ەندى ۇستىمىزگە اعىلشىنشا جازىلعان جەڭىل ءسوز بەن جات ەلدىڭ جۇلدىزدارى، وزگە ۇلت پەن ەلدىڭ تاڭباسى سالىنعان فۋتبولكالاردى ەمەس، قازاقستاندا جاسالعان، قازاقتىڭ حاندارى مەن باتىرلارى، ارىستارى مەن الىپتارى، ۇلتتىق سالت-داستۇرىمىزدەن كورىنىستەر جانە قازاق ومىرىمەن باعزىدان بايلانىسىپ كەلە جاتقان قىران بۇركىت، كوك ءبورى جانە جىلقى بەينەلەرى ورنەكتەلگەن جەڭىل جەيدەلەردى كيۋىمىزگە مۇمكىندىك بار.

اڭساعان مۇستافانىڭ قازاق حاندىعىنىڭ 550 جىلدىعىنا ارناپ وتكىزگەن كورمەسىندە وسىنداي 55 ۇقساماعان ۇلتتىق ۇلگىدەگى جەڭىل جەيدە تانىستىرىلىپ، ولاردىڭ سۋرەتتەرى قويىلدى.
تارلان تاريحتىڭ تاۋ تۇلعالارىن تاڭداۋدا شەبەرلىك تانىتىپ، ەلدىكتىڭ تۇعىرىن قازاق ومىرىمەن دە بايلانىستىرعان سۋرەتشىنىڭ تىلەگى ەندىگى جەردە وسى جەڭىل جەيدەلەردى ءبىر ادام بولسا دا كيىپ، كيىم ارقىلى ءوزىنىڭ ۇلتتىق رۋحىن كورسەتسە ەكەن دەيدى.
«بۇل كورمە قازاق حاندىعىنىڭ 550 جىلدىعىنا ارنالعاندىقتان سۋرەتتەرىمدە تاريحتا وتكەن تۇعىرى بيىك تۇلعالاردى، سالت-ءداستۇردى، ۇلتتىق ويىندارىمىزدى بەينەلەدىم. ويتكەنى ءبىزدىڭ ەلدىگىمىز حاندار بيلىگى مەن باتىرلار بىلەگىنىڭ كۇشىمەن عانا قالىپتاسقان جوق، تاريحتى قالىپتاستىرۋدا بۇكىل قازاق قوعامىنىڭ ءرولى وزگەشە. بەس عاسىردىڭ ىشىندە اتا دا، بالا دا، باتىر دا بار. ۇلتتىق ءداستۇرىمىز بەن سالتىمىز بار. سوندىقتان 55 ءتۇرلى سۋرەتتى ءبىر-بىرىنە ۇقسامايتىن 55 ۇلگىدە سالدىم. بۇل ويدى قۋا بەرسەڭ 500 سۋرەت تە سالۋعا بولادى. بىراق، مەن ۋادەمدى 55 سۋرەتكە بەرگەننەن كەيىن وسى دۇنيەلەر ومىرگە كەلدى. سۋرەتتەردى ءتۇرلى-ءتۇستى جانە جەڭىلدەۋ ەتىپ جاستار جاعىنا باعىتتادىم»،-دەيدى ا.مۇستافا.

ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ الەۋمەتتىك-مادەني دامۋ جونىندەگى پرورەكتورى ديحان قامزابەكۇلى سۋرەتشى اڭساعاننىڭ ونەرىن جوعارى باعالاپ، جينالعان ستۋدەنت جاستاردى وسىنداي قاراپايىم تۇرمەن دە ەلگە رۋح سىيلاپ، ۇلتقا ۇلەس قوسۋعا بولاتىنىن ايتتى.
«وتانشىلدىق پەن ۇلتتىق رۋحتى كۇندەلىكتى تۇتىناتىن تاۋارلارىڭىز ارقىلى جەتكىزۋ، قاراپايىم فورماتتا ناسيحاتتاۋ قازىرگى قوعام ءۇشىن وتە ماڭىزدى. اڭساعاننىڭ سۋرەتتەرىنىڭ بارىندە ەلگە قىزمەت ەتۋ يدەياسى جاتادى. كەز-كەلگەن رۋحاني دۇنيەنى ۇلتتىڭ مۇددەسىنە ساي قىلۋ – اڭساعاننىڭ رۋحاني ۇستانىمى دەپ بىلەمىن. مىنە بۇگىن اڭساعان ءاربىر ادام ءوز ماماندىعىنا ساي ۇلتتىق مۇددەنى، ەلدىك رۋحتى كوتەرە الاتىنىن كورسەتىپ وتىر»،-دەدى ول.

قازىرشە ەلدىكتىڭ رۋحى كەستەلەنگەن بۇل جەڭىل جەيدەلەر زاۋىتتا ءوندىرىلىپ، ساتىلىمعا شىقپاپتى. اۆتورلىق قۇقىعىن قورعاپ، بازارعا سالامىن دەگەن كاسىپكەرلەر شىعىپ جاتسا قارسى بولمايتىنىن ايتقان اڭساعان بىلاي دەدى:
«بۇل فۋتبولكالاردى ساتپايمىن، شىعارعان دا جوقپىن. ونداي مۇمكىندىگىم دە جوق. مەنىكى تەك قولىمنان كەلگەن ونەردى وسى اتاۋلى مەرەكەگە ارناۋ. بۇل 55 ءتۇرلى ديزاين «اباي» جانە «ۇلت» پورتالدارىنا قويىلاتىن بولادى. كەز-كەلگەن كىسى سولاردىڭ ىشىنەن وزىنە ۇناعانىن جۇكتەپ الىپ فوتوسالونداردان شىعارتىپ الۋلارىنا بولادى. كاسىپكەرلەر كوپتەپ شىعارۋعا نيەت تانىتسا قارسى ەمەسپىن. قايتا، اۆتورلىق قۇقىعىم قورعالعان كۇيدە بازارعا شىعىپ جاتسا قۋانامىن».

كورمەنىڭ تۇساۋكەسەرىنە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ، «ورلەۋ» باۇو» اق ديرەكتورلار كەڭەسىنىڭ توراعاسى مۇرات ابەنوۆ جانە ساياساتتانۋشى ايدوس سارىم مەن قازاقستان كۆن وداعىنىڭ پرەزيدەنتى ەسەن ەلەۋكەن قاتىسىپ، لەنتا قيدى. سۋرەتشى اڭساعاننىڭ قولىنان شىققان تۋىندى باسىلعان 55 ءتۇرلى جەڭىل جەيدەنى كيگەن جاستار فلەشموب وتكىزدى.

مايگۇل سۇلتان،

سۋرەتتى تۇسىرگەن عابيت ماداليەۆ

baq.kz