قازاقستان ۇكىمەتىندە شىعىس قازاقستانداعى كەن ورنىندا بولعان جاپپاي توبەلەسكە بايلانىستى شۇعىل جيىن ءوتتى. بۇل تۋرالىTengrinews.kz تىلشىسىنە قازاقستاننىڭ سىرتقى ىستەر مينيسترلىگىندەگىلەر حابارلادى.

“8 شىلدەدە تۇرمىستىق نەگىزدەگى وقيعا بولدى، ول قحر ازاماتتارى مەن جەرگىلىكتى تۇرعىندار اراسىنداعى جاپپاي توبەلەسكە ۇلاستى. وكىنىشكە قاراي، ەكى تاراپتان دا ادامدار زارداپ شەكتى. وسىعان بايلانىستى ۇكىمەتتە مۇددەلى مەملەكەتتىك ورگانداردىڭ بارلىعىنىڭ قاتىسۋىمەن شۇعىل جيىن وتكىزىلدى”، – دەپ حابارلادى ءباسپاسوز قىزمەتىندەگىلەر.

مينيسترلىكتەگىلەردىڭ مالىمدەۋىنشە، ءتارتىپ ورناتىپ، وقيعانى تولىق تەرگەۋ ءۇشىن بارلىق شارا قولعا الىندى. “زاڭعا سايكەس ەكى تاراپتىڭ دا كىنالى ازاماتتارىنىڭ جاۋاپقا تارتىلاتىنىنا سەنىمدىمىز. قر ءسىم قحر-ءدىڭ قازاقستانداعى ەلشىلىگىنە ءتيىستى جاردەمدى كورسەتەدى”، – دەيدى ۆەدومستۆوداعىلار.

ەسكە سالا كەتەيىك، بۇعان دەيىن شىعىس قازاقستانداعى كەن ورنىندا بولعان توبەلەستەن 31 ادامنىڭ زارداپ شەككەنى حابارلانعان ەدى. تارتىپ ساقشىلارى وقيعانىڭ 8 شىلدە كۇنى “قازاقمىس” كورپوراتسياسىنىڭ تاۋ-بايىتۋ كومبيناتىنىڭ اسحاناسىندا بولعانىن ايتىپ بەردى. اس ءىشۋ كەزىندە جۇمىسشىلاردىڭ ءبىرى ونىڭ ساپاسىنىڭ ناشار ەكەنىن ايتىپ، كومبينات اسپازىنا دەنە جاراقاتىن سالدى، بۇل جاعداي كاسىپورىن جۇمىسشىلارىنىڭ ءبىر-بىرىمەن توبەلەسۋىنە سەبەپ بولدى.

tengrinews.kz