جامبىل وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى تاراز قالاسىنداعى «اۋىل-بەرەكە» بازارىندا جارىلىس جاساماق بولعان دەگەن ايىپ تاعىلعان بەس ەر ادامعا قاتىستى جۇما كۇنى ۇكىم شىعارعان-دەپ حابارلايدى ازاتتىق راديوسى.

سوت ولاردىڭ ەكەۋىن 4 جىل سەگىز ايعا، بىرەۋىن – 4 جىل التى ايعا جانە ەكەۋىن – 4 جىل 3 اي مەرزىمگە باس بوستاندىعىنان ايىرعان. سوت ۇكىمى كۇشىنە ءالى ەنبەگەن.

تەرگەۋشىلەر بۇل بەس ادامعا قىلمىستىق كودەكستىڭ «تەرروريزم» باپتارى بويىنشا بىرنەشە ايىپ تاققان ەدى. بىراق سوت ولاردىڭ ىسىندە اۋىر قىلمىس قۇرامى جوق دەپ تاۋىپ، سوتتالۋشىلاردى «تەررورلىق اكت دايىندالىپ جاتقانى تۋرالى جالعان حابار بەرۋ» جانە «بۇزاقىلىق» باپتارى بويىنشا عانا جاۋاپقا تارتۋ تۋرالى ۇيعارىم شىعارعان.

سوت پروتسەسى كەزىندە سوتتالۋشىلار وزدەرىنە تاعىلعان ايىپتاردى ءىشىنارا مويىنداپ، قىلمىستىق ارەكەتكە «اۋىل-بەرەكە» بازارى جۇمىسىن السىرەتىپ، تۇتىنۋشىلاردىڭ باسقا بازارعا بارۋىن ماقسات ەتكەندەرىن مالىمدەگەن. ولار وزدەرىنە «تەرروريزم» باپتارى بويىنشا تاعىلعان ايىپتاردى جوققا شىعارعان.

2014 جىلى تامىزدىڭ 30-ى كۇنى تارازداعى «اۋىل-بەرەكە» بازارى اۋماعىنان بەنزين قۇيىلعان شولمەكتەر مەن گاز باللوندارى سالىنعان جەڭىل اۆتوكولىك تابىلعاندىعىنا بايلانىستى پوليتسيا قىلمىستىق ءىس قوزعاپ، بىرنەشە كۇدىكتىنى ۇستاعان ەدى. سونىمەن بىرگە، بىلتىر جازدا تاراز پوليتسياسى اتالعان بازاردا «جارىلىس بولاتىنى» تۋرالى تۇسكەن جالعان حابارلارعا بايلانىستى ءۇش رەت قىلمىستىق ءىس قوزعالعانى جايلى حابارلانعان.