كوكبورى كيەلى باھادۇر ەر بابام
kerey.kz
تاسقىن ىسقاق ۇلى
(ەر جانىبەكتىڭ 300 جىلدىق مەرەيتويىنا ارنالعان جىر مۇشايراسىنا)
بۇگىنگى ارايلى تاڭ اپپاق،
شىرقالعان ۇرانداپ ءان اسقاق.
قۇلدىقتان قۇتىلعان ازات-ەل،
تاريحىن تۇر قايتا پاراقتاپ.
ورالعان ءداستورلى سالتى بار،
الەمدە بەدەلدى داڭقى بار.
«ماڭگىلىك ەل» بولىپ قالۋعا،
بىرلىكتى تۋ ەتكەن حالقى بار.
دالادا، قالادا توي ءبارى،
كوگارشىن شارىقتاپ وينادى.
وسىناۋ ءدۇبىرلى دودانىڭ،
بولعانى ءبىر شىندىق ايعاعى.
قۋانىش ۇيالاپ اسقاردى،
كوڭىلدىڭ كوزىنەن جاس تامدى.
ارۋاعىڭ ءبىر اۋناپ تۇرعانداي،
مەرەيلى مەرەكە باستالدى.
جىرلادى سەن بولىپ كەڭ دالاڭ،
كوگىندە قىرانى سامعاعان.
جاۋىڭا نايزاعاي سەكىلدى ەڭ،
«كوكبورى كيەلى» ەر-بابام.
ناعاشىڭ قازىبەك باتىردىڭ،
قولىندا ەرجەتىپ جاتىلدىڭ.
قالاپ اپ «كوك دونەن» تۇلپاردى،
جاستىقتىڭ جالىنىن ساپىردىڭ.
ۇستىڭدە تور كوزدى اق ساۋىت،
جولىڭدى كوكبورى باسقارىپ.
قالىڭ قول شۇبىرعان ارتىڭنان،
ءجۇردىڭ سەن جورىققا اتتانىپ.
تەبىنگىڭ تەر بولىپ شىرۋمەن،
ەلىڭدى كۇزەتىپ ءجۇرىپ ەڭ.
قولىڭا سەرت ۇستاپ نايزاڭدى،
اتويلاپ مايدانعا كىرىپ ەڭ.
ارقاڭدا قالىڭ ەل قازاعىڭ،
شەگىنۋ سەن ءۇشىن ازابىڭ.
دۇسپاننىڭ ولىگىن تاۋ عىلىپ،
ۇستىنە تۋىڭدى قادادىڭ.
كۇركىرەپ ۇرانداپ داۋىسىڭ،
ەرلىكتىڭ قايرادىڭ نامىسىن.
ەلىم دەپ، جەرىم دەپ كۇرەستىڭ،
قالمادىڭ ايانىپ جان ءۇشىن.
سوگىلىپ اق ساۋىت كوبەدەن،
قان كەشتىڭ قاسقايىپ دىزەدەن.
حالقىڭنىڭ قونىسىن قايتارىپ،
ەلدىكتىڭ ۇرانىن دۇزەپ ەڭ.
و، مەنىڭ−كوكبورى كيەلى،
− باھادۇر ەر-بابام!
سەن ءجايلى كوپ اڭىز تىڭداعام.
رۋحىڭنان كوكتەگەن ۇرپاقپىن،
نامىسپەن جاۋىڭا سىنباعان!
قىتاي حالىق رەسبوبىليكاسى شينجياڭ التاي قالاسىنان تاسقىن ىسقاق ۇلى
پىكىر قالدىرۋ