قازاقستان ۋكراينانىڭ بۋچا قالاسىنا ورناتىلعان كيىز ۇيدەن ەشقانداي ماسەلە كورىپ تۇرعان جوق جانە رەسەي بيلىگىنە وعان قاتىستى رەسمي تۇسىنىكتەمە بەرمەيدى. 11 قاڭتاردا ازاتتىق ءتىلشىسىنىڭ سۇراعىنا جاۋاپ بەرگەن قازاقستان سىرتقى ىستەر مينيسترلىگىنىڭ رەسمي وكىلى ايبەك سمادياروۆ وسىلاي دەپ مالىمدەدى.

“كيىز ءۇي قويىلدى. بۇدان قانداي پروبلەما تۋىندادى؟ قويىلدى. كومەك كورسەتىلدى. بۇل جەكە قازاقستاندىق كومپانيالاردىڭ باستاماسى. وزدەرى جيناپ، وزدەرى اپارىپ، وزدەرى كومەكتەسىپ جاتىر” دەدى ايبەك سمادياروۆ.

ونىڭ ايتۋىنشا، قازاقستان جاعى كيىز ۇيگە قاتىستى ارنايى كوممەنتاري بەرۋدى حوش كورمەيدى. قازاقستاندا 300 مىڭعا جۋىق ۋكراين بارىن، ۋكراينادا دا قازاق دياسپوراسى بارىن ەسكە سالعان مينيسترلىكتىڭ رەسمي وكىلى “ارينە، ۋكراينادا جاعداي قيىن. سوندىقتان بۇل اقپارات مۇمكىن باسقاشا كورىنىپ جاتقان شىعار. بىراق ءبىز ودان ەشقانداي ماسەلە كورىپ تۇرعان جوقپىز” دەدى.

قاڭتار باسىندا ۋكراينانىڭ كيەۆ وبلىسىندا رەسەي باسقىنشىلىعىنان قاتتى زارداپ شەككەن اۋماقتاردىڭ ءبىرى بۋچادا “نەزلامنوستى” ياعني، “مىزعىماستىق” پۋنكتى اشىلعان ەدى. قازاق ءۇي ىشىنە ورنالاسقان پۋنكت تۇرعىندارعا قىس كەزىندە جارىق پەن جىلۋ بولماعان شاقتا تۇرعىندار كەلىپ، جىلىنىپ، تەلەفوندارىن قۋاتتاپ الۋ ءۇشىن اشىلعان.

بۇعان دەيىن قازاق ءۇيدى قازاقستاندىق كاسىپكەرلەر مەن ۋكرايناداعى قازاق دياسپوراسى وكىلدەرىنىڭ تىككەنى حابارلانعان.

ءبىر كۇن بۇرىن رەسەي ءسىم رەسمي وكىلى ماريا زاحاروۆا قازاقستاندى بۋچاداعى قازاق ۇيگە بايلانىستى تۇسىنىكتەمە بەرۋگە ۇندەگەن ەدى. زاحاروۆانىڭ ايتۋىنشا، قازاقستاننىڭ رەسمي وكىلدەرى قازاق ۇيگە قاتىسى جوعىن ايتقان. بىراق “رەسەي-قازاقستان وداقتاستىعىنا نۇقسان كەلمەس ءۇشىن” رەسمي استانانىڭ وعان تۇسىنىكتەمە بەرگەنى ابزال دەگەن ەدى زاحاروۆا.

11 قاڭتاردا ازاتتىق ءتىلشىسى قازاقستاننىڭ رەسمي وكىلدەرىنەن زاحاروۆاعا “كيىز ءۇي” جايلى كىم “تۇسىنىكتەمە بەردى” دەگەن سۇراققا سمادياروۆ “بىلمەيمىز” دەپ جاۋاپ بەردى.

ازاتتىق