قازۇۋ-دىڭ بيىلعى ءبىتىرۋشىسى اسەل قىدىرباي بەلگىسىز بىرەۋلەر وعان قوقان-لوققى كورسەتىپ جاتقانىن ايتۋدا. ول ءوزى بىتىرگەن وقۋ ورنىنىڭ ءباسپاسوز حاتشىسىن سوتقا بەرەتىنىن NUR.KZ تىلشىسىنە مالىمدەدى.

ءال-فارابي اتىنداعى قازۇۋ ستۋدەنتتەرىنىڭ وقۋ اقىسىنا قاتىستى ماسەلەنى ءبىرىنشى بولىپ باق وكىلدەرىنە ايتقان ستۋدەنت اسەل قىدىرباي NUR.KZ تىلشىسىنە حابارلاسىپ، ءوزى بىتىرگەن وقۋ ورنىنىڭ ءباسپاسوز حاتشىسىن سوتقا بەرەتىنىن ايتتى.

“ۋنيۆەرسيتەتتىڭ ءباسپاسوز حاتشىسى باق وكىلدەرىنە “اسەل قىدىرباي وسى ىستە جابىرلەنۋشى ەمەس، كۇدىكتى رەتىندە تەرگەلىپ جاتىر” دەگەن اقپارات بەرىپتى. بۇنى قالاي تۇسىنەمىز؟ ەگەر قىلمىسقا قاتىسىم بولسا، وسىلاي شاعىمدانىپ، ءوزىمدى ۇستاپ بەرەمىن بە؟ مەن قايتا ءوزىمنىڭ تازا ەكەنىمدى دالەلدەپ شىعۋ ءۇشىن بارلىق قۇقىقتىق ورگاندارعا شاعىم ءتۇسىرىپ، ءىستى تولىق تەرگەپ-تەكسەرۋلەرىن سۇراپ ءجۇرمىن. تاعى دا ايتارىم وقۋ ورنىنىڭ ەسەپشىسى مەنى 1-ءشى كۋرس كەزىمدە ەسەبىمە اقشا سالىپ، وزدەرىنە اكەلىپ بەرۋىمدى سۇرادى. ال گرانتقا 2-ءشى قۋرستا اۋىستىم. ول دا بولسا ءوز كۇشىممەن. ول ۋنيۆەرسيتەتتىڭ گرانتى ەمەس. ەندى قازۇۋ-دىڭ ءباسپاسوز حاتشىسىنىڭ ۇستىنەن ءىىد-نە شاعىم تۇسىرەمىن. نەگە جالعان اقپارات تاراتادى؟ بۇل دەگەن بارىپ تۇرعان ارانداتۋ عوي. كەرەك دەسەڭىز جۇرگىزىلىپ جاتقان تەرگەۋ ءىسىن دە شاتاستىرادى”، – دەيدى ستۋدەنت.

سونداي-اق اسەل سوڭعى كەزدەرى بوتەن ادامدار ءوزىن اڭدىپ جۇرگەنىن ايتادى. بەلگىسىز بىرەۋ جاقىندا عانا جاتاقحانادان پاتەرگە اۋىسقان قىزدىڭ دۇكەنگە شىققانىن اڭدىپ، ەسكەرتۋ ايتىپ كەتىپتى.

“ۇيگە كوشكەنىمە كوپ بولعان جوق. كەشكىسىن ەسىك الدىنداعى ازىق-تۇلىك دۇكەنىنە شىقتىم. قارا دجيپ كولىگى توقتادى. ءتىپتى نومەرى دە جوق. بەلگىسىز ەر كىسى، تولىقتاۋ كەلگەن، قاسىما كەلىپ “جۋرناليستەرگە بارلىق جايتتى جايعانىڭدى قويماساڭ ومىرىڭە قاۋىپ تونەدى. ايتتى عوي ساعان ديپلومىڭ بەرىلەدى دەپ. سول جەتپەيدى مە؟ تۇسىنگەن شىعارسىڭ. قويماساڭ، قيىن بولادى”، – دەپ كەتىپ قالدى. بۇل ماعان جاسالىنىپ جاتقان ءبىرىنشى قوقان-لوققى ەمەس. بۇعان دەيىن دە بەلگىسىز بىرەۋلەر وسىلاي قورقىتقىسى كەلگەن. ماعان وسىنداي قورقىتۋلار جاسالا بەرەتىن بولسا، ءىىد-نە ۋنيۆەرسيتەت باسشىلىعىنىڭ ۇستىنەن شاعىم تۇسىرەمىن. سولاردان باسقا وسىنداي ادامدى ماعان كىم جىبەرۋى مۇمكىن؟”، – دەيدى اسەل.

ال قازىرگە ۋاقىتشا تەرگەۋ اباقتىسىنا جابىلعان قازۇۋ-دىڭ ەسەپشىلەرىنەن حابار جوق. تەرگەۋ جالعاسىپ جاتقان كەزدە ءىىد ەشقانداي اقپارات بەرمەيمىز دەپ وتىر.