21 قىركۇيەك كۇنى قازاقستان پرەزيدەنتى بۇۇ باس اسسامبلەياسىنا بارعان ساپارىندا نيۋ-يوركتە ۋكراينا پرەزيدەنتى ۆلاديمير زەلەنسكيمەن كەزدەستى.
اقوردا ءباسپاسوز قىزمەتىنىڭ حابارلاۋىنشا، پرەزيدەنتتەر ەكىجاقتى ەكونوميكالىق جانە گۋمانيتارلىق ىنتىماقتاستىق ماسەلەلەرىن تالقىلاعان. سونداي-اق، زەلەنسكي “ۋكرايناداعى جاعدايعا بايلانىستى كوزقاراسىن” بىلدىرگەن، ال قازاقستان باسشىسى “قاقتىعىستى توقتاتۋ ماقساتىندا ديپلوماتيالىق جۇمىستاردى جالعاستىرۋ قاجەت” دەگەن.
زەلەنسكي وسى كەزدەسۋ تۋرالى مالىمدەمەسىندە ۋكراينا، اقش، ەۋروپا جانە وزگە ەلدەردىڭ سوعىستى توقتاتۋ جونىندەگى تالپىنىسىن تالقىلاعانىن ايتتى. ونىڭ سوزىنشە، قوس باسشى سونداي-اق ەكىجاقتى ساۋدا-ەكونوميكالىق ارىپتەستىكتى، قازاقستاندىق كومپانيالاردىڭ ۋكراينانى قالپىنا كەلتىرۋ ىسىنە قاتىسۋعا دەگەن قىزىعۋشىلىعىن ءسوز ەتكەن.
2022 جىلعى اقپاندا ۋكرايناعا باسىپ كىرگەن رەسەي قازاقستاننىڭ ەڭ ءىرى كورشىسى، ءارى جاقىن وداقتاسى. حالىقارالىق تەرگەۋشى جۋرناليستەر، ەۋروپا ينستيتۋتتارى سانكتسيا ۇشىراعان رەسەي شەكتەۋلەردى اينالىپ وتۋدە قازاقستاندى پايدالانىپ وتىرعانىن ايتقان. استانا رەسەيمەن ساۋدانى توقتاتا المايتىنىن، بىراق سانكتسيا تالاپتارىن ۇستانۋعا بەكىنىپ وتىرعانىن مالىمدەگەن. توقاەۆ رەسەي 2022 جىلعى ماۋسىمدا رەسەيدەگى ەكونوميكالىق فورۋمدا ۋكراينا جەرىندەگى لحر مەن دحر دەيتىن رەسەي قولداپ وتىرعان كۆازيمەملەكەتتىك قۇرىلىمداردى تاۋەلسىز ەل دەپ مويىندامايتىنىن ايتتى. بىراق كەيىنگى سوزدەرىندە ول رەسەيدى اسكەري تۇرعىدا جەڭۋ مۇمكىن ەمەس دەپ، سوعىستى ديپلوماتيالىق جولمەن اياقتاۋعا شاقىرعان.
قازاقستان رەسەي-ۋكراينا سوعىسىندا بەيتاراپ بولۋعا تىرىسىپ كەلەدى. بىراق ۋكراينالىق “حوچۋ جيت” جوباسىنىڭ مالىمدەۋىنشە, وسىعان دەيىن مىڭنان استام قازاقستان ازاماتى رەسەي اسكەرىمەن كەلىسىمشارت جاساسىپ، سوعىسقا اتتانعان. قازاقستان ازاماتتارىنا شەتەلدەگى اسكەري قاقتىعىستارعا جالدانىپ قاتىسۋعا تىيىم سالىنعان.
ازات ەۋروپا / ازاتتىق راديوسى
پىكىر قالدىرۋ