جاڭالىقتار

قازاقستان رەسپۋبليكاسى سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى – رەسمي وكىلى التاي ابيبۋللاەۆتىڭ مالىمدەمەسى

kerey.kz

 |  Jul 1, 2015

2015 جىلى 28 ماۋسىمدا وزبەكستان شەكارا جاساعى قىزمەتكەرلەرىنىڭ قارۋ قولدانۋى سالدارىنان وتانداسىمىز ءۋاليحان احمەتوۆ وق جاراقاتىنان قازا تاپتى.

وڭتۇستىك قازاقستان وبلىسى، سارىاعاش اۋدانى، قىزىل اسكەر اۋىلىنىڭ تۇرعىنى بولعان ۋ.احمەتوۆتىڭ بارلىق جاقىن-تۋىستارىنا شىن نيەتىمىزدەن كوڭىل ايتامىز.

وقيعا 2015 جىلى 28 ماۋسىمدا ساعات 22.30-دا مەملەكەتتىك شەكارانىڭ قازاقستان-وزبەكستان تەلىمىندەگى №178 شەكارا بەلگىسى اۋماعىندا (وڭتۇستىك قازاقستان وبلىسى، سارىاعاش اۋدانى) ورىن الدى. وزبەكستان شەكارا جاساعى سىرداريا ترانسشەكارالىق وزەنىنەن بالىق اۋلاماقشى بولعان قازاقستان رەسپۋبليكاسىنىڭ ەكى ازاماتىنا قاتىستى قارۋ قولداندى. العان جاراقاتى سالدارىنان ۋ.احمەتوۆ ساعات 23.05-تە كوز جۇمدى.

وسىعان بايلانىستى ءبىز تاباندى قارسىلىعىمىزدى بىلدىرە وتىرىپ، ناتيجەسىندە بەيبىت زاماندا قازاقستان رەسپۋبليكاسى ازاماتتارى مەرت بولاتىن وزبەكستان شەكارا قىزمەتىنىڭ زاڭسىز اتىس قارۋىن پايدالانۋى مەملەكەتتەرىمىز اراسىنداعى ماڭگىلىك دوستىق تۋرالى شارت (31.10.1998) جانە ستراتەگيالىق سەرىكتەستىك تۋرالى شارتقا (14.06.2013) نەگىزدەلگەن دوستىق، تاتۋلاستىق جانە ستراتەگيالىق سەرىكتەستىككە سونداي-اق، شەكارا وكىلدەرىنىڭ قىزمەتى تۋرالى ۇكىمەتارالىق كەلىسىمگە (13.12.2000) قايشى كەلەتىنىن مالىمدەيمىز.

ءبىز بولجالدى ءتارتىپ بۇزۋشىلارعا قاتىستى اتىس قارۋىن قولدانۋ زاڭعا قايشى ءارى جول بەرىلمەيتىن شارا دەگەن ۇستانىمدى قاتاڭ قولدايمىز جانە وزبەكستان تاراپىنان قازاقستان ازاماتىنىڭ قازاسىنا قاتىستى تولىققاندى اقپارات بەرۋىن تالاپ ەتەمىز.

جوعارىدا اتالعان وقيعا بويىنشا وزبەكستان تاراپىنىڭ جان-جاقتى ءارى ايعاقتى تەرگەۋ جۇرگىزىپ، كىنالىلەردى جاۋاپقا تارتۋىن تالاپ ەتەمىز.

ءۋاليحاننىڭ قازاسىنا بايلانىستى قازاقستاننىڭ تاشكەنتتەگى ەلشىلىگى وزبەكستان ءسىم نارازىلىق نوتاسىن ۇسىنۋعا قۇزىرەتتى.

قازاقستان ءسىم شاقىرىلعان وزبەكستان ەلشىسىنە دە اتالمىش نوتا ۇسىنىلاتىن بولادى.