اقش-تىڭ بەدەلدى اسكەري اكادەمياسى ۆەست-پوينتتا ءتورت جىل ءبىلىم العان ماقسات نۇعمانوۆ پەن اۆياتسيا اكادەمياسىنا ءبىلىم الۋعا ەندى بارا جاتقان ۆلاديسلاۆ گوگۋلياعا ماۋسىمنىڭ 15-ءى كۇنى قازاقستانداعى اقش-ەلشىسى دجوردج كرول ارنايى سەرتيفيكاتتار تاپسىردى. قورعانىس مينيسترلىگىنىڭ ماماندارى اقش-تان كەلگەن جاستاردىڭ ەندى جۇمىسسىز قالمايتىنىن ايتادى.

اقتوبە وبلىسىنىڭ تۋماسى ماقسات نۇعمانوۆ ۆەست-پوينت اكادەمياسىنا 17 جاسىندا تۇسكەن. وعان دەيىن استاناداعى نازارباەۆ زياتكەرلىك مەكتەبىندە وقىعان. ماتەماتيكانى وتە جاقسى كورگەندىكتەن ۆەست-پوينت اكادەمياسىندا ينجەنەرلىك ءتارتىپ (ديستسيپلينا) بويىنشا ءبىلىم العان. ينجەنەرلىك جۇيەگە قاتىستى قوسالقى اۆتورلىقپەن جازعان عىلىمي جۇمىسى دا جاريالانعان. ماقسات ازاتتىققا اقش-تا وقۋعا ءتۇسۋ، ءبىلىم الۋ قيىن بولعاندىقتان وسى ەلدى ادەيى تاڭداعانىن، سول قيىندىقتى جەڭىپ شىققىسى كەلگەنىن ايتتى.

قازاقستانداعى اقش ەلشىسى دجوردج كرول ۆەست-پوينت اكادەمياسىنا ءتۇسۋ وتە قيىن ەكەنىن، بىراق، وقۋ ورنىنىڭ بەدەلى جوعارى ەكەنىن اتاپ ءوتتى. ەلشىنىڭ ايتۋىنشا، ەكى ءجۇز جىلدىق تاريحى بار وسى اكادەميانىڭ تۇلەكتەرى ىشىندە اقش-تىڭ ەكى پرەزيدەنتى (ۋليسس گرانت پەن دۋايت ەيزەنحاۋەر) جانە دە باسقا ەلدەردىڭ جەتەكشىلەرى بار.

اقش-تىڭ ۆەست-پوينت اسكەري اكادەمياسىن بىتىرگەن ماقسات نۇعمانوۆ (سول جاقتا) پەن اقش اسكەري اكادەمياسىنا وقۋعا تۇسكەن ۆلاديسلاۆ گوگۋليا سەرتيفيكات تابىستاۋ سالتاناتىندا. استانا، 15 ماۋسىم 2015 جىل.

دجوردج كرول ماقسات نۇعمانوۆتىڭ العان ءبىلىمى مەن تاجىربيەسى قازاقستان ءۇشىن پايدالى بولادى دەپ ۇمىتتەنەدى. ال قورعانىس مينيسترلىگىنىڭ ءبىلىم جانە عىلىم دەپارتامەنت جەتەكشىسى ايگۇل تولەمباەۆا “وتكەننەن ساباق العاندارىن” ايتادى. ونىڭ مەڭزەپ وتىرعان «ساباعى» اقش-تا اسكەري ءبىلىم الىپ كەلىپ، ەلدە باسقا سالادا جۇمىس ىستەپ كەتكەندەرگە قاتىستى. وسى كۇنگە دەيىن اقش-تىڭ جوعارى اسكەري ءبىلىم ورداسىندا 7 ادام (ماقسات نۇعمانوۆتى قوسا ەسەپتەگەندە) وقىپ كەلگەن. بىراق، ونىڭ ءبارى قازاقستانداعى اسكەري سالادا قىزمەت ەتپەيدى ەكەن.

– قورعانىس سالاسىنا قىزمەت ەتپەيتىندەر بار. ولار (اقش-تا وقىپ كەلگەندەر) وتە ءبىلىمدى. ءتىلدى (اعىلشىن ءتىلىن) بىلەدى، ماتەماتيكالىق، ينجەنەرلىك ماماندىقتى مەڭگەرگەن. ۇلتتىق، شەتەلدىك كومپانيالار ولارعا وتە جاقسى ايلىق ۇسىنادى. سول جەرلەردە ەلگە پايداسىن تيگىزىپ جاتىر. قورعانىس مينيسترلىگى مۇنداي جاستاردى ۇستاپ قالۋعا بارلىق جاعدايدى جاساپ جاتىر،– دەيدى تولەمباەۆا.

ال ەلگە جۋىردا عانا ورالعان ماقسات نۇعمانوۆ قورعانىس مينيسترلىگى وزىنە قانداي جۇمىس ۇسىناتىنىنان ازىرگە بەيحابار.

اقش-تىڭ اسكەري اۆياتسيا اكادەمياسىندا 4 جىلعا ءبىلىم الۋعا بارا جاتقان ۆلاديسلاۆ گوگۋليا ەلگە ورالعاندا «قاجەتتى مامان» بولاتىنىنا سەنىمدى. الماتىداعى «ارىستان» ارناۋلى ليتسەيىندە وقىعان ۆلاديسلاۆ گوگۋليا جاقىن جەردەگى رەسەي ەمەس، الىستاعى اقش-تاعى وقۋ ورنىن تاڭداۋ ارقىلى ءبىلىم ساپاسىن كۇشەيتىپ، اعىلشىن ءتىلىن ۇيرەنگىسى كەلگەنىن ايتتى.

قورعانىس ءمينيسترىنىڭ ورىنباسارى بولعان گەنەرال امىربەك توعىسوۆ جاستاردىڭ اقش، تۇركيا، فرانتسيا مەن قىتاي سياقتى ەلدەردە اسكەري ءبىلىم العانى پايدالى دەگەن پىكىردە.

– بىزدەگى اسكەري جاتتىعۋلار مەن تاكتيكا، اسكەري ينستيتۋتتاردىڭ قۇرىلىمى رەسەيدىكىنەن اۋمايدى. بىردەي دەسە دە بولادى. جاستاردى وزگە دە سىرت ەلدەردە وقىتىپ، جيناعان ءبىلىمى مەن تاجىربيەلەرىن پايدالانىپ، قورعانىس سالاسىن جەتىلدىرە بەرۋ كەرەك، – دەيدى توعىسوۆ.

اقش-تاعى اسكەري اكادەميالار 1983 جىلدان باستاپ شەتەلدىك ستۋدەنتتەردى قابىلداي باستاعان. ءار اسكەري اكادەميادا ءبىر جىلدا شەتەلدىك 60 ستۋدەنت قانا وقي الادى. جانە ءبىر مەملەكەتتەن كەلگەن ستۋدەنت سانى تورتتەن اسپاۋى ءتيىس. وقۋ مەرزىمى – ءتورت جىل. ءبىلىم اقىسى –تەگىن. قازىر اقش-تىڭ اسكەري اكادەميالارىندا قازاقستاندىق 10 ستۋدەنت ءبىلىم الىپ جاتىر. ونىڭ ەكەۋى – قىز بالا.

ازاتتىق راديوسى