قازاق رۋحانياتى اۋىر قازاعا دۋشار بولدى. 64 جاسقا قاراعان شاعىندا قوعام قايراتكەرى، جازۋشى،حالىقارالىق «الاش» ادەبي سىيلىعىنىڭ لاۋرەاتى ديداحمەت ءاشىمحانۇلى دۇنيە سالدى.

قازاق ادەبيەتىنىڭ كوكجيەگىن كەڭەيتىپ، ءورىسىن اشقان التىن بۋىن قالامگەرلەردىڭ ءىزىن باسىپ، ادەبيەتتە وزىنە عانا ءتان سوقپاعىن سالىپ، قالامىنان تۋعان شىعارمالارى ارقىلى قالىڭ وقىرمانىنىڭ ىستىق ىقىلاسىنا، ماحابباتىنا بولەنگەن ديداحمەت اشىمحانۇلىمەن بىرگە ادەبيەتتىڭ ادال قورعانى قۇلادى. اعالاپ سوڭىنان ەرگەن، ءسوزىن تىڭداپ، نۇسقاعان باعىتىن قۇپ كورگەن كەيىنگى بۋىن ءىنى-قارىنداستارىنىڭ قامقورى بولعان قالامگەر مەيىرىم مەن جاناشىرلىقتىڭ، شىنايىلىق پەن وتكىرلىكتىڭ ءوزى ەدى، باستاۋ كوزى ەدى.

قازاققا قاجەتتى، قازاققا پايدالى ءار ءىستىڭ كوش باسىندا جۇرەتىن ءارى سول ىسكە قولىنان كەلگەن قامقورلىعىن ايامايتىن قايراتكەرلىگىمەن قوسا، قوعامدىق-ساياسي ومىرگە دە سەرگەك قاراپ، ءوز كوزقاراسىن اشىق  ايتىپ، باعىتىنىڭ انىقتىعى مەن تاباندىلىعىن ءار كەز ءبىلدىرىپ، وزگەلەرگە ۇلگى بولا بىلگەن ديداحمەت ءاشىمحانۇلىنىڭ قازاسى قالىڭ قازاققا، الىس-جاقىن ەلدەردەگى بارشا وقىرماندارى ورنى تولماس اۋىر قايعى.

Abai.kz اقپاراتتىق پورتالىنىڭ ۇجىمى مارقۇمنىڭ وتباسى، تۋعان-تۋىستارىنا، زامانداستارى مەن وقىرماندارىنا قايعىرىپ، كوڭىل ايتادى.

 ديداحمەت اشiمحانۇلىمەن قوشتاسۋ قارالى جيىنى ەرتەڭ ساعات 09:30 دا الماتىدا، جازۋشىلار وداعىندا وتەدi. دۇيسەنبi كۇنi تۋعان جەرi شقو، كاتون-قاراعايدا جەرلەنەدi.

Abai.kz

ءاشىمحانۇلى ديداحمەت 1952 جىلى 10 ماۋسىمدا شىعىس قازاقستان وبلىسى، قاتونقاراعاي اۋدانى، جاڭاۇلگى اۋىلىندا تۋعان. قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن بىتىرگەن (1978).

ەڭبەك جولىن شىعىس قازاقستان وبلىسى “كوممۋنيزم تۋى” (1975–1976), “لەنينشىل جاس” (1978) گازەتتەرىندە ءتىلشى بولىپ باستاعان، «قازاقستان پيونەرى» (قازىرگى «ۇلان»), 1981–1992 جج. «قازاق ادەبيەتى» گازەتتەرىندە ادەبيەت، سىن ءبولىمىن جۇرگىزدى، 1992–1994 جج. حالىقارالىق «زامان – قازاقستان» گازەتىنىڭ ءبولىم مەڭگەرۋشىسى جانە گازەت رەداكتورىنىڭ ورىنباسارى بولعان. 1994 جىلدان ەلارالىق «تۇركىستان» گازەتى رەداكتورىنىڭ ورىنباسارى، 2003 جىلدان «الاش» باسپاسىنىڭ ديرەكتورى

«اققابانىڭ تولقىنى» (1981), «ون ءبىرىنشى كۇز» (1987), «كامەننايا پاد» (1990), «جەر اڭساعان سارى اتان» (1998), «سامىرسىن سازى» (2000) اتتى اڭگىمەلەر مەن پوۆەستەر جيناقتارى جارىق كوردى. جەكە شىعارمالارى وزبەك، قىرعىز، قىتاي، موڭعول، ورىس، ۋكراين، ماري تىلدەرىنە اۋدارىلعان. سونداياق ا.كۋرچاتكين، ت.مينۋلمەن، ا.اشيروۆ، ح.ابدۋللين، پ.پۋرزۆەرۋ، ت.ب. شىعارمالارىن قازاق تىلىنە اۋدارعان. حالىقارالىق «الاش» ادەبي سىيلىعىنىڭ لاۋرەاتى (2005).