2023 جىلى 10 قاڭتاردا الماتى ۋاقىتىمەن تاڭعى ءتورت شاماسىندا ۇلىبريتانياداعى كورنۋولل كوسموپورتىنان امەريكالىق Virgin Orbit كومپانياسىنىڭ “Cosmic Girl” دەگەن اتقا يە Boeing-747 ۇشاعى كوتەرىلدى. ساعات 05:11-دە، 10,7 كم بيىكتىكتە ۇشاقتىڭ سول قاناتىنىڭ استىنا ورناتىلعان LauncherOne زىمىرانى ىسكە قوسىلدى. ول 500 كم تومەن جەرماڭى وربيتاعا 9 شاعىن جەرسەرىكتى شىعارۋى ءتيىس ەدى. الايدا 2-ساتى جۇمىسى بارىسىنداعى “انوماليا” كەسىرىنەن زىمىران وربيتاعا شىعا المادى. ونىمەن بىرگە پايدالى جۇكتەمە دە اتلانت مۇحيتىنا قۇلادى.

Virgin Orbit كومپانياسىن قۇرعان بريتان ميللياردەرى ريچارد برەنسون ءوز مەنشىگىندەگى ەسكى جولاۋشى ۇشاعىنىڭ ءبىرىن زىمىران ۇشىرۋعا قايتا جابدىقتاعان ەدى. “Cosmic Girl” بەس رەت كاليفورنيا شتاتىنداعى موحاۆە كوسموپورتىنان كوتەرىلىپ، زىمىران ۇشىرعان. 2020 ج. 25 مامىرداعى العاشقى ارەكەت ءساتسىز بولسا، كەلەسى ءتورت LauncherOne وربيتاعا 33 جەرسەرىك شىعاردى. بىلتىر كومپانيا كورنۋوللداعى نيۋكي اۋەجايىندا ەكىنشى ۇشۋدى باسقارۋ ورتالىعىن سالدى.

وسىلايشا تاريحتا العاش رەت ۇلىبريتانيا جەرىنەن وربيتاعا زىمىران شىعارۋ ارەكەتى ءساتسىز اياقتالدى. دەگەنمەن بريتانيا عارىش دەرجاۆالارى تىزىمىنە وسى جىلى-اق ەنەتىن شىعار. بۇل ماقساتتا، Virgin Orbit-تەن باسقا، شوتلانديالىق Skyrora جانە Orbex كومپانيالارى جۇمىستانىپ جاتىر. شەتلاند ارالدارىنىڭ ءبىرى مەن ساتەرلەند وكرۋگىندەگى عارىش ايلاقتارى سالىنىپ تا قويدى. العاشقى ۇشىرىلىمدار 2023 جىلدىڭ اياعىنا جوسپارلانعان.

قازىرگى كۇنى وربيتالىق زىمىران ۇشىراتىن عارىش ايلاقتارى اقش، قىتاي، رەسەي، قازاقستان، فرانتسۋز گۆياناسى، جاپونيا، ءۇندىستان، يران، وڭتۇستىك كورەيا، يزرايل، سولتۇستىك كورەيا، جاڭا زەلانديا اۋماعىندا ورنالاسقان. الداعى بىرنەشە جىلدا بۇل قاتارعا ۇلىبريتانيادان باسقا برازيليا، ارگەنتينا، مەكسيكا، پاكستان، يندونەزيا، مالايزيا، فيليپپين، يسپانيا، تۇركيا، نورۆەگيا، رۋمىنيا، اۋستراليا، وڭتۇستىك افريكا رەسپۋبليكاسى، الجير قوسىلۋى مۇمكىن.

فيزيكا جانە عارىش