سانكت-پەتەربۋرگتەگى «ينتەرنەت-زەرتتەۋلەر» كومپانياسىنىڭ بۇرىنعى قىزمەتكەرى ليۋدميلا ساۆچۋك مەكەمەنىڭ ۇستىنەن سوتقا شاعىمدانعان.

ماۋسىمنىڭ 1-ءى كۇنى سانكت-پەتەربۋرگ قالاسى پەتروگراد اۋداندىق سوتىندا جۇرت «ينتەرنەت-تروللدار فابريكاسى» دەپ اتاپ كەتكەن ۇيىم وكىلدەرىنە قارسى سوت وتەدى. قوعامدىق بەلسەندى ءارى وسى ۇيىمدى اشكەرەلەۋدى ۇيعارعان بۇرىنعى «جالدامالى ترولل» ليۋدميلا ساۆچۋك «ينتەرنەت-زەرتتەۋلەر» كومپانياسى ۇستىنەن سوتقا شاعىمدانعان.

ليۋدميلا ساۆچۋك بۇرىن دا سۇحبات بەرگەن، بىراق جۋرناليستەردەن اتى-ءجونىن كورسەتپەۋدى سۇراعان. ەندى ول «اقپاراتتىق الەم» توبىن قۇرىپ، «ولگينو تروللدارى» (كەڭسەسى سانكت-پەتەربۋرگتاعى «ولگينو» تەمىر جول ستانتسياسى ماڭىندا ورنالاسقان مەكەمەنى جۇرت سولاي اتايدى) ۇيىمىنا قارسى اشىق كۇرەسۋدى ۇيعارعان. ول يۆان پاۆلوۆتىڭ «29» توبىنداعى ادۆوكاتتاردىڭ قولداۋىمەن «ينتەرنەت زەرتتەۋلەر» كومپانياسىن سوتقا بەرگەن. ليۋدميلا ساۆچۋك كومپانيانى نە ماقساتپەن سوتقا بەرگەنىن ايتپاس بۇرىن، ءوز باسىنان وتكەن وقيعانى باياندادى.

– 2014 جىلدىڭ جەلتوقسانىندا الگى مەكەمەگە كىرۋ مۇمكىندىگى تۋدى. قاپتاعان حابارلاندىرۋلارىن كورىپ، ولاردىڭ نەمەن اينالىساتىنىن تەكسەرىپ كورگىم كەلدى. قاڭتاردىڭ 2-ءسى كۇنى مىندەتىمە كىرىسىپ، ءبىرىنشى كۇننەن باستاپ اقپارات جيناپ، جۋرناليستەرگە بەرىپ وتىردىم.

– «ينتەرنەت-زەرتتەۋلەر» كومپانياسىندا جۇمىس ىستەيتىندەر نەمەن اينالىسادى؟

– ول جەردە جۇزدەگەن ادام وتىرادى. بىرنەشە اۋىسىمعا ءبولىپ تاستاعان الگى ادامدار تاۋلىك بويى جۇمىس ىستەپ، الەۋمەتتىك جەلى، بلوگتارعا مىڭداعان كوممەنتاري، ءماتىن، پوستار جازادى. سۋرەت سالىپ، ۆيدەوبلوگتار جۇرگىزەدى… ولار ورىس ءتىلدى ينتەرنەت قانا ەمەس، اعىلشىن تىلىندەگى سايتتاردا دا وتىرادى. كادىمگى ادامداردىڭ كەيپىنە ەنىپ، باق-تا جاريالانعان ماتەريالدارعا كوممەنتاريلەر جازادى، بلوگتار جۇرگىزەدى. جوعارىدان اۋىزشا نەمەسە جازباشا تۇسەتىن يدەيالاردى جۇرت ساناسىنا تىقپالايدى.

– «ينتەرنەت-زەرتتەۋلەر» كومپانياسىنان كەتكەن كەزدە بەرگەن العاشقى اشكەرەلەۋشى سۇحباتىڭىزدى بۇرىنعى ارىپتەستەرىڭىز قالاي قابىلدادى؟

– الگى مەكەمە مۇلدە جوق ۇيىم سياقتى ءتۇر تانىتادى. جۋرناليستەر دە، قاراپايىم ازاماتتار دا اينالشىقتاپ، سۋرەتكە ءتۇسىرىپ جاتقان ۇيىمنىڭ قانداي مەكەمە ەكەنىن قازىر بۇكىل الەم بىلەدى. قازىر ولاردىڭ ەشقايسىسىمەن ارالاسپايمىن. الگى جەردە وتىرعانداردىڭ ىشىندە دەنى دۇرىس ادامدار بار سياقتى كورىنگەن. كەزىندە كەيبىرىن تۇككە تۇرعىسىز سول شارۋانى تاستاۋعا كوندىرۋگە تىرىسىپ كورگەنمىن. بىراق ولار باس تارتتى، ءالى جۇمىس ىستەپ ءجۇر. ول جاقتاعى جايتتارعا بەي-جاي قارامايتىن مارات بۋركحارد دەگەن بلوگەر جىگىت قانا بار. كەزىندە ەكەۋىمىز قاتار جۇمىس ىستەگەنبىز، قازىر سويلەسىپ تۇرامىز. ول دا سۇحبات بەرەدى. بۇل قۇبىلىستىڭ قىر-سىرىن جۇرگەن جەرىمىزدە ايتىپ كەلەمىز. قازىر جالعىز سول جىگىتپەن عانا ارالاسامىن.

– بۇرىنعى ارىپتەستەرىڭىزدەن ەشقانداي اقپارات المايسىز با؟

رەسەيدىڭ سانكت-پەتەربۋرگ قالاسىنداعى «ينتەرنەت-زەرتتەۋلەر» كومپانياسىنىڭ كەڭسەسى ورنالاسقان عيمارات.

– بۇل سۇراعىڭىزعا جاۋاپ بەرە المايمىن. ويتكەنى، مۇمكىن ول جاقتا ترولل بولىپ جالدانىپ ەمەس، مەن سياقتى اقپارات جيناۋ ماقساتىمەن وتىرعاندار بار شىعار. باسقا ەشتەڭە ايتا المايمىن.

– ال الگى ۇيىمدى قانداي ماقساتپەن سوتقا بەردىڭىز؟

– بۇگىن وسى تاقىرىپقا جازىلعان ماقالانى وقىدىم. كەيبىر تۇستارى دۇرىس اشىلماعان. ادۆوكات يۆان پاۆلوۆ باسقاراتىن «29» كومپانياسى زاڭگەرلەرىمەن كەڭەسىپ، الگىلەردى اشكەرەلەۋدىڭ ازىرشە جالعىز امالى – ەڭبەك زاڭىن بۇزعانى ءۇشىن سوتقا بەرۋ دەپ شەشتىك. ويتكەنى، ول فابريكا جۇزدەگەن ادامدى جيناپ العان، بىراق ولاردى جۇمىسقا رەسمي تۇردە قابىلدامايدى، جاقپاسا – جۇمىستان شىعارىپ جىبەرەدى، جالاقىسىن تولەمەي قويادى، ايىپپۇل سالادى. سالىق تا تولەمەيدى. جالاقىنى قولما قول اقشامەن بەرەدى. ءتىپتى كونۆەرت تە جوق. اقشانى بۋحگالتەردىڭ قولىنان الاسىڭ. ال بۇل ءتيىستى ورگانداردىڭ نازارىنا ىلىنبەيتىن «ارام جالاقى» ەكەنى تۇسىنىكتى. مەملەكەتتىڭ قىرۋار اقشادان قاعىلىپ جاتقانىنا بيلىك پەن قوعام نازارىن اۋدارعىم كەلەدى.

ادۆوكات يۆان پاۆلوۆتىڭ «29» توبى زاڭگەرى داريا سۋحيح الداعى سوت پروتسەسىنىڭ نەگىزگى ماقساتى بولەك ەكەنىن ايتادى.

– ءبىز مۇنى زاڭ تۇرعىسىنان بىلاي نەگىزدەمەكپىز. كەزىندە ليۋدميلا الگى «تروللدار فابريكاسىنا» جۇمىسقا ورنالاسقان. جۇمىس بەرۋشىلەر ونىمەن ەڭبەك قاتىناسىن رەسمي تۇردە رەسىمدەمەگەن. بىراق، ەڭبەك كودەكسىنە سايكەس، قىزمەتكەر ءوز مىندەتىنە كىرىسكەن ساتتەن باستاپ ۇيىمدا جۇمىس ىستەيدى دەپ سانالادى. دەمەك، ونداي قىزمەتكەر ەڭبەك زاڭىندا قاراستىرىلعان بارلىق نورمالاردى پايدالانۋعا قۇقىلى. ليۋدميلانىڭ جۇمىسقا ورنالاسقانى قۇجات جۇزىندە رەسىمدەلمەگەن. سوڭعى جۇمىس كۇنى وعان ۋادە ەتىلگەن جالاقىنى تولىق تولەمەگەن. الگى فابريكا جايلى اقپارات جيناعانى ءۇشىن ەشقانداي اقشا تولەمەستەن، ونى جۇمىستان شىعارىپ جىبەرگەن. سول مەكەمەنىڭ نەمەن اينالىساتىنىن ءبىلۋ ءۇشىن جۇمىسقا كىرگەن، ال كەيىن ولار بۇل ماقساتىن سەزىپ قالىپ، ونى جۇمىستان شىعارىپ جىبەرگەن. ازىرشە تالاپ ارىزىمىزدا «ەڭبەك ەتۋ قۇقىن قورعاۋدى، ونى جۇمىسقا قابىلداۋدى دا، جۇمىستان شىعارۋدى دا قۇجات جۇزىندە رەسىمدەپ، جالاقىسىن تولەۋدى تالاپ ەتەمىز» دەپ بەردىك. بىراق، شىن مانىندە، نەگىزگى ماقساتىمىز بۇل ەمەس. ليۋدميلا دا، ءبىزدىڭ كوماندامىز دا جۇرتقا الگى ۇيىمنىڭ شىن بەينەسىن كورسەتكىمىز كەلەدى ءارى زاڭ مەن سوت الدىندا ءوزىنىڭ نەمەن اينالىساتىنىن جاريا تۇردە ءتۇسىندىرۋىن تالاپ ەتەمىز.