ۋكراينانىڭ دونەتسك وبلىسىنداعى شاعىن سولەدار قالاسى ءۇشىن كەسكىلەسكەن شايقاس ءجۇرىپ جاتىر. رەسەيدىڭ جالدامالىلاردان قۇرالعان “ۆاگنەر” اسكەري توبى قالانى تولىق باقىلاۋعا الدىق دەپ مالىمدەسە، ۋكراينا مۇنى جوققا شىعارادى. سولەدارداعى شايقاستىڭ جاي-جاپسارى.
پريگوجين مەن سەپاراتيستەر نە دەيدى؟
“رەسەيدىڭ “ۆاگنەر” توبى بىرنەشە اپتاعا سوزىلعان شايقاستان سوڭ ۋكراينانىڭ دونەتسك وبلىسىنداعى سولەداردىڭ باسىم بولىگىن باقىلاۋعا الدى” دەپ مالىمدەدى ۇلىبريتانيا قورعانىس مينيسترلىگى سوعىس جايلى حابارلاماسىندا. سولەدار – باحمۋتتان ون شاقىرىمدا ورنالاسقان شاحتالى قالا. ال رەسەي اسكەرى بىرنەشە ايدان بەرى باحمۋت قالاسىن الۋعا تىرىسىپ جاتىر.
سولەداردىڭ ورتالىعىنا رەسەيلىك اسكەريلەر كىرگەنىن رەسەيدىڭ تەلەگرام كانالدارى دا جازىپ جاتىر. ال 10 قاڭتار كەشكىسىن سەپاراتيستىك “دحر” ايماعىنىڭ كرەمل تاعايىنداعان باسشىسى دەنيس پۋشيلين دە سولەدار ورتالىعى رەسەيلىك اسكەردىڭ باقىلاۋىندا ەكەنىن ايتتى.
“قارسىلاس تاراپ سولداتتارى مەن تەحنيكالارىنان ايىرىلسا دا، قارسىلاسۋدى توقتاتقان جوق” دەدى پۋشيلين.
ال “ۆاگنەر” توبىنىڭ يەسى، رەسەي پرەزيدەنتى ءپۋتيننىڭ “اسپازى” رەتىندە تانىلعان ەۆگەني پريگوجين “قالا ورتالىعىندا شايقاس جالعاسىپ جاتسا دا سولەداردىڭ بارلىق اۋماعىن باقىلاۋعا الدىق” دەپ مالىمدەدى.
ۋكراينا تارابى نە دەيدى؟
ۋكراينا پرەزيدەنتىنىڭ كەڭەسشىسى الەكسەي ارەستوۆيچ رەسەي سولەدار قالاسىنىڭ “جارتى بولىگىن باقىلاۋعا” العانىن ايتادى. ونىڭ سوزىنشە، رەسەي اسكەريلەرى قالانىڭ شىعىسىن، ۋكراينا اسكەريلەرى باتىس پەن سولتۇستىگىن باقىلاۋدا ۇستاپ تۇر.
ال ۋكراينا قورعانىس مينيسترلىگى رەسەي كوپ اسكەري شىعىنعا قاراماستان قالاعا شابۋىلدى جالعاستىرىپ جاتىر، ال ۋكراينالىق اسكەريلەر قورعانىستى ۇستاپ تۇر دەپ مالىمدەدى.
سولەدار قالاسىن قورعاپ تۇرعان ۋكراينالىق 46-اەروموبيلدى بريگاداسىنىڭ سولداتى امەريكالىق CNN تەلەارناسىنا “جاعداي قيىن”، “قازا تاپقاندار كوپتىگى سونشا ولاردى ەشكىم ساناپ جاتقان جوق” دەگەن.
ۋكراينا پرەزيدەنتى ۆلاديمير زەلەنسكي 9 قاڭتارداعى مالىمدەمەسىندە رەسەيدىڭ سولەدارداعى ارەكەتىن “اقىلدان اداسقاندىق” دەپ، قالانى “رەسەيدىڭ قاتىگەز شابۋىلىنان قورعاپ تۇرعان” اسكەريلەرگە العىس ايتتى.
“بۇل – وتە اۋىر جاعداي. سولەداردا بارلىق عيمارات قيرادى. ءبىزدىڭ اسكەريلەرىمىزدىڭ سولەدارداعى ەرلىگىنىڭ ارقاسىندا ۋكراينا ءۇشىن ۋاقىت ۇتتىق، كۇش جينادىق” دەدى زەلەنسكي.
امەريكالىق سوعىستى زەرتتەۋ ينستيتۋتى (ISW) رەسەي اسكەريلەرى سولەداردى ءالى تولىق باقىلاۋعا العان جوق دەپ سانايدى.
“ساراپشىلارىمىز سولەدار ورتالىعىندا “ۆاگنەر” توبىنىڭ ادامدارى جۇرگەنىن بايقاعان. بىراق قالانىڭ قاي بولىگى كىمنىڭ باقىلاۋىندا ەكەنىن ايتۋ قيىن، سەبەبى كوشەدەگى اتىس كەزىندە جاعداي بىردەن وزگەرىپ كەتۋى مۇمكىن. رەسەيلىكتەر سولەداردى العاننىڭ وزىندە بۇل باحمۋت قالاسىن تەز ارادا قورشاۋعا الۋعا مۇمكىندىك بەرمەيدى” دەيدى ISW.
دونەتسك وبلىسى اسكەري اكىمشىلىگىنىڭ باسشىسى پاۆەل كيريلەنكو سولەداردا 523 ادام قالعانىن، كوبى 50 جاستان اسقان ەگدە ادامدار ەكەنىن ايتادى.
“سولەداردا قالعان ادامداردىڭ كەيبىرى قالادان كەتكىسى كەلەدى، بىراق كەسكىلەسكەن شايقاستىڭ كەسىرىنەن ولاردى شىعارۋ مۇمكىن بولماي تۇر” دەدى ول.
بۇل قالادا سوعىسقا دەيىن 10 مىڭداي ادام تۇرعان ەدى. ساراپشىلار ۋكراينا بۇل قالانى جوعالتسا باحمۋتتى قورعاۋدا قيىندىققا تاپ بولۋى مۇمكىن دەپ سانايدى.
پىكىر قالدىرۋ