ۋكراينا پرەزيدەنتى ۆلاديمير زەلەنسكي 24 اقپاندا كيەۆتە وتكەن “ۋكراينانى قولدايمىز” دەپ اتالعان سامميتتە ونداعان مەملەكەتتىڭ باسشىسىن قارسى الدى.

“ليدەرلەر، ونلاين دا، وففلاين دا ءبىزدىڭ ەگەمەندىگىمىزدى، اۋماقتىق تۇتاستىعىمىزدى قولداپ جاتىر. بۇل رەسەيدىڭ ۋكرايناعا قارسى نەگىزسىز، قىلمىستىق سوعىسى ەكەنىن ءبارىمىز تۇسىندىك” دەدى زەلەنسكي.

ول كيەۆتە 13 مەملەكەتتىڭ ليدەرىمەن كەزدەستى. 20-دان استام ەل باسشىسى جيىنعا ونلاين قاتىستى.

بۇل سامميت اقش پرەزيدەنتى دونالد ترامپتىڭ جاڭا اكىمشىلىگىنىڭ سوعىستى توقتاتۋ بويىنشا جاڭا ديپلوماتيالىق باستامالارىنان كەيىن ءوتىپ جاتىر. ۆاشينگتون مەن ماسكەۋدىڭ ساۋد ارابياسىندا وتكەن كەلىسسوزدەرىنەن كەيىن ۋكراينا مەن ەۋرووداق وزىنە ءتيىمسىز كەلىسىم قابىلدانادى دەپ قاۋىپ ەتكەن.

“سوعىستى باستاعان – رەسەي” دەدى سامميتكە ونلاين قاتىسقان گەرمانيا پرەزيدەنتى فرانك-ۆالتەر شتاينمايەر.

ال ەۋروكوميسسيا توراعاسى ۋرسۋلا فون دەر ليايەن جيىندا ۋكرايناعا “قۇرال-جابدىق پەن وق-ءدارى جەتكىزۋ تەزدەتىلەتىنىن” جانە 3,5 ميلليارد دوللارلىق جاڭا جاردەم كورسەتىلەتىنىن ايتىپ ۋادە بەردى.

يسپانيا ۇكىمەت باسشىسى پەدرو سانچەس تە 1 ميلليارد دوللارلىق اسكەري جاردەم مەن قۇرال-جابدىق جونەلتەتىنىن ايتتى.

ال كانادا پرەمەر-ءمينيستردى دجاستين تريۋدو كيەۆكە جاڭا اسەر جىبەرەتىنىن جانە رەسەيدىڭ بۇعاتتالعان اكتيۆتەرىن كيەۆكە بەرەتىنىن ايتتى.

24 اقپاندا رەسەيدىڭ ۋكرايناعا باسىپ كىرگەنىنە ءۇش جىل بولدى. رەسەي پرەزيدەنتى ۆلاديمير پۋتين سوعىس اشقانداعى ماقساتى ۋكراينانى “دەناتسيفيكاتسيالاۋ” جانە “دەميليتاريزاتسيالاۋ” دەدى جانە وزدەرىن “دونەتسك حالىق رەسپۋبليكاسى” (“دحر”) جانە “لۋگانسك حالىق رەسپۋبليكاسى” (“لحر”) دەپ اتاعان جىكشىل ايماقتاردى “گەنوتسيدتەن قورعاۋ” دەپ اتادى. بىراق ماسكەۋ بۇل تۇجىرىمدارىن لايىقتى تۇردە نەگىزدەپ بەرگەن جوق.

ازات ەۋروپا / ازاتتىق راديوسى