ناتو باس حاتشىسى يەنس ستولتەنبەرگ “ناستوياششەە ۆرەميا” تەلەارناسىنا بەرگەن سۇحباتىندا “ۋكرايناعا قولداۋ كورسەتۋ ءۇشىن قارۋ جاساۋدى كوبەيتپەككە جۇمىس ىستەپ جاتىرمىز” دەپ مالىمدەدى.
“سەبەبى بۇلاي جاساعان وتە ماڭىزدى. پۋتين جەڭسە، ۋكراينا ءۇشىن تراگەديا بولماق. پۋتين جەڭسە، ناتو ءۇشىن دە قاۋىپتى. سوندىقتان وداقتاستارىما ايتارىم: قاۋىپسىزدىگىمىز ءۇشىن ۋكراينانى قولداۋىمىز كەرەك. ءبىز پرەزيدەنت پۋتينگە ۋكراينا جەڭىلمەيتىنىن كورسەتۋىمىز قاجەت” دەدى ول سۇحباتىندا.
ازاتتىق “ناستوياششەە ۆرەميانىڭ” يەنس ستولتەنبەرگتەن العان سۇحباتىن ىقشامداپ ۇسىنادى.
– قازىر مايدان شەبىندەگى، سونىڭ ىشىندە باحمۋت پەن اۆدەەۆكاداعى جاعدايدى قالاي باعالايسىز؟ بۇل شايقاس رەسەي مەن ۋكراينا اسكەرىنە قالاي اسەر ەتەدى؟
– الدىمەن ۋكراينا اسكەرىنىڭ كاسىبيلىگى، ەرلىگى جانە شەشىم قابىلداۋداعى مىقتىلىعى تاڭعالدىرعانىن ايتا كەتكىم كەلەدى. ولار بۇكىل الەمدى تاڭعالدىردى. ال رەسەي اسكەرىنىڭ رۋحى، دايىندىعى ءالسىز ەكەنىن، تەحنيكاسى ەسكى ەكەنىن كوردىك. رەسەيدىڭ اسكەري باسشىلىعى كوپتەگەن وپەراتسيادا ءوزىن كورسەتە المادى.
ءبىر جاعىنان، رەسەي اسكەرى ساپا جەتپەگەن سوڭ، سانمەن الۋعا تىرىسىپ جاتىر. سوندىقتان ولار ناشار ماشىقتانعان مىڭداعان ادامدى مايدانعا جىبەرگەنىن كوردىك. بۇل ۋكراينا اسكەرىنە دە شىعىن كەلتىرۋى مۇمكىن. ۋكراينامەن سالىستىرعاندا رەسەي ساپالى قارۋ مەن ءتيىمدى باسقارۋ بولماعاندىقتان كوپ سولداتىنان ايىرىلىپ جاتىر.
بىراق ءبىز رەسەيدى نازاردان تىس قالدىرماۋىمىز كەرەك، سەبەبى ولار مىڭداعان ادامدى مايدانعا جىبەرۋگە دايىن ەكەنىن كورسەتتى. دەمەك، ۋكراينانى قولداپ، ۋكرايناعا جەرىن بوساتۋعا كومەكتەسىپ، رەسەي باسقىنشىلىعىنا تويتارىس بەرۋىمىز كەرەك.
وكوپتاعى ءومىر، ءولىم جانە اتىس. ۋكراينانىڭ باحمۋت ءۇشىن شايقاسى
– ۋكراينا كوكتەمدە قارىمتا شابۋىلعا شىعۋدى جوسپارلاپ وتىر. بۇدان قانداي ناتيجە بولۋى مۇمكىن؟ ۋكراينا اسكەرى قارىمتا شابۋىل باستاۋعا قاۋقارلى ما، قارۋ-جاراعى جەتە مە؟
– سوعىستا بولجام جاساۋ قيىن. مەنىڭشە، ەشكىم سوعىس قاشان اياقتالاتىنىن، بيىل قالاي بولاتىنىن ءدوپ باسىپ ايتا المايدى.
جاڭا قارىمتا شابۋىل باستاۋ تۋرالى شەشىمدى جاعدايدى جاقسى بىلەتىن ۋكراينالىقتار قابىلداۋعا ءتيىس. ناتو-نىڭ جاۋاپكەرشىلىگى – ۋكرايناعا قارىمتا شابۋىل باستاۋعا قاجەت قارۋ-جاراق بەرۋ، قولداۋ كورسەتۋ جانە اسكەريلەرگە جاڭا قارۋدى قولدانۋدى ۇيرەتۋ.
سونداي-اق ۋكراينا كەلىسسوزدە قانداي شارتتاردى قابىلدايتىنىن ءوزى شەشەدى. مايدانداعى شايقاستىڭ ناتيجەسى دە كەلىسسوز ۇستەلىندە كورىنەدى. سوندىقتان ۋكراينا ەرتەڭ تاۋەلسىز ەل رەتىندە كەلىسسوزدە دە دىتتەگەنىنە جەتسىن دەسەك، بۇگىن اسكەري كومەك بەرۋىمىز قاجەت.
– ۋكراينا اسكەري جولمەن قىرىمدى ازات ەتە الا ما؟ ۋكراينا قىرىمدى قايتارامىز دەپ شەشسە، ناتو قولداي ما؟
– ءبىز ۋكرايناعا قانشا قولداۋ كەرەك بولسا، سونشا قولداۋ كورسەتەمىز دەپ مالىمدەدىك. ۋكراينانىڭ ءوز جەرىن، اۋماعىن قورعاۋ قۇقىعىن قولدايمىز. بۇل قۇقىق بۇۇ قارارىندا بەكىتىلگەن. قازىر كورىپ وتىرعانىمىز – ۋكرايناعا قارسى باسقىنشىلىق سوعىسى، سوندىقتان ۋكراينا ءوز جەرىن قورعايمىن دەسە، قولدايمىز. قاجەت قولداۋدى كورسەتە بەرەمىز.
ازات ەۋروپا / ازاتتىق راديوسى
پىكىر قالدىرۋ