رۇستەم ءابدىراش رەجيسسەرلىك ەتەتىن تاريحي سەريالعا قىتايدان اتاجۇرتقا ورالعان قانداسىمىز ۇلاربەك دالەيۇلى 700 جىگىتتىڭ ىشىنەن تاڭدالىپ الىنىپتى. ول كينودا كەرەي حاننىڭ ءتورت ساردارىنىڭ ءبىرى بولىپ ويناماق. بۇل ات قۇلاعىندا وينايتىن اتپال ازاماتتىڭ تۇڭعىش رەت كينو سالاسىنا ارالاسۋى ەكەن. ءوزىنىڭ ىرىكتەۋلەردەن قالاي وتكەنى جايلى اقىن ۇلاربەك دالەيۇلى بىلاي دەدى:
«ەلباسىنىڭ تاپسىرماسىمەن قازاق حاندىعىنىڭ 550 جىلدىق مەرەيتويىنا بايلانىستى كينو تۇسىرىلەتىنىنەن حاباردار بولاتىنمىن. وسى جىلدىڭ باسىندا «قامشى» پورتالىنىڭ جانە دە وسى قازاق حاندىعىنىڭ 550 جىلدىعىنا ارنالعان ءمۇشايراسىندا جۇلدەلى بولىپ الماتىعا جولىم تۇسكەن ەدى. سول كەزدە جولشىباي «قازاقفيلمنىڭ» الدىنان ءوتىپ بارا جاتىپ كاستينگ جاريالانعانى جايلى افيشانى كوزىم شالىپ، باس سۇققان ەدىم. ءبىرىنشى ىرىكتەۋدە ءبىراز سىناقتاردان سۇرىنبەي وتكەنىم ءۇشىن، ەكىنشى رەت قايتا شاقىردى. رەجيسسەر رۇستەم ءابدىراش ءوزى قابىلداپ، زىلدەي ساۋىتتاردى كيگىزىپ، ات ۇستىندەگى ونەرىمدى تاماشالادى. وتكەن اپتادا كاستينگتەن وتكەنىمدى حابارلاپ، سۇيىنشىلەدى. قازىر سول الماتىدا قۇجاتتارىمدى دايىنداۋمەن ءجۇرمىن. اللا بۇيىرتسا، 20 شىلدەدە ءتۇسىرىلىم باستالادى دەپ وتىر. ءسويتىپ ءتورت اي بويى ۇلكەن كينودا ءرول سومداماقپىن. ايتا كەتەرلىگى، مەنى كەرەي حاننىڭ جانىندا جۇرەتىن ءتورت سارداردىڭ ءبىرى رەتىندە تاڭداپ وتىر. كەرەي حان ولگەن سوڭ باسقا ءرول بەرىلىپ، جەكپە-جەكتەرگە شىعارماقشى».
اقىنىڭ ايتۋىنشا، سىناقتاردان سۇرىنبەي وتۋىنە ونىڭ كەلبەتى مەن كۇشىنەن بولەك ات ۇستىندە شاۋىپ كەلە جاتىپ ساداقتى وڭقاي دا، سولاقاي دا وتە جىلدام اتاتىن جانە ات ءۇستى جەكپە-جەگىنە اسا شەبەرلىگى سەپ بولعان كورىنەدى. سونداي-اق، قازاقتىڭ سالت-ءداستۇرىن تولىق ءبىلۋى دە ەرەكشە ەسكەرىلىپتى.

مايگۇل سۇلتان