كەلەسى جىلى فرانتسيادا وتەتىن ەۋروپا چەمپيوناتىنىڭ ىرىكتەۋ تۋرنيرىندە چەحيا، يسلانديا، نيدەرلاند، تۇركيا جانە لاتۆيامەن بىرگە «A» توبىنا تۇسكەن قازاقستان قۇراماسى بەس ويىننان ءبىر-اق ۇپاي جيناپ سوڭعى ورىندا تۇر. كەيىنگى ون شاقتى جىل ىشىندە گوللانديالىق جانە گەرمانيالىق باپكەرلەر جاتتىقتىرعان قۇراماعا بىلتىر رەسەيلىك مامان يۋري كراسنوجان باس باپكەر بولىپ تاعايىندالعان.

سپورت كوممەنتاتورى ەسەي جەڭىسۇلى. سۋرەت جەكە مۇراعاتتان الىندى.

سوڭعى 12 ىرىكتەۋ ويىنى مەن جولداستىق كەزدەسۋىندە ۇلتتىق قۇراما ەكى رەت جەڭىپ (تەك جولداستىق كەزدەسۋلەر), بەس رەت تەڭ ويناپ، بەس رەت ۇتىلعان. بىراق كەيبىر جەرگىلىكتى سپورت ساراپشىلارى كراسنوجاننىڭ تۇسىندا كوماندانىڭ دەڭگەيى ءوستى دەپ سانايدى.

- يۋري كراسنوجان جاتتىقتىرعالى قازاقستان قۇراماسى لاتىشتارمەن تەڭ ءتۇستى، گوللانديادان، يسلانديادان ۇتىلدى، تۇركيادان سىرت الاڭدا ۇتىلدى. ءوزىم ۇلتتىق قۇرامامەن بىرگە ءجۇرىپ، ويىندارىن كوردىم. بەرن شتورك، ياروسلاۆ بەرانەك جاتتىقتىرعان كەزدەگىدەي ەمەس، قازىر قازاقستان كومانداسىندا مىنەز دە، پروگرەسس تە بار، – دەيدى سپورت شولۋشىسى ءھام فۋتبول كوممەنتاتورى ەسەي جەڭىسۇلى.

قازاقستان بۇعان دەيىن تۇركيامەن فۋتبول تۋرنيرلەرىندە بەس مارتە كەزدەسكەن. بۇل ويىنداردىڭ ەسەپتەرىنە قاراعاندا قازاقستان قۇراماسىنىڭ كورسەتكىشتەرى ازداپ جاقسارىپ كەلە جاتقانى بايقالادى. مىسالى، 2004-2005 جىلدارى تۇركيا 4-0 جانە 6-0 سياقتى ءىرى ەسەپپەن ۇتسا، 2010-2011 جىلعى ويىنداردا قازاقستان اۋەلى ءوز الاڭىندا 0-3 ەسەبىمەن ۇتىلعانىمەن، سىرت الاڭدا سوڭعى مينۋتتا عانا قاقپاسىنا دوپ جىبەرىپ الىپ 1-2 ەسەبىمەن ارەڭ جەڭىلدى. بىلتىر ستامبۋلدا وتكەن سوڭعى ماتچتا قازاقستان 1-3 بولىپ ۇتىلدى.

الايدا ساراپشىلار اراسىندا الەم جانە ەۋروپا چەمپيوناتتارىنىڭ قولا جۇلدەسىن يەلەنىپ ۇلگەرگەن تاجىريبەلى تۇرىكتەر قازاقستاندىقتاردى بۇل جولى دا قاپى قالدىرادى-اۋ دەگەن پىكىر باسىم.

سپورت ءجۋرناليسى راۋان وقاس.

- تۇركيا ءتۋرنيردى ءساتسىز باستاعانىمەن، سوڭعى ويىندارى جاقسى ءوتتى. بۇرىن 16 كوماندا قاتىسسا، فرانتسيادا وتەتىن ەۋروپا بىرىنشىلىگىنە 24 كوماندا قاتىسقالى وتىر. سوندىقتان تۇركيا قالعان بەس ويىندا ۇپاي جوعالتپاۋعا تىرىسادى، – دەيدى سپورت ءجۋرناليسى راۋان وقاس.

ەسەي جەڭىسۇلىنىڭ پىكىرىنشە، كەرىسىنشە، ءدال قازىر قازاقستان قۇراماسى ءۇشىن ۇستەم تۇسەتىن جاعداي تۋىپ تۇر.

- تۇركيا قۇراماسىندا قازىر بۋىن الماسۋ پروتسەسى ءجۇرىپ جاتىر. ويىنشىلارىنىڭ كوبى تۇركيا ليگاسىنداعى ءتورتىنشى-بەسىنشى كوماندالاردان قۇرالعان. جەكەلەي العاندا وتە مىقتى ويىنشىلارى بار، بىراق ولارعا قازاقستاننىڭ كوماندالىق ويىن ستراتەگياسىن قارسى قويۋىنا بولادى، – دەيدى ول.

دەگەنمەن ساراپشى تۇركيانىڭ «ەۋروپا فۋتبولىنا كىرىگۋ پروتسەسىنەن ءوتىپ كەتكەن كوماندا» ەكەنىن، قازاقستان قۇراماسىنداعى شابۋىل شەبىنىڭ ناشارلىعىن جانە كەيبىر نەگىزگى شابۋىلشىلارىنىڭ جاراقات العانىن ەسكەرۋ كەرەك دەپ ويلايدى.

2008 جىلعى ەۋروپا چەمپيوناتىنا ىرىكتەۋ كەزەڭىندەگى تۇركيا-پورتۋگاليا كەزدەسۋىنىڭ ءبىر ءساتى. شۆەيتساريا، جەنەۆا، 7 ماۋسىم 2008 جىل. (كورنەكى سۋرەت)

«تۇركيا قۇراماسىنىڭ فۋتبولداعى التىن كەزەڭى ارتتا قالدى» دەپ سانايتىن سپورت ساراپشىسى ەرجان كوشكىمباەۆ ماۋسىمنىڭ 12-ءسى كۇنى الماتىداعى «ورتالىق ستاديوندا» وتەتىن ماتچتا تۇرىكتەردىڭ بارىن سالاتىنىنا سەنىمدى.

- ولار (تۇركيا قۇراماسى – رەد.) ەۋروپا چەمپيوناتىنىڭ فينالدىق كەزەڭىنە شىعۋ ءۇشىن ەندىگى ويىندارىن تۇگەل ۇتۋى كەرەك. دەگەنمەن تەڭ ناتيجەگە جەتۋگە مۇمكىندىك بار. قازاقستان جەڭسە – سەنساتسيا، – دەيدى ساراپشى.

قازاقستانداعى بىرقاتار فۋتبول ساراپشىلارى مەن جانكۇيەرلەرى مۇنداي سەنساتسيانىڭ بولارىنا كۇماندى. ءوز الاڭىندا وتكىزگەن رەسمي ماتچتا سوڭعى رەت قازاقستان 2013 جىلعى قىركۇيەكتە فارەر ارالدارىن جەڭگەن. مۇنداي ۇزاق ءۇزىلىستىڭ ءبىر سەبەبىن ەرجان كوشكىمباەۆ اتادى.

- وكىنىشكە قاراي سوڭعى 10 جىلدان بەرى ۇلتتىق قۇرامانىڭ دامىعانىن كورمەدىم. «بالالار مەن جاسوسپىرىمدەر مەكتەبىن دامىتامىز» دەگەن سوزدەن ناتيجە جوق. برازيلياعا كەتكەن جاستارىمىزدان (قازاقستان فۋتبول فەدەراتسياسى برازياليالىق كلۋبتاردىڭ اكادەمياسىنا وقۋعا جىبەرگەن جاسوسپىرىمدەر – رەد.) ەشنارسە شىققان جوق. ماسەلەن، كورشىلەس وزبەكستاننىڭ رەسەي پرەمەر-ليگاسىندا بىرنەشە ويىنشىسى بار. ەۋروپادا جۇرگەندەرى دە جەتەدى. بىلتىر وزبەكستان الەم چەمپيوناتىنىڭ فينالىنا شىعۋعا ءبىر عانا قادام قالدى. ال قازاقستان فۋتبولشىلارىنا شەت ەلدەرگە شىعۋ ءۇشىن شەبەرلىك تە كەرەك، ءارى فۋتبولشىلاردى تانىتاتىن مەنەدجەرلىك جۇيە دە قاجەت، – دەيدى ول.

قازاقستان فۋتبول قۇراماسىنىڭ باس باپكەرى يۋري كراسنوجان.

ايتكەنمەن الماتىلىق مىڭداعان جانكۇيەر بۇل جولعى قازاقستان-تۇركيا ماتچىنىڭ الدىندا ەرەكشە كوڭىل-كۇي كەشىپ ءجۇر. ماتچقا دەيىن بىرنەشە كۇن قالعاندا-اق كوشەلەردە تۋ جامىلعان فاناتتار ۇشىراسا باستادى. بۇل كوڭىل-كۇيدى بەيسەنبى كۇنى ءباسپاسوز-ءماسليحاتىن وتكىزگەن يۋري كراسنوجان دا اتاپ ءوتتى. ونىمەن كەزدەسۋگە كەلگەن قاراسى قالىڭ جۋرناليستەر مەن جانكۇيەرلەرگە قاراپ تۇرىپ باس باپكەر:

- ۇلتتىق قۇرامانىڭ ويىنى الدىندا وسىنداي اجيوتاج تۋعانىن ءبىرىنشى رەت كورىپ تۇرمىن. الماتىعا مەرەكە قايتىپ ورالدى، – دەدى.

باس باپكەر ءوز فۋتبولشىلارى تۇركيا فۋتبولشىلارىنان ينديۆيدۋالدىق تۇرعىدا كەم تۇسپەيدى دەپ سانايدى. كراسنوجاننىڭ پىكىرىنشە، «ويىندى ساۋاتتى ۇيىمداستىرا السا جانە جانكۇيەرلەر قولداۋىنا سۇيەنسە»، قازاقستاننىڭ جەڭۋى دە مۇمكىن.

قازاقستان – تۇركيا ماتچى الماتىداعى «ورتالىق ستاديوندا» جۇما كۇنى تۇنگى ساعات 22.00-دە باستالادى.

ماتەريالدى دايىنداۋعا اسىلحان ماماشۇلى قاتىستى.