قازاقپارات – ۇلى ابايدىڭ اكەسى، قايراتكەر تۇلعا قۇنانباي وسكەنبايۇلى تۋرالى كوركەم فيلم وسى ايدىڭ سوڭىندا ەلىمىزدىڭ بارلىق كينوتەاترلارىنان كورسەتىلە باستايدى. بۇل تۋرالى «قازاقفيلم» كينوستۋدياسىنىڭ باس رەداكتورى، جازۋشى ديدار امانتاي ءوزىنىڭ فەيسبۋك الەۋمەتتىك جەلىسىندەگى پاراقشاسىنا جازادى.«تاياۋدا قازاقستاننىڭ حالىق ءارتيسى، مەملەكەتتىك سىيلىقتىڭ يەگەرى، قازاق مادەنيەتىنىڭ كورنەكتى قايراتكەرى، ونەر ارداگەرى، ۇلتتىق تەاتر جانە كينو اكتەرى، رەجيسسەر، پروديۋسەر دوسحان جولجاقسىنوۆ جۇرت نازارىنا ۇلى ابايدىڭ اكەسى، قايراتكەر تۇلعا قۇنانباي وسكەنبايۇلى تۋرالى تولىقمەتراجدى كوركەم ءفيلمىن ۇسىنادى… 12 مامىردا قاراۋىلدا، 13 مامىردا سەمەيدە، 16 مامىردا استانادا، 24 مامىردا الماتىدا تۇساۋى كەسىلەتىن بۇل كينوتۋىندى كينو الەمىندەگى ۇلكەن جاڭالىق بولادى دەپ ويلايمىز»، دەپ جازادى كينوستۋديانىڭ باس رەداكتورى.

سونداي-اق ول «قۇنانباي» ءفيلمى مامىردىڭ 25-نەن كەيىن ەلىمىزدىڭ بارلىق كينوتەاترلارىنان كورسەتىلە باستايتىنىن اتاپ وتەدى. ءفيلمنىڭ ستسەناريىن جازعاندار: دوسحان جولجاقسىنوۆ پەن تالاسبەك اسەمقۇلوۆ.