ەلباسى پانفيلوۆقا ارنالعان ەسكەرتكىشتىڭ اشىلۋ سالتاناتىنا قاتىستى (فوتو)
kerey.kz
استانا. قازاقپارات – بۇگىن مەملەكەت باسشىسى نۇرسۇلتان نازارباەۆ استاناداعى قوشقارباەۆ پەن جۇماباەۆ كوشەلەرىنىڭ قيىلىسىندا ورنالاسقان “جەرۇيىق” ساياباعىندا گەنەرال ي. ۆ. پانفيلوۆتىڭ ەسكەرتكىشىن اشۋ راسىمىنە قاتىستى.
«بۇل ەسكەرتكىش تەك كەڭەس وداعىنىڭ باتىرى يۆان پانفيلوۆقا عانا قويىلعان ەسكەرتكىش ەمەس. بۇل فاشيزمگە قارسى ۇلى شايقاسقا قاتىسقان قازاقستاندىقتارعا جانە سول شايقاس الاڭىندا قازا بولعاندار مەن سۇراپىل سوعىستان قايتىپ كەلىپ، ەلىمىزدىڭ دامۋىنا ولشەۋسىز ۇلەس قوسقاندارعا دەگەن ماڭگىلىك قۇرمەت بەلگىسى. وزدەرىڭىز جاقسى بىلەسىزدەر، گەنەرال-مايور پانفيلوۆ باسقارعان 316-ديۆيزيا الماتى وبلىسىندا قۇرىلىپ، سوعىستىڭ ەڭ اۋىر كەزىندە ماسكەۋ تۇبىندە شايقاستى جانە اراسىندا كەڭەس وداعىنىڭ باتىرى باۋىرجان مومىشۇلى بار 28 پانفيلوۆشى-جاۋىنگەر ماسكەۋگە تاپ بەرگەن فاشيستىك گەرمانيانىڭ تانكتەردەن قۇرالعان توپتارىن تويتاردى”، – دەدى مەملەكەت باسشىسى.
«سوندىقتان دا پانفيلوۆتىڭ ەسىمى ۇلى وتان سوعىسى تاريحىندا ماڭگى قالادى. ءبىز – قازاقستاندىقتار ونىڭ ەسىمىن باسقا دا 500 قازاقستاندىق كەڭەس وداعىنىڭ باتىرى مەن 200 “داڭق” وردەنى يەگەرلەرىمەن بىرگە قاستەرلەيمىز”، – دەپ اتاپ ءوتتى ن. نازارباەۆ.
ايتا كەتەيىك، كەڭەس وداعىنىڭ باتىرى، گەنەرال-مايور يۆان پانفيلوۆ ەسكەرتكىشىنىڭ اۆتورى – ءمۇسىنشى رەنات ابەنوۆ. بيىكتىگى 2,5 مەتردى قۇرايتىن ەسكەرتكىش قولادان جاسالعان. ونىڭ ورتاسىندا گۇل شوقتارىن قويۋعا ارنالعان تاقتا ورناتىلعان. ەسكەرتكىشتىڭ شىعىس بەتىندە ماسكەۋدى قورعاۋدا ەرلىكپەن قازا تاپقان 28 جاۋىنگەر-پانفيلوۆشىلاردىڭ تۋعان، ومىردەن وتكەن جىلدارى جانە اتى-جوندەرى كورسەتىلىپ، تابيعي گرانيتتەن جاسالعان ەستەلىك تاقتالار ورناتىلعان. سونداي-اق كەڭەستەر وداعى باتىرىنىڭ التىن جۇلدىز مەدالى بەكىتىلگەن 28 ستەللا جاسالدى. 
اۆتور: ءابۋ-اسقار مەكەشۇلى
inform.kz
پىكىر قالدىرۋ