NATO bas hatşısı Yens Stoltenberg “Nastoyaşee vremya” telearnasına bergen swhbatında “Ukrainağa qoldau körsetu üşin qaru jasaudı köbeytpekke jwmıs istep jatırmız” dep mälimdedi.

“Sebebi bwlay jasağan öte mañızdı. Putin jeñse, Ukraina üşin tragediya bolmaq. Putin jeñse, NATO üşin de qauipti. Sondıqtan odaqtastarıma aytarım: qauipsizdigimiz üşin Ukrainanı qoldauımız kerek. Biz prezident Putinge Ukraina jeñilmeytinin körsetuimiz qajet” dedi ol swhbatında.

Azattıq “Nastoyaşee vremyanıñ” Yens Stoltenbergten alğan swhbatın ıqşamdap wsınadı.

– Qazir maydan şebindegi, sonıñ işinde Bahmut pen Avdeevkadağı jağdaydı qalay bağalaysız? Bwl şayqas Resey men Ukraina äskerine qalay äser etedi?

– Aldımen Ukraina äskeriniñ käsibiligi, erligi jäne şeşim qabıldaudağı mıqtılığı tañğaldırğanın ayta ketkim keledi. Olar bükil älemdi tañğaldırdı. Al Resey äskeriniñ ruhı, dayındığı älsiz ekenin, tehnikası eski ekenin kördik. Reseydiñ äskeri basşılığı köptegen operaciyada özin körsete almadı.

Bir jağınan, Resey äskeri sapa jetpegen soñ, sanmen aluğa tırısıp jatır. Sondıqtan olar naşar maşıqtanğan mıñdağan adamdı maydanğa jibergenin kördik. Bwl Ukraina äskerine de şığın keltirui mümkin. Ukrainamen salıstırğanda Resey sapalı qaru men tiimdi basqaru bolmağandıqtan köp soldatınan ayırılıp jatır.

Biraq biz Reseydi nazardan tıs qaldırmauımız kerek, sebebi olar mıñdağan adamdı maydanğa jiberuge dayın ekenin körsetti. Demek, Ukrainanı qoldap, Ukrainağa jerin bosatuğa kömektesip, Resey basqınşılığına toytarıs beruimiz kerek.

–​ Ukraina köktemde qarımta şabuılğa şığudı josparlap otır. Bwdan qanday nätije boluı mümkin? Ukraina äskeri qarımta şabuıl bastauğa qauqarlı ma, qaru-jarağı jete me?

– Soğısta boljam jasau qiın. Meniñşe, eşkim soğıs qaşan ayaqtalatının, biıl qalay bolatının döp basıp ayta almaydı.

Jaña qarımta şabuıl bastau turalı şeşimdi jağdaydı jaqsı biletin ukrainalıqtar qabıldauğa tiis. NATO-nıñ jauapkerşiligi – Ukrainağa qarımta şabuıl bastauğa qajet qaru-jaraq beru, qoldau körsetu jäne äskerilerge jaña qarudı qoldanudı üyretu.

Sonday-aq Ukraina kelissözde qanday şarttardı qabıldaytının özi şeşedi. Maydandağı şayqastıñ nätijesi de kelissöz üstelinde körinedi. Sondıqtan Ukraina erteñ täuelsiz el retinde kelissözde de dittegenine jetsin desek, bügin äskeri kömek beruimiz qajet.

–​ Ukraina äskeri jolmen Qırımdı azat ete ala ma? Ukraina Qırımdı qaytaramız dep şeşse, NATO qolday ma?

– Biz Ukrainağa qanşa qoldau kerek bolsa, sonşa qoldau körsetemiz dep mälimdedik. Ukrainanıñ öz jerin, aumağın qorğau qwqığın qoldaymız. Bwl qwqıq BWW qararında bekitilgen. Qazir körip otırğanımız – Ukrainağa qarsı basqınşılıq soğısı, sondıqtan Ukraina öz jerin qorğaymın dese, qoldaymız. Qajet qoldaudı körsete beremiz.

Azat Europa / Azattıq radiosı