Qazaqstan Ukrainanıñ Buça qalasına ornatılğan kiiz üyden eşqanday mäsele körip twrğan joq jäne Resey biligine oğan qatıstı resmi tüsinikteme bermeydi. 11 qañtarda Azattıq tilşisiniñ swrağına jauap bergen Qazaqstan sırtqı ister ministrliginiñ resmi ökili Aybek Smadiyarov osılay dep mälimdedi.

“Kiiz üy qoyıldı. Bwdan qanday problema tuındadı? Qoyıldı. Kömek körsetildi. Bwl jeke qazaqstandıq kompaniyalardıñ bastaması. Özderi jinap, özderi aparıp, özderi kömektesip jatır” dedi Aybek Smadiyarov.

Onıñ aytuınşa, Qazaqstan jağı kiiz üyge qatıstı arnayı kommentariy berudi hoş körmeydi. Qazaqstanda 300 mıñğa juıq ukrain barın, Ukrainada da qazaq diasporası barın eske salğan ministrliktiñ resmi ökili “ärine, Ukrainada jağday qiın. Sondıqtan bwl aqparat mümkin basqaşa körinip jatqan şığar. Biraq biz odan eşqanday mäsele körip twrğan joqpız” dedi.

Qañtar basında Ukrainanıñ Kiev oblısında Resey basqınşılığınan qattı zardap şekken aumaqtardıñ biri Buçada “Nezlamnosti” yağni, “mızğımastıq” punkti aşılğan edi. Qazaq üy işine ornalasqan punkt twrğındarğa qıs kezinde jarıq pen jılu bolmağan şaqta twrğındar kelip, jılınıp, telefondarın quattap alu üşin aşılğan.

Bwğan deyin qazaq üydi qazaqstandıq käsipkerler men Ukrainadağı qazaq diasporası ökilderiniñ tikkeni habarlanğan.

Bir kün bwrın Resey SİM resmi ökili Mariya Zaharova Qazaqstandı Buçadağı qazaq üyge baylanıstı tüsinikteme beruge ündegen edi. Zaharovanıñ aytuınşa, Qazaqstannıñ resmi ökilderi qazaq üyge qatısı joğın aytqan. Biraq “Resey-Qazaqstan odaqtastığına nwqsan kelmes üşin” resmi Astananıñ oğan tüsinikteme bergeni abzal degen edi Zaharova.

11 qañtarda Azattıq tilşisi Qazaqstannıñ resmi ökilderinen Zaharovağa “kiiz üy” jaylı kim “tüsinikteme berdi” degen swraqqa Smadiyarov “bilmeymiz” dep jauap berdi.

Azattıq