اقش ۋكرايناعا قۇنى 2 ملرد دوللار بولاتىن جاڭا اسكەري كومەك پاكەتىن بەرۋگە دايىندالىپ جاتىر. كومەك پاكەتىنە 150 شاقىرىمعا دەيىن ۇشاتىن راكەتالار العاش رەت ەنگىزىلىپ وتىر دەپ جازدى اق ۇيدەگى ەكى دەرەككوزگە سۇيەنگەن Reuters باسىلىمى.

اڭگىمە جوعارى دالدىكتى GLSDB (Ground Launched Small Diameter Bomb) راكەتاسى جونىندە بولىپ وتىر. قازىر ۋكرايناعا جەتكىزىلىپ جاتقان راكەتالار 80 شاقىرىمعا دەيىن ۇشا الادى.

Reuters بىلتىر قاراشادا Boeing كومپانياسى ءوزى وندىرەتىن GLSDB قارۋىن ۋكرايناعا بەرۋدى ۇسىنعانىن حابارلاعان.

جۇيە راكەتاقوزعالتقىشى بار شاعىن ديامەترلى بومبادان قۇرالعان. وزدىگىنەن دالدەي الاتىن راكەتانى HIMARS قوندىرعىسىنان دا ۇشىرۋعا بولادى. ول ءجۇرىپ بارا جاتقان نىسانانى ونداعان شاقىرىم جەردەن اتىپ تۇسىرە الادى.

جۇيە سيپاتتاماسىندا ونى عالامدىق GPS ناۆيگاتسيا جۇيەسىمەن باسقارۋعا بولاتىنى جازىلعان. ونى كەز كەلگەن اۋا رايىندا ىسكە قوسۋعا بولادى دەپ ايتىلادى.

GBU-39 وقتۇمسىعىنىڭ جينالا الاتىن شاعىن قاناتتارى بار. بۇل وعان 100 شاقىرىمنان اساتىن قاشىقتىقتاعى نىسانانى كوزدەۋگە مۇمكىندىك بەرەدى.

ۆاشينگتون كيەۆتىڭ 300 شاقىرىمعا دەيىن ۇشاتىن راكەتالاردى بەرۋ تۋرالى ۇسىنىسىن ورىنداماعان. اق ءۇي ۋكراين اسكەرى ولاردى رەسەي اۋماعىنا سوققى جاساۋعا قولدانىپ، سوعىس ۋشىعىپ كەتە مە دەپ قاۋىپتەنەدى.

بۇعان دەيىن ۋكراينا پرەزيدەنتى كەڭسەسىنىڭ كەڭەسشىسى ميحايل پودولياك كيەۆ ماسكەۋ اننەكسيالاپ العان قىرىمداعى نىساندارعا شابۋىل جاساۋعا مۇمكىندىك بەرەتىن راكەتالاردى جەتكىزۋ جونىندە كەلىسسوز جۇرگىزىپ جاتقانىن ايتقان.

اقپاراتقا قاراعاندا، اقش-تىڭ جاڭا اسكەري پاكەتىندە Patriot پەن Javelin-گە قاجەت قوسىمشا جابدىقتاردى بەرۋ دە قاراستىرىلعان.

Reuters-ءتىڭ جازۋىنشا، بۇل كومەككە قاتىستى رەسمي مالىمدەمە وسى اپتادا جاسالادى.

اق ءۇي ازىرشە تۇسىنىكتەمە بەرۋدەن باس تارتتى.

اقش، ەۋروپا ەلدەرى، جاپونيا جانە اۆستراليا ۋكرايناعا ونداعان ميلليارد دوللار كولەمىندە كومەك بەرگەن. كومەك بەرۋ جاعىنان ءبىرىنشى ورىندا – اقش، ودان كەيىن ۇلىبريتانيا، گەرمانيا، كانادا جانە پولشا تۇر.

ازات ەۋروپا / ازاتتىق راديوسى