Qazaq ruhaniyatı auır qazağa duşar boldı. 64 jasqa qarağan şağında qoğam qayratkeri, jazuşı,halıqaralıq «Alaş» ädebi sıylığınıñ laureatı Didahmet Äşimhanwlı dünie saldı.

Qazaq ädebietiniñ kökjiegin keñeytip, örisin aşqan altın buın qalamgerlerdiñ izin basıp, ädebiette özine ğana tän soqpağın salıp, qalamınan tuğan şığarmaları arqılı qalıñ oqırmanınıñ ıstıq ıqılasına, mahabbatına bölengen Didahmet Äşimhanwlımen birge ädebiettiñ adal qorğanı qwladı. Ağalap soñınan ergen, sözin tıñdap, nwsqağan bağıtın qwp körgen keyingi buın ini-qarındastarınıñ qamqorı bolğan qalamger meyirim men janaşırlıqtıñ, şınayılıq pen ötkirliktiñ özi edi, bastau közi edi.

Qazaqqa qajetti, qazaqqa paydalı är istiñ köş basında jüretin äri sol iske qolınan kelgen qamqorlığın ayamaytın qayratkerligimen qosa, qoğamdıq-sayasi ömirge de sergek qarap, öz közqarasın aşıq  aytıp, bağıtınıñ anıqtığı men tabandılığın är kez bildirip, özgelerge ülgi bola bilgen Didahmet Äşimhanwlınıñ qazası qalıñ qazaqqa, alıs-jaqın elderdegi barşa oqırmandarı ornı tolmas auır qayğı.

Abai.kz aqparattıq portalınıñ wjımı marqwmnıñ otbası, tuğan-tuıstarına, zamandastarı men oqırmandarına qayğırıp, köñil aytadı.

 Didahmet Äşimhanwlımen qoştasu qaralı jiını erteñ sağat 09:30 da Almatıda, Jazuşılar Odağında ötedi. Düysenbi küni tuğan jeri ŞQO, Katon-Qarağayda jerlenedi.

Abai.kz

Äşimhanwlı Didahmet 1952 jılı 10 mausımda Şığıs Qazaqstan oblısı, Qatonqarağay audanı, Jañaülgi auılında tuğan. Qazaq memlekettik universitetiniñ jurnalistika fakul'tetin bitirgen (1978).

Eñbek jolın Şığıs Qazaqstan oblısı “Kommunizm tuı” (1975–1976), “Leninşil jas” (1978) gazetterinde tilşi bolıp bastağan, «Qazaqstan pioneri» (qazirgi «Wlan»), 1981–1992 jj. «Qazaq ädebieti» gazetterinde ädebiet, sın bölimin jürgizdi, 1992–1994 jj. halıqaralıq «Zaman – Qazaqstan» gazetiniñ bölim meñgeruşisi jäne gazet redaktorınıñ orınbasarı bolğan. 1994 jıldan elaralıq «Türkistan» gazeti redaktorınıñ orınbasarı, 2003 jıldan «Alaş» baspasınıñ direktorı

«Aqqabanıñ tolqını» (1981), «On birinşi küz» (1987), «Kamennaya pad'» (1990), «Jer añsağan sarı atan» (1998), «Samırsın sazı» (2000) attı äñgimeler men povester jinaqtarı jarıq kördi. Jeke şığarmaları özbek, qırğız, qıtay, moñğol, orıs, ukrain, mari tilderine audarılğan. Sondayaq A.Kurçatkin, T.Minulmen, A.Aşirov, H.Abdullin, P.Purzveru, t.b. şığarmaların qazaq tiline audarğan. Halıqaralıq «Alaş» ädebi sıylığınıñ laureatı (2005).