تۇركيا قازاقتارى قورى وتكەن جىلى تۇركيا قازاقتارىنىڭ ءبىرىنشى قۇرىلتايىن 28-31 شىلدە كۇندەرى وتكىزگەن بولاتىن. جىل سايىن وتكىزىلۋى جوسپارلانعان قۇرىلتاي بيىل ەكىنشى رەت وتكەلى وتىر.
قۇرىلتايدىڭ العاشقى ءۇش كۇنىندە تۇركياداعى قازاق جاستارىنىڭ 12 فۋتبول كومانداسىنىڭ جارىسى بولىپ، «قابانباي باتىر» جۇلدەسى ءۇشىن سايىسقا تۇسەدى. تۇركيا قازاقتارى جاستاردىڭ ۇلتتىق، تاريحي ساناسىن قالىپتاستىرۋ ءۇشىن سايىسقا جىل سايىن قازاقتىڭ ءبىر باتىرىنىڭ اتىن بەرۋ تۋرالى شەشىم قابىلداعان. وتكەن جىلى جۇلدە 300 جىلدىعى تويلانعان «ەر جانىبەك باتىر» اتىنا تاعايىندالسا، بيىل قازاق حاندىعىنىڭ 550 جىلدىعىنا بايلانىستى «قابانباي باتىر» اتىنا بەرىلىپ وتىر. اقتىق سايىستا بۇلدىرشىندەردەن قۇرالعان اياق دوپ شەبەرلەرى مەن ارداگەر-اقساقالدار شوۋ ماتچتارىن وتكىزەدى.
«20 شىلدە كۇنى قۇرىلتاي اياسىندا بىرقاتار شارالار وتەدى. اتاپ ايتقاندا، تۇركيانىڭ قانداستارىمىزدى قابىلداعانىنا 63 جىل جانە تۇركيا ەلىنىڭ قازاقستان تاۋەلىسىزدىگىن الەمدە ءبىرىنشى بولىپ تانۋىنا 24 جىل تولۋىنا بايلانىستى تۇرىك حالقىنا العىس سەزىمدەرىن ءبىلدىرۋ ماقساتىندا ەكسپرەمەرى ادنان مەندەرەس پەن پرەزيدەنت تۇرعىت ءوزالدىڭ كەسەنەلەرىنە گۇل شوقتارىن قويۋ ءراسىمى وتپەك. تۇستەن كەيىن «تۇركيا قازاقتارىنىڭ كەشەگىسى، بۇگىنگىسى، ەرتەڭگىسى جانە اتامەكەن قازاقستانمەن بايلانىستارى» تاقىرىبىندا دوڭگەلەك ۇستەل ۇيىمداستىرىلادى. قۇرىلتاي سوڭى گالا كونتسەرتكە ۇلاسىپ، قازاقستان مەن تۇركيادان ەلميرا شەندۇران، نۇرلان بەكەنوۆ، نۇرگۇل القوجا، بەشىر احمەت كوسە، سەدات سولاكوعلى، ەرجان تۇنجەر جانە دومبىرا كۇرسىنىڭ تۇلەكتەرى سىندى ونەرپازدار مەن بەقارىس نۇريمان، سىرىم اۋەزحان قاتارلى ايتىس اقىندارى ونەر كورسەتەدى. قۇرىلتايعا قازاقستاننان دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى تالعات ماماشەۆ جانە گەرمانيا، فرانتسيا، شۆەتسيا، اۆستريا، گوللانديا، سىندى ەۋروپا مەن تۇركياداعى 18 قازاق قوعامىنىڭ توراعالارى شاقىرىلىپ وتىر» دەلىنگەن حابارلامادا.

baq.kz