قازاقستان رەسپۋبليكاسىنىڭ بارلىق قۇقىق قورعاۋ ۇيىمدارىنىڭ نازارىنا!
قۇرمەتتى ءىىم، باس پروكۋرور، ۇقك توراعاسى: الماتى قالاسىندا جاريا جانە قۇپيا تۇردە جۇمىس ىستەپ جۇرگەن سەپاراتيستىك ۇيىم بار. بۇلار اراكىدىك ءوز جۇمىستارىن ىستەپ، كەيدە تىنىشتالىپ جاتىپ قالادى. اتالمىش توپتىڭ ارەكەتتەرىنە نازار اۋدارىپ، ۇلتتىق قاۋىپسىزدىگىمىزگە نۇقسان كەلتىرۋشىلەر رەتىندە ءتيىستى شارا قولدانارسىزدار. وسى توپتىڭ قارجىلاندىرۋى، جۇمىس بارىسىنا جانە كومەك بەرۋشى اقپارات قۇرالدارىنا نازار اۋدارۋ كەرەك دەپ ەسەپتەيمىن.
اتقارۋشى بيلىك ءتيىستى زاڭ شىعارىپ، ءوزىمىزدىڭ بايراعىمىز تۇستەس مەرەكەلىك لەنتالاردى قولدانۋعا ۇگىتتەگەنىمەن، بۇل توپ «گەورگي لەنتاسىن» اشىق تۇردە تاراتىپ الەك.
مىسالى، «SMALL» سۋپەرماركەتى ۇلتتىق ناقىشتاعى لەنتالاردى ەلەمەي، اتالمىش لەنتامەن بەزەندىرىلىپ قويعان. سۇراستىرىپ كورسەك، بۇل ارەكەت دۇكەننىڭ باسشىلىعىنىڭ تىكەلەي نۇسقاۋىمەن بولعان ەكەن.
سونداي-اق 132-مەكتەپتىڭ باستاۋىش سىنىپتاعى وقۋشىلارى دا بۇل لەنتانى تاعىپ الىپ، ەمىن ەركىن ءجۇر. بۇل باسسىزدىققا كىم جاۋاپ بەرەر ەكەن؟!
الماتى قالاسىنىڭ № 105-مارشرۋتى. جۇرگىزۋشىنىڭ ايتۋى بويىنشا تۇندە بەلگىسىز بىرەۋلەر «گەورگي لەنتاسىن» بارلىق كولىكتەرگە ءىلىپ تاستاعان كورىنەدى. كوكىرەگى وياۋ ازاماتتار ەرتەسىمەن شەشىپ تاستاپ، جۇمىسقا شىعىپتى. بىراق، بۇل كىمنىڭ ءىسى ەكەنى سول كۇيىندە بەلگىسىز بولىپ قالدى.
«التىن وردا» بازارىنىڭ جانىنداعى «SMALL» سۋپەرماركەتىندە زىميان ساياساتتى ۋاعىزدايتىن لەنتانىڭ ءىلۋلى تۇرعانىن كورگەننەن كەيىن، مەن دەرەۋ تۇردە پوليتسيا قىزمەتكەرلەرىن شاقىردىم. كەلگەن قىزمەتكەرلەر دۇكەننىڭ ىشىنە كىرۋگە، زاڭ بۇزىلعانىن انىقتاۋعا باس تارتتى. تەك مەنەن ارىز جازدىرىپ الىپ كەتە بەردى. ءتىپتى، ءتۇرى ازياتتىققا كەلەتىن اعا سەرجانت مەنىڭ قازاق تىلىندە سويلەپ تۇرعانىمدى جاقتىرماي، تىڭداماي قويدى ء(وزىنىڭ كىم ەكەنىن دۇرىس تانىستىرمادى، تەك «كۋدينوۆ» دەگەنىن ەستىپ قالدىم). ايتۋىنشا، ءتىلدى بىلمەيدى ەكەن.
مەملەكەتتىك قازاق ءتىلىن مەڭگەرمەگەن ادام قالايشا قۇقىق قورعاۋ سالاسىندا جۇمىس ىستەپ ءجۇر؟ پوليتسيا قىزمەتكەرى دەگەنىمىز بيلىكتىڭ حالىق الدىنداعى وكىلى ەمەس پە؟
سوندىقتان مينيسترلەر، باس پروكۋرور، جانە دە باسقا دا قۇزىرلى بيلىك باسىنداعى تۇلعالار، ەلىمىزدە بولىپ جاتقان بۇل زاڭسىز ارەكەتتەردى ءوز ۋاقىتىندا تىيىپ، مەملەكەتىمىزدىڭ قاۋىپسىزدىگىنە نۇقسان كەلمەۋىن قادالاعاڭىزدار! بۇل حالىقتىڭ تىلەگى.
قۇرمەتپەن ءازىمباي عالي
پىكىر قالدىرۋ