QazWU-dıñ biılğı bitiruşisi Äsel Qıdırbay belgisiz bireuler oğan qoqan-loqqı körsetip jatqanın aytuda. Ol özi bitirgen oqu ornınıñ baspasöz hatşısın sotqa beretinin NUR.KZ tilşisine mälimdedi.

Äl-Farabi atındağı QazWU studentteriniñ oqu aqısına qatıstı mäseleni birinşi bolıp BAQ ökilderine aytqan student Äsel Qıdırbay NUR.KZ tilşisine habarlasıp, özi bitirgen oqu ornınıñ baspasöz hatşısın sotqa beretinin ayttı.

“Universitettiñ baspasöz hatşısı BAQ ökilderine “Äsel Qıdırbay osı iste jäbirlenuşi emes, küdikti retinde tergelip jatır” degen aqparat beripti. Bwnı qalay tüsinemiz? Eger qılmısqa qatısım bolsa, osılay şağımdanıp, özimdi wstap beremin be? Men qayta özimniñ taza ekenimdi däleldep şığu üşin barlıq qwqıqtıq organdarğa şağım tüsirip, isti tolıq tergep-tekserulerin swrap jürmin. Tağı da aytarım oqu ornınıñ esepşisi meni 1-şi kurs kezimde esebime aqşa salıp, özderine äkelip beruimdi swradı. Al grantqa 2-şi qursta auıstım. Ol da bolsa öz küşimmen. Ol universitettiñ grantı emes. Endi QazWU-dıñ baspasöz hatşısınıñ üstinen İİD-ne şağım tüsiremin. Nege jalğan aqparat taratadı? Bwl degen barıp twrğan arandatu ğoy. Kerek deseñiz jürgizilip jatqan tergeu isin de şatastıradı”, – deydi student.

Sonday-aq Äsel soñğı kezderi böten adamdar özin añdıp jürgenin aytadı. Belgisiz bireu jaqında ğana jataqhanadan päterge auısqan qızdıñ dükenge şıqqanın añdıp, eskertu aytıp ketipti.

“Üyge köşkenime köp bolğan joq. Keşkisin esik aldındağı azıq-tülik dükenine şıqtım. Qara djip köligi toqtadı. Tipti nomeri de joq. Belgisiz er kisi, tolıqtau kelgen, qasıma kelip “jurnalisterge barlıq jayttı jayğanıñdı qoymasañ ömiriñe qauip tönedi. Ayttı ğoy sağan diplomıñ beriledi dep. Sol jetpeydi me? Tüsingen şığarsıñ. Qoymasañ, qiın boladı”, – dep ketip qaldı. Bwl mağan jasalınıp jatqan birinşi qoqan-loqqı emes. Bwğan deyin de belgisiz bireuler osılay qorqıtqısı kelgen. Mağan osınday qorqıtular jasala beretin bolsa, İİD-ne universitet basşılığınıñ üstinen şağım tüsiremin. Solardan basqa osınday adamdı mağan kim jiberui mümkin?”, – deydi Äsel.

Al qazirge uaqıtşa tergeu abaqtısına jabılğan QazWU-dıñ esepşilerinen habar joq. Tergeu jalğasıp jatqan kezde İİD eşqanday aqparat bermeymiz dep otır.