ساراپشىلاردىڭ ايتۋىنشا، ۆاشينگتون يرانداعى مۇناي ەكسپورتىنىڭ نەگىزگى وشاعى سانالاتىن حارك ارالىن نىساناعا الۋى ابدەن مۇمكىن. بۇل سانكتسيالار قۇرساۋىنداعى يران ەكونوميكاسىن قۇلاتپاي ۇستاپ تۇرعان باستى تابىس كوزىن جاۋىپ تاستاۋى ىقتيمال.
الايدا يران مۇناي ەكسپورتىنىڭ 90 پايىزىن قامتاماسىز ەتەتىن پارسى شىعاناعىنداعى شاعىن ارالدى باسىپ السا، بۇل اقش پەن ءيزرايلدىڭ يرانعا قارسى سوعىسىن ءتىپتى ۋشىقتىرىپ جىبەرۋى مۇمكىن. مۇنىڭ ءوزى دە يران ەكونوميكاسىن تولىق قۇردىمعا جىبەرە المايدى دەيدى ساراپشىلار.
7 ناۋرىزدا Axios باسىلىمى اقش اكىمشىلىگى حارك ارالىن باسىپ الۋ مۇمكىندىگىن تالقىلاعانىن حابارلادى . يران بۇل ارالعا 1960-جىلدارى ارنايى نىساندارىن تۇرعىزىپ، سودان بەرى مۇناي ەكسپورتىندا وسى شاعىن ارالعا تاۋەلدى بولىپ قالعان.
ارالداعى تەرەڭ سۋ ايلاقتارى مۇنايدى كوپتەپ تاسىمالدايتىن الىپ تانكەرلەردى قابىلداي الاتىنداي ەتىپ جابدىقتالعان.
ترامپ اكىمشىلىگىنە جاقىن دەرەككوز The New York Post باسىلىمىنا “سوعىستىڭ ناتيجەسىنە اسەرى زور ەكەنىن ەسكەرسەك”، ارالدى باسىپ الۋ كەرەك پە دەگەننەن گورى “قاشان باسىپ الامىز؟” دەگەن سۇراق كۇن تارتىبىندە تۇرعانىن ايتقان.
ترامپ اكىمشىلىگى بۇل تۋرالى ءالى جاريا پىكىر بىلدىرگەن جوق.
“يراننىڭ باسقا ەكسپورت تەرمينالدارى جەتكىلىكتى. تاعى بەسەۋى بار، ولاردىڭ ىشىندە ورمۋز بۇعازىنىڭ شىعىسىنداعى جاسكىدە يراننىڭ باستى مۇناي كەنىشتەرىمەن 1000 شاقىرىمدىق مۇناي قۇبىرلارى ارقىلى جالعانعان جاڭا تەرمينال بار”، – دەيدى يران مۇنايى تاريحىن زەرتتەيتىن ساراپشى، Eurasia Group ورتالىعىنىڭ زەرتتەۋشىسى گرەگوري بريۋ.
ونىڭ ايتۋىنشا، جاسك مۇناي تەرمينالى مۇنايدى ورمۋز بۇعازىنا كىرىپتار بولماي-اق ەكسپورتتاي بەرۋ ءۇشىن ادەيى سالىنعان، ياعني ءدال قازىرگىدەي جاعدايلار بولىپ قالسا دەپ ارنايى تۇرعىزىلعان دەيدى ساراپشى.
اقش وسى ءبىر بوس جاتقان شاعىن عانا ارالعا باقىلاۋ ورناتۋعا تىرىسسا، يران حاركتاعى مۇناي تەرمينالىن جويىپ جىبەرۋگە كۇش سالۋى ىقتيمال.
“يراندىقتار حاركتاعى ينفراقۇرىلىمدى قارسىلاستىڭ قولىنا بەرىپ قويعانشا، ونى جويىپ جىبەرۋگە مۇددەلى بولۋى ابدەن مۇمكىن”، – دەيدى بريۋ.
ساراپشىلاردىڭ ايتۋىنشا، مۇنداي قادام ۆاشينگتونعا – سيمۆولدىق، ال يرانعا پروپاگاندالىق تۇرعىدا جەڭىس اكەلۋى ىقتيمال. ال مۇناي نارىقتارى ودان كەيىن بولاتىن الاساپىراننىڭ سالدارىمەن كۇرەسۋگە ءماجبۇر بولماق.
ءبريۋدىڭ ايتۋىنشا، حاركقا اقش اسكەرى كەلگەن جاعدايدا وعان يران قارىمتا شابۋىل جاساۋى ابدەن مۇمكىن، سەبەبى ارال زىمىران مەن درون شابۋىلىنان ەش قورعالماعان.
اقش پەن يزرايل اقپاندا تەگەرانعا اۋە شابۋىلىن باستاعاننان سوڭ يران پارسى شىعاناعىنىڭ ءون بويىنا مۇنداي قارۋىن دايىنداپ قويدى.
حارك ارالىن اقش اسكەرى باسىپ العان جاعدايدا بۇل يراننىڭ جاڭا رۋحاني كوسەمى مۇجتابا حامەنەيگە پروپاگاندا تۇرعىسىنان ۇلكەن ولجا بولۋى ىقتيمال.
حامەنەي 8 ناۋرىزدا مارقۇم اكەسىنىڭ ورنىنا ەلدىڭ ەڭ جوعارى باسشىسى قىزمەتىنە كەلدى. ونىڭ بۇل ورىنعا كەلۋى قانشالىق زاڭدى دەگەن سۇراق باسقا جاق تۇگىل يراننىڭ ءدىني باسشىلىعىندا دا ءبىراز داۋعا سەبەپ بولدى.
يران جەرىن باسقا ءبىر ەل وككۋپاتسيالاعان جاعدايدا بۇل توتەنشە جاعداي ونىڭ پوزيتسياسىن نىعايتىن، حالىقتى ءوز اينالاسىنا جۇمىلدىرۋعا مۇمكىندىك بەرەدى.
“بۇدان سوڭ رەجيم امەريكا مەن ءيزرايلدىڭ اگرەسسياسىنا تويتارىس بەرۋ دەگەندى يراننىڭ اۋماقتىق تۇتاستىعىن قورعاۋ دەگەن اسكەري ماقساتقا الماستىرا الادى”، – دەيدى گرەگوري بريۋ.
ازات ەۋروپا / ازاتتىق راديوسى
پىكىر قالدىرۋ