپ الۋ ويى بولعانى ايقىن كورىنىپ تۇر”، – دەدى توقاەۆ ۇقشۇ جيىنىندا.

“جاقىن ارادا الدىن الا تەرگەۋ اياقتالعاننان كەيىن الەمدىك قاۋىمداستىق سوتىنا ەلىمىزگە قارسى تەرروريستىك شابۋىل دايىندالعانىن راستايتىن دالەلدەردى ۇسىنامىز. بۇۇ، ەىقۇ، جانە حالىقارالىق ۇيىمدار تەرروريستەر، قىلمىسكەرلەر، قاسكويلەر ارەكەتىن تولىق تەرگەۋگە مۇددەلى ەكەنىنە سەنىمدىمىن”، – دەدى توقاەۆ.

سونىمەن قاتىر، مەملەكەت باسشىسى ەرتە قورىتىندى جاساماۋدى سۇرادى. سونداي-اق، ول ءاۋ باستان قازاقستان تاريحىنداعى بۇل قيىن كەزەڭدى جەڭىپ شىعاتىنىنا سەنگەندەرگە العىس ءبىلدىردى.

– شىن مانىندە، ۇقشۇ-عا مۇشە مەملەكەتتەردىڭ ءبىرىنىڭ قاۋىپسىزدىگىن، تۇراقتىلىعى مەن تۇتاستىعىن قامتاماسىز ەتۋ ءۇشىن ۇيىمنىڭ بىتىمگەرلىك كۇشتەرىنىڭ اۋقىمدى تۇردە جۇمىلدىرىلۋ جاعدايى ءبىرىنشى رەت بولىپ وتىر. ءبىز ءۇشىن ۇقشۇ بويىنشا ارىپتەستەرىمىزدىڭ اسكەري عانا ەمەس، مورالدىق قولداۋ كورسەتۋى دە اسا ماڭىزدى. ۇيىمعا مۇشە مەملەكەتتەردىڭ ءبارى ءبىرتۇتاس مايدان بولىپ، قازاقستاننىڭ ۇندەۋىن ءبىراۋىزدان قولدادى، – دەدى قاسىم-جومارت توقاەۆ.