Ukrainanıñ Doneck oblısındağı şağın Soledar qalası üşin keskilesken şayqas jürip jatır. Reseydiñ jaldamalılardan qwralğan “Vagner” äskeri tobı qalanı tolıq baqılauğa aldıq dep mälimdese, Ukraina mwnı joqqa şığaradı. Soledardağı şayqastıñ jay-japsarı.

PRIGOJIN MEN SEPARATISTER NE DEYDİ?

“Reseydiñ “Vagner” tobı birneşe aptağa sozılğan şayqastan soñ Ukrainanıñ Doneck oblısındağı Soledardıñ basım böligin baqılauğa aldı” dep mälimdedi Wlıbritaniya qorğanıs ministrligi soğıs jaylı habarlamasında. Soledar – Bahmuttan on şaqırımda ornalasqan şahtalı qala. Al Resey äskeri birneşe aydan beri Bahmut qalasın aluğa tırısıp jatır.

Soledardıñ ortalığına reseylik äskeriler kirgenin Reseydiñ telegram kanaldarı da jazıp jatır. Al 10 qañtar keşkisin separatistik “DHR” aymağınıñ Kreml' tağayındağan basşısı Denis Puşilin de Soledar ortalığı reseylik äskerdiñ baqılauında ekenin ayttı.

“Qarsılas tarap soldattarı men tehnikalarınan ayırılsa da, qarsılasudı toqtatqan joq” dedi Puşilin.

Al “Vagner” tobınıñ iesi, Resey prezidenti Putinniñ “aspazı” retinde tanılğan Evgeniy Prigojin “qala ortalığında şayqas jalğasıp jatsa da Soledardıñ barlıq aumağın baqılauğa aldıq” dep mälimdedi.

UKRAINA TARABI NE DEYDİ?

Ukraina prezidentiniñ keñesşisi Aleksey Arestoviç Resey Soledar qalasınıñ “jartı böligin baqılauğa” alğanın aytadı. Onıñ sözinşe, Resey äskerileri qalanıñ şığısın, Ukraina äskerileri batıs pen soltüstigin baqılauda wstap twr.

Al Ukraina qorğanıs ministrligi Resey köp äskeri şığınğa qaramastan qalağa şabuıldı jalğastırıp jatır, al ukrainalıq äskeriler qorğanıstı wstap twr dep mälimdedi.

Soledar qalasın qorğap twrğan ukrainalıq 46-aeromobil'di brigadasınıñ soldatı amerikalıq CNN telearnasına “jağday qiın”, “qaza tapqandar köptigi sonşa olardı eşkim sanap jatqan joq” degen.

Ukraina prezidenti Vladimir Zelenskiy 9 qañtardağı mälimdemesinde Reseydiñ Soledardağı äreketin “aqıldan adasqandıq” dep, qalanı “Reseydiñ qatıgez şabuılınan qorğap twrğan” äskerilerge alğıs ayttı.

“Bwl – öte auır jağday. Soledarda barlıq ğimarat qiradı. Bizdiñ äskerilerimizdiñ Soledardağı erliginiñ arqasında Ukraina üşin uaqıt wttıq, küş jinadıq” dedi Zelenskiy.

Amerikalıq soğıstı zertteu institutı (ISW) Resey äskerileri Soledardı äli tolıq baqılauğa alğan joq dep sanaydı.

“Sarapşılarımız Soledar ortalığında “Vagner” tobınıñ adamdarı jürgenin bayqağan. Biraq qalanıñ qay böligi kimniñ baqılauında ekenin aytu qiın, sebebi köşedegi atıs kezinde jağday birden özgerip ketui mümkin. Reseylikter Soledardı alğannıñ özinde bwl Bahmut qalasın tez arada qorşauğa aluğa mümkindik bermeydi” deydi ISW.

Doneck oblısı äskeri äkimşiliginiñ basşısı Pavel Kirilenko Soledarda 523 adam qalğanın, köbi 50 jastan asqan egde adamdar ekenin aytadı.

“Soledarda qalğan adamdardıñ keybiri qaladan ketkisi keledi, biraq keskilesken şayqastıñ kesirinen olardı şığaru mümkin bolmay twr” dedi ol.

Bwl qalada soğısqa deyin 10 mıñday adam twrğan edi. Sarapşılar Ukraina bwl qalanı joğaltsa Bahmuttı qorğauda qiındıqqa tap boluı mümkin dep sanaydı.