Kelesi jılı Franciyada ötetin Europa çempionatınıñ irikteu turnirinde Çehiya, Islandiya, Niderland, Türkiya jäne Latviyamen birge «A» tobına tüsken Qazaqstan qwraması bes oyınnan bir-aq wpay jinap soñğı orında twr. Keyingi on şaqtı jıl işinde gollandiyalıq jäne germaniyalıq bapkerler jattıqtırğan qwramağa bıltır reseylik maman YUriy Krasnojan bas bapker bolıp tağayındalğan.

Sport kommentatorı Esey Jeñiswlı. Suret jeke mwrağattan alındı.

Soñğı 12 irikteu oyını men joldastıq kezdesuinde wlttıq qwrama eki ret jeñip (tek joldastıq kezdesuler), bes ret teñ oynap, bes ret wtılğan. Biraq keybir jergilikti sport sarapşıları Krasnojannıñ twsında komandanıñ deñgeyi östi dep sanaydı.

- YUriy Krasnojan jattıqtırğalı Qazaqstan qwraması latıştarmen teñ tüsti, Gollandiyadan, Islandiyadan wtıldı, Türkiyadan sırt alañda wtıldı. Özim wlttıq qwramamen birge jürip, oyındarın kördim. Bern Ştork, YAroslav Beranek jattıqtırğan kezdegidey emes, qazir Qazaqstan komandasında minez de, progress te bar, – deydi sport şoluşısı häm futbol kommentatorı Esey Jeñiswlı.

Qazaqstan bwğan deyin Türkiyamen futbol turnirlerinde bes märte kezdesken. Bwl oyındardıñ esepterine qarağanda Qazaqstan qwramasınıñ körsetkişteri azdap jaqsarıp kele jatqanı bayqaladı. Mısalı, 2004-2005 jıldarı Türkiya 4-0 jäne 6-0 siyaqtı iri eseppen wtsa, 2010-2011 jılğı oyındarda Qazaqstan äueli öz alañında 0-3 esebimen wtılğanımen, sırt alañda soñğı minutta ğana qaqpasına dop jiberip alıp 1-2 esebimen äreñ jeñildi. Bıltır Stambulda ötken soñğı matçta Qazaqstan 1-3 bolıp wtıldı.

Alayda sarapşılar arasında Älem jäne Europa çempionattarınıñ qola jüldesin ielenip ülgergen täjiribeli türikter qazaqstandıqtardı bwl jolı da qapı qaldıradı-au degen pikir basım.

Sport jurnalisi Rauan Oqas.

- Türkiya turnirdi sätsiz bastağanımen, soñğı oyındarı jaqsı ötti. Bwrın 16 komanda qatıssa, Franciyada ötetin Europa birinşiligine 24 komanda qatısqalı otır. Sondıqtan Türkiya qalğan bes oyında wpay joğaltpauğa tırısadı, – deydi sport jurnalisi Rauan Oqas.

Esey Jeñiswlınıñ pikirinşe, kerisinşe, däl qazir Qazaqstan qwraması üşin üstem tüsetin jağday tuıp twr.

- Türkiya qwramasında qazir buın almasu procesi jürip jatır. Oyınşılarınıñ köbi Türkiya ligasındağı törtinşi-besinşi komandalardan qwralğan. Jekeley alğanda öte mıqtı oyınşıları bar, biraq olarğa Qazaqstannıñ komandalıq oyın strategiyasın qarsı qoyuına boladı, – deydi ol.

Degenmen sarapşı Türkiyanıñ «Europa futbolına kirigu procesinen ötip ketken komanda» ekenin, Qazaqstan qwramasındağı şabuıl şebiniñ naşarlığın jäne keybir negizgi şabuılşılarınıñ jaraqat alğanın eskeru kerek dep oylaydı.

2008 jılğı Europa çempionatına irikteu kezeñindegi Türkiya-Portugaliya kezdesuiniñ bir säti. Şveycariya, Jeneva, 7 mausım 2008 jıl. (Körneki suret)

«Türkiya qwramasınıñ futboldağı altın kezeñi artta qaldı» dep sanaytın sport sarapşısı Erjan Köşkimbaev mausımnıñ 12-si küni Almatıdağı «Ortalıq stadionda» ötetin matçta türikterdiñ barın salatınına senimdi.

- Olar (Türkiya qwraması – red.) Europa çempionatınıñ finaldıq kezeñine şığu üşin endigi oyındarın tügel wtuı kerek. Degenmen teñ nätijege jetuge mümkindik bar. Qazaqstan jeñse – sensaciya, – deydi sarapşı.

Qazaqstandağı birqatar futbol sarapşıları men janküyerleri mwnday sensaciyanıñ bolarına kümändi. Öz alañında ötkizgen resmi matçta soñğı ret Qazaqstan 2013 jılğı qırküyekte Farer araldarın jeñgen. Mwnday wzaq üzilistiñ bir sebebin Erjan Köşkimbaev atadı.

- Ökinişke qaray soñğı 10 jıldan beri wlttıq qwramanıñ damığanın körmedim. «Balalar men jasöspirimder mektebin damıtamız» degen sözden nätije joq. Braziliyağa ketken jastarımızdan (Qazaqstan futbol federaciyası braziyaliyalıq klubtardıñ akademiyasına oquğa jibergen jasöspirimder – red.) eşnärse şıqqan joq. Mäselen, körşiles Özbekstannıñ Resey prem'er-ligasında birneşe oyınşısı bar. Europada jürgenderi de jetedi. Bıltır Özbekstan älem çempionatınıñ finalına şığuğa bir ğana qadam qaldı. Al Qazaqstan futbolşılarına şet elderge şığu üşin şeberlik te kerek, äri futbolşılardı tanıtatın menedjerlik jüye de qajet, – deydi ol.

Qazaqstan futbol qwramasınıñ bas bapkeri YUriy Krasnojan.

Äytkenmen almatılıq mıñdağan janküyer bwl jolğı Qazaqstan-Türkiya matçınıñ aldında erekşe köñil-küy keşip jür. Matçqa deyin birneşe kün qalğanda-aq köşelerde tu jamılğan fanattar wşırasa bastadı. Bwl köñil-küydi beysenbi küni baspasöz-mäslihatın ötkizgen YUriy Krasnojan da atap ötti. Onımen kezdesuge kelgen qarası qalıñ jurnalister men janküyerlerge qarap twrıp bas bapker:

- Wlttıq qwramanıñ oyını aldında osınday ajiotaj tuğanın birinşi ret körip twrmın. Almatığa mereke qaytıp oraldı, – dedi.

Bas bapker öz futbolşıları Türkiya futbolşılarınan individualdıq twrğıda kem tüspeydi dep sanaydı. Krasnojannıñ pikirinşe, «oyındı sauattı wyımdastıra alsa jäne janküyerler qoldauına süyense», Qazaqstannıñ jeñui de mümkin.

Qazaqstan – Türkiya matçı Almatıdağı «Ortalıq stadionda» jwma küni tüngi sağat 22.00-de bastaladı.

Materialdı dayındauğa Asılhan Mamaşwlı qatıstı.