Sovet odağınıñ batırı, ğarışker Toqtar Äubäkirov Keñes Odağı kezinde Qazaqstan aumağında jappay qırıp-joyu qarularınıñ, äskeri zımırandar türleriniñ sän märte sınalğanın, äsirese, Betpaqdala men Aral teñizindegi Barsakelmes aralı audanında jürgizilgen sınaqtardı, sol kezeñde de geptil otının keñ qoldanğan eske salıp, Elimizde kiikterdiñ jappay qırılu sebebin tüsindirdi. Ol “Astana arnası” tilşilerine:

“Geptil – öte ulı zat. Ol suda da, topıraqta da köptegen uaqıt boyı saqtaladı. Geptildiñ siñip, erip ketu merzimi öte wzaq. Ulı zat tiri organizmge tüsse, işki qwrılıstıñ bärin küydirip jiberedi. Kezinde orıs mamandarı geptildiñ zalalsız ekenin aytıp, tipti, “Ol tigen sudıñ özin işuge boladı, qauipsiz” degen qaueset taratqan edi. Özderine işkizip körer edim men. Meniñ aytarım, Qazaqstannıñ Betpaqdalasında geptil qaldıqtarı öte köp. Kiikterdiñ jappay qırılu sebebi osıdan boluı mümkin. Kezinde qazaq jerinde türli sınaqtar ötti. Barlığı da sonıñ jañğırığı der edim. Biraq bwnıñ bäri tek meniñ öz pikirim”, – dep közqarasın bildirdi.

Sonımen qatar, Toqtar Äubäkirov qırküyekte ğarışqa attanğalı jatqan qazaqstandıq wşqış Aydın Ayımbetov turalı da pikirin aytqan. Aytuınşa, ümitker ğarışqa alğaş ret attanğalı otırsa da, Qazaqstan Respublikası ğarışkeri atağın alıp ülgergen, astronomiya ğılımdarın tereñ oqığan, äri bolaşaq ğarışkerlerge däris berip jürgen maman.

“Tağı bir erekşeligi Aydın Ayımbetov – qazaq azamattığı bar alğaşqı ğarışker. Bwl bizdiñ otandıq Ğarış agenttiginiñ eñ ülken jetistigi der edim. Olar özderiniñ poziciyasın wstanıp, jaqsı jwmıs tındıra bildi. Ärine, ağılşın turistiniñ wşudan bas tartqanı da bizge tiimdi boldı. Qwday qalasa, Aydın Ayımbetov osı qırküyekte ğarışqa attanadı. Bwl ülken jetistik. Ol özi bilikti maman. Bwl saparğa ol bwrınnan äzir bolatın. Kezinde ğarışkerler komandasına Aydın men Mwhtar Aymahanov iriktelgen edi. Qazir Mwhtar reseylik ğarışkerler qatarında öz kezegin kütip otır. Al Aydın, men jäne Talğattıñ jolın quıp, qazaq azamattığı bar alğaşqı ğarışker atanğalı otır”, – degen Toqtar Äubäkirov öz swhbatında.

Esteriñizge salsaq, jerlesimiz Aydın Ayımbetovtiñ biılğı jılı qırküyekte ğarışqa wşatını turalı habar jaqında ğana jariyalanğan edi. Kiik qırğınına ğarışqa stanciyalardı tasıp jürgen zımırandardıñ otını zarar keltirip jatır dep qanşa tulasaq ta, Ayımbetovtiñ ğarışqa wşatının estip, barşamız quanğan bolatınbız.

Abai.kz