سوۆەت وداعىنىڭ باتىرى، عارىشكەر توقتار اۋباكىروۆ كەڭەس وداعى كەزىندە قازاقستان اۋماعىندا جاپپاي قىرىپ-جويۋ قارۋلارىنىڭ، اسكەري زىمىراندار تۇرلەرىنىڭ ءسان مارتە سىنالعانىن، اسىرەسە، بەتپاقدالا مەن ارال تەڭىزىندەگى بارساكەلمەس ارالى اۋدانىندا جۇرگىزىلگەن سىناقتاردى، سول كەزەڭدە دە گەپتيل وتىنىن كەڭ قولدانعان ەسكە سالىپ، ەلىمىزدە كيىكتەردىڭ جاپپاي قىرىلۋ سەبەبىن ءتۇسىندىردى. ول “استانا ارناسى” تىلشىلەرىنە:

“گەپتيل – وتە ۋلى زات. ول سۋدا دا، توپىراقتا دا كوپتەگەن ۋاقىت بويى ساقتالادى. گەپتيلدىڭ ءسىڭىپ، ەرىپ كەتۋ مەرزىمى وتە ۇزاق. ۋلى زات ءتىرى ورگانيزمگە تۇسسە، ىشكى قۇرىلىستىڭ ءبارىن كۇيدىرىپ جىبەرەدى. كەزىندە ورىس ماماندارى گەپتيلدىڭ زالالسىز ەكەنىن ايتىپ، ءتىپتى، “ول تيگەن سۋدىڭ ءوزىن ىشۋگە بولادى، قاۋىپسىز” دەگەن قاۋەسەت تاراتقان ەدى. وزدەرىنە ىشكىزىپ كورەر ەدىم مەن. مەنىڭ ايتارىم، قازاقستاننىڭ بەتپاقدالاسىندا گەپتيل قالدىقتارى وتە كوپ. كيىكتەردىڭ جاپپاي قىرىلۋ سەبەبى وسىدان بولۋى مۇمكىن. كەزىندە قازاق جەرىندە ءتۇرلى سىناقتار ءوتتى. بارلىعى دا سونىڭ جاڭعىرىعى دەر ەدىم. بىراق بۇنىڭ ءبارى تەك مەنىڭ ءوز پىكىرىم”، – دەپ كوزقاراسىن ءبىلدىردى.

سونىمەن قاتار، توقتار اۋباكىروۆ قىركۇيەكتە عارىشقا اتتانعالى جاتقان قازاقستاندىق ۇشقىش ايدىن ايىمبەتوۆ تۋرالى دا پىكىرىن ايتقان. ايتۋىنشا، ۇمىتكەر عارىشقا العاش رەت اتتانعالى وتىرسا دا، قازاقستان رەسپۋبليكاسى عارىشكەرى اتاعىن الىپ ۇلگەرگەن، استرونوميا عىلىمدارىن تەرەڭ وقىعان، ءارى بولاشاق عارىشكەرلەرگە ءدارىس بەرىپ جۇرگەن مامان.

“تاعى ءبىر ەرەكشەلىگى ايدىن ايىمبەتوۆ – قازاق ازاماتتىعى بار العاشقى عارىشكەر. بۇل ءبىزدىڭ وتاندىق عارىش اگەنتتىگىنىڭ ەڭ ۇلكەن جەتىستىگى دەر ەدىم. ولار وزدەرىنىڭ پوزيتسياسىن ۇستانىپ، جاقسى جۇمىس تىندىرا ءبىلدى. ارينە، اعىلشىن ءتۋريستىنىڭ ۇشۋدان باس تارتقانى دا بىزگە ءتيىمدى بولدى. قۇداي قالاسا، ايدىن ايىمبەتوۆ وسى قىركۇيەكتە عارىشقا اتتانادى. بۇل ۇلكەن جەتىستىك. ول ءوزى بىلىكتى مامان. بۇل ساپارعا ول بۇرىننان ءازىر بولاتىن. كەزىندە عارىشكەرلەر كومانداسىنا ايدىن مەن مۇحتار ايماحانوۆ ىرىكتەلگەن ەدى. قازىر مۇحتار رەسەيلىك عارىشكەرلەر قاتارىندا ءوز كەزەگىن كۇتىپ وتىر. ال ايدىن، مەن جانە تالعاتتىڭ جولىن قۋىپ، قازاق ازاماتتىعى بار العاشقى عارىشكەر اتانعالى وتىر”، – دەگەن توقتار اۋباكىروۆ ءوز سۇحباتىندا.

ەستەرىڭىزگە سالساق، جەرلەسىمىز ايدىن ايىمبەتوۆتىڭ بيىلعى جىلى قىركۇيەكتە عارىشقا ۇشاتىنى تۋرالى حابار جاقىندا عانا جاريالانعان ەدى. كيىك قىرعىنىنا عارىشقا ستانتسيالاردى تاسىپ جۇرگەن زىمىرانداردىڭ وتىنى زارار كەلتىرىپ جاتىر دەپ قانشا تۋلاساق تا، ايىمبەتوۆتىڭ عارىشقا ۇشاتىنىن ەستىپ، بارشامىز قۋانعان بولاتىنبىز.

Abai.kz