دەپۋتاتتاردى تۇرعىن ءۇي قۇرىلىس جيناق بانكىنىڭ اشكوزدىگى شوشىتتى
دەپۋتاتتار تاعى تۇرعىنۇي قۇرىلىس جيناق بانكىنە شۇيلىكتى. ماجىلىسمەندەردى نەسيە الۋ ءۇشىن سالىمشىلار جيناۋى ءتيىس العاشقى جارنانىڭ كولەمى شوشىتىپ وتىر دەپ حابارلايدى كتك ارناسى.
سەبەبى بانكتىڭ پاتەر قۇنىنىڭ 50 پايىزىن تالاپ ەتۋى اقىلعا سىيىمسىز ەكەن.
“50 پايىزىن جيناعانشا كىسى قارتايىپ كەتەدى. بولماسا ءولىپ قالادى. دۇنيەجۇزىندە 10 پروتسەنتىن جينايدى سوسىن نەسيە بەرەدى. بىزدە 50 پايىز. جارتىسىن جيناعاسىن عانا نەسيە الامىز. مەنىڭ اقشامدى جيناپ ءۇشىنشى كىسىگە بەرەدى. ول دۇرىس ەمەس. ۇكىمەت اقشا بەرىپ جاتىر. ونى نەگە ۇقىپتاپ بەرمەيدى؟”، – دەيدى ماجىلىس دەپۋتاتى تۇرسىنبەك ومىرزاقوۆ.
مەملەكەتتىك بانكتىڭ اشكوزدىگىنەن حالىقتىڭ ارزان پاتەرگە قولى جەتپەي جاتىر.ۇستەماقىنىڭ كوپتىگىن ايتپاعاندا، كوميسسيانى دا اسپانداتقان تۇرعىن ءۇي قۇرىلىس جيناق بانكىنىڭ باسقا كوممەرتسيالىق بانكتەردەن ەش ايىرماشىلىعى جوق دەيدى ومىرزاقوۆ.
سوندىقتان بيۋدجەتتەن قارجىلاندىرىلاتىن بانكتى ساباسىنا ءتۇسىرۋدى ءوتىنىپ، پرەمەر-ءمينيستردىڭ اتىنا حات جولدادى. ماجىلىسمەندەرگە ارزان پاتەرگە قاتىستى جاڭا تالاپ تا ۇناپ وتىرعان جوق.
ول بويىنشا، ەگەر جاس جۇبايلاردىڭ ءبىرىنىڭ باسقا قالادا تىركەۋدە تۇرعانى انىقتالسا، دەرەۋ تىزىمنەن سىزىلادى ەكەن. ياعني، وتاۋ قۇرعىسى كەپ جۇرگەن قىز-جىگىتتەرگە، بولاشاق تەڭىنىڭ ءبىر قالادان بولۋى ماڭىزدى. دەپۋتاتتار بۇل ەرەجەنى دە الدىرتىپ تاستاۋعا بەكىنىپ وتىر.
ال، ءماجىلىس دەپۋتاتى سۆەتلانا رومانوۆسكايا بۇنىڭ باسقا وبلىسقا قىز بەرىپ، قىز الماۋدى زاڭمەن بەكىتكەنمەن بىردەي ەكەنىن، ماسقارا جاعداي، ءتىپتى كونستيتۋتسياعا قايشى ارەكەت ەكەنىن جەتكىزدى.
nur.kz
پىكىر قالدىرۋ