كاسىپكەر افريكا ەلدەرىندەگى دەنساۋلىق ساقتاۋ، ءبىلىم بەرۋ جانە كەدەيلىكپەن كۇرەس سالالارىنا شامامەن 200 ميلليارد دوللار ينۆەستيتسيا سالۋدى جوسپارلاپ وتىر.

«جۋىردا مەن ءوز بايلىعىمدى 20 جىلدىڭ ىشىندە تولىقتاي تاراتۋ جونىندە شەشىم قابىلدادىم. قاراجاتتىڭ باسىم بولىگى وسى جەردە، افريكادا، ءتۇرلى ماسەلەلەردى شەشۋگە كومەكتەسۋگە باعىتتالادى»، – دەدى بيلل گەيتس ءوزىنىڭ قورىمەن بىرلەسكەن ءباسپاسوز ءماسليحاتىندا.

باستى باسىمدىقتار:

– ينفەكتسيالىق اۋرۋلارمەن كۇرەس (سونىڭ ىشىندە بەزگەك، تۋبەركۋلەز، ۆيچ);

– انا مەن بالا دەنساۋلىعىن جاقسارتۋ;

– اۋىلدىق اۋداندارداعى ءبىلىم بەرۋ ساپاسىن ارتتىرۋ;

– تازا اۋىزسۋ مەن سانيتاريا ينفراقۇرىلىمىن دامىتۋ;

بيلل گەيتس: «بۇل – قايىرىمدىلىق ەمەس، بۇل – ينۆەستيتسيا. افريكا ەلدەرىندە الەۋەت زور. ەگەر ءبىز قازىر قولداۋ بىلدىرسەك، بولاشاقتا بۇل ءوڭىر الەمنىڭ دامۋشى لوكوموتيۆىنە اينالۋى مۇمكىن».

قور ەفيوپيا، وار، كەنيا، نيگەريا جانە سەنەگال سياقتى ەلدەردە وكىلدىكتەر اشىپ، كوپتەگەن جوبالاردى جۇزەگە اسىرىپ كەلەدى.

ايتا كەتەيىك، بيلل جانە مەليندا گەيتس قورى سوڭعى 20 جىلدا دەنساۋلىق ساقتاۋ مەن ءبىلىم بەرۋ سالالارىنا 50 ميلليارد دوللاردان استام قارجى قۇيعان. بۇل جاڭا باستاما — ولاردىڭ ەڭ اۋقىمدى جوباسى بولماق.

بيلل گەيتس اتاپ وتكەندەي، افريكا ەلدەرىنىڭ دامۋى ادام كاپيتالىن اشۋعا بايلانىستى. ول باستاپقى مەديتسينالىق كومەكتىڭ ماڭىزىن، جۇكتى ايەلدەر مەن بالالاردىڭ جاعدايىن جاقسارتۋدىڭ قاجەتتىگىن اتاپ ءوتتى. سونىمەن قاتار گەيتس افريكا ەلدەرىنىڭ جاساندى ينتەللەكتتى نەگىزگى ماسەلەلەردى شەشۋ ءۇشىن ەنگىزۋگە تالپىنىسىن جوعارى باعالادى.

قايىرىمدىلىق قورى ءوز جۇمىسىن 2045 جىلدىڭ 31 جەلتوقسانىندا توقتاتۋدى جوسپارلاپ وتىر. الداعى 20 جىل – بيلل گەيتس قورى ءۇشىن شەشۋشى كەزەڭ بولماق.

zhasalash.kz