اقش-تىڭ ماسكەۋدەگى ەلشىسى رەسەيدە جۇرگەن اقش ازاماتتارىنا تەز ارادا رەسەيدەن كەتىپ قالۋعا شاقىردى. اقپارات ەلشىلىك سايتىنا جاريالانعان.
وعان سەبەپ رەتىندە “رەسەي اسكەرىنىڭ ۋكرايناعا جاپپاي باسىپ كىرۋىنىڭ بولجاپ بولمايتىن سالدارىن، رەسەي قۇقىق قورعاۋ ورگاندارىنىڭ اقش ازاماتتارىن قۋدالاۋ مۇمكىندىگىن، رەسەيمەن اراداعى ترانسپورت بايلانىسىنىڭ قيىنداعانىن، رەسەيدەگى اقش ەلشىگىنىڭ امەريكا ازاماتتارىنا كومەك بەرۋ مۇمكىندىگىنىڭ شەكتەلگەنىن جانە تەررور قاۋپىن” اتاعان. اقش ازاماتتارىنا رەسەيگە كەلمەي-اق قويۋدى ۇسىنعان.
ەلشىلىك حابارىندا، بىلتىر قىركۇيەك ايىندا موبيليزاتسيا جاريالاعان رەسەي قوس ازاماتتىعى، ياعني اقش پەن رەسەي ازاماتتىعى بار ادامداردى اسكەرگە الۋى مۇمكىن ەكەنى ايتىلعان.
حاباردا حالىقارالىق قاىپسىزدىك نورمالارىن ساقتامايتىن رەسەي اۋە جەلىلەرىمەن ساياحاتتاۋدىڭ قاۋىپتى بولىپ بارا جاتقانىن دا ءسوز بولعان. ونىڭ ىشىندە اقش ەلشىلىگىنىڭ قىزمەتكەرلەرىنە رەسەي اۋە كومپانيالارىمەن ۇشۋعا رۇقسات بەرىلمەيتىنى اتاپ كورسەتىلگەن.
بىلتىر اقش ەلشىلىگى امەريكالىقتاردى رەسەيدەن دەرەۋ كەتۋگە ەكى رەت شاقىرعان ەدى. العاشقىدا 28 اقپاندا، ياعني رەسەي اسكەرى ۋكراينا جەرىنە باسىپ كىرگەن سوڭ، ەكىنشىسى – 28 قىركۇيەكتە، ياعني رەسەي اسكەرىنە موبيليزاتسيا جاريالاعان سوڭ ۇندەۋ تاستاعان.
رەسەي بيلىگى اسكەرگە شاقىرۋ اياقتالدى دەسە دە، موبيليزاتسيا تۋرالى تۋرالى جارلىقتىڭ كۇشى جويىلعان جوق، ول كەز كەلگەن ساتتە قايتا جالعاسۋى مۇمكىن. اقش ەلشىلىگىنىڭ حابارى “رەسەي اسكەرى ۋكراينادا جاڭا شابۋىل باستاۋى مۇمكىن” دەگەن اقپاراتتار كوبەيگەن تۇستا جاريالانىپ وتىر. ۋكراينا بارلاۋى سوعىس باستالعان كۇننىڭ ءبىر جىلدىعى – 24 اقپاندا رەسەي جاڭا شابۋىل باستاۋى مۇمكىن دەپ سانايدى.
دۇيسەنبىدە رەسەي سىرتقى بارلاۋ قىزمەتىنىڭ باسشىسى سەرگەي نارىشكين رەسەي مەن تمد ەلدەرىندە تەراكت جاساۋ ءۇشىن تاياۋ شىعىستان “جيھادشىل سودىرلار توبىن ازىرلەپ جاتىر” دەپ اقش-تى ايىپتاعان. ۆاشينگتون بۇعان تۇسىنىكتەمە بەرگەن جوق.
ازات ەۋروپا / ازاتتىق راديوسى
پىكىر قالدىرۋ